KBZ Bank ah nasemkhat sumtuh “Counterfeit Currency” vaitawh kiman

Kawlgamsung aom Private Bank khempeuh lakah alianpen ahi KBZ Bank ah Junior Clerk nasem khatin sumtuh “Forged Bank Notes” hangtawh kiman cih Irrawaddy pan kiza hi. Tua Junior Clerk nasempa minpen Chit Ko Ko Lin kici a, Karen State, Hpa-An Township sung aom KBZ Bank ah asem ahihi.

Hihpa pen Mon State, Thaton Township sungah Friday ni in kimanhi ci’n Thaton Township Police te’n genkhia uhhi. Thaton khuasung aom zintunna Guesthouse khat ah akimankhia cihi.

Police te’n avanlak Bag sungpanin sumtuh dal 48 mukhia uh a, tuaban ah sumtuh bawlnadingin akizang Template leh Printing Machines zong mukhia uhhi. Tuapa pen tulaitak Police te khutsung ah kikemlai cihi.

KBZ Senior Managing Director asemlaitak ahi U Nyo Myint inzong hihpa kimatvai pen atakpimah hi ci’n gencianna neikhin hi. Akiman Chit Ko Ko Lin pen kum 22 aphakhin khat hi a, Hpa-an Branch KBZ ah nasep alutzawh sawtnailo hi.

U Nyo Myint in agenbehna ah hihpa gamtatna pen anasepna State pan adang State khatah agamtatna ahih banah, nasep zumkah hunsungin thupiang hilo ahih manin, KBZ tawh kizopna bangmah omlo, KBZ inzong mawhpuak neilo hi ci’n genkhia hi.

Chit Ko Ko Lin pen “Central Bank of Myanmar Law” Article 105 leh Article 106 tawh thu kibawlding cihi. Article 105 pen sumtuh “Counterfeit Currency” zatkhakleh thong kum 3 bang kiathei, liausum tuakthei cih ahihi. Article 106 pen sumtuh bawlkhakleh thong kum 10 panin kum 20 bang kiathei cih ahihi.

KBZ panin gamtat khialhna “Misconduct” tawh nasep aki hawlkhiakhin ahih manin, Company in Chit Ko Ko Lin pen atuamin thu bawlloding ci’n U Nyo Myint in genbeh hi.

Abeisa kum 10 sungbang ah hihbangdan in KBZ nasemsung panin thunawngkai omngeilo hi ci’n U Nyo Myint in genkhia hi. Tuaban ah hihpa gamtatna hangin mipite’n KBZ tungah muanna akiamkhak dingzong lunghimawhpian cihi.

Ahi zongin KBZ Bank sungah sumtuh sitcianna “Counterfeit Currency Detecting Machine” akizang ahih manin, hihbang sumtuh zatna tepen Bank sungah omtheilo cihi.

Related: Kawlgam Bank minthangkhat ahi KBZ Bank te’n Bangkok ah zumkhan hong

Mipi te’n KBZ Bank pen angei mahbangin nongmuanding uh kong lamen uh a, angei mahbang in ki kalsuan dinghi ci’n genkhia hi. ZD Sawltak #zomidaily