Kawlpi, Tahan akipuakding thau honpikhat lamkal ah kiman

Kawlpi, Tahan akipuakding Thai leh Germany gambawl thau honkhat lamkal ah kiman

Myanmar, Mandalay Region sungah Wednesday ni in palik te’n mawtaw sungpan in thau akigawm in 22 mankhia uh cih Irrawaddy pan kiza hi. Mandalay, Thazi District sung aom Kywe Tet Sone Toll Gate geinai panin nitaklam 10:30pm hunpawl in Police te’n amatkhiat uh ahihi.

Tua thau akimatna mawtaw pen Toyota Crown (MDY 2D-5608) khat sungah akikoih, akipua ahihi. Kayah State ii khuapi Loikaw panin Mandalay lam zuanin hih mawtaw tawh hongki puakhia ahihi. Mawtaw ahawlpen nupa kopkhat hi a, apasal kum 44 aphakhin Nay Soe Htwe Min @ Ko Sai kicipa leh azi kum 46 aphakhin Mya Hsu Hnin te hi uh a, anih un kiman suakpah uhhi.

Akimankhia thaupen akigawm in 22 hi a, tuate lakah Thai-made Automatic Firearms 20 leh thautang 20 Magazines kihel hi. Adang thau 2 tepen German-made AK-47 Assault Rifles namte ahihi. Tuaban ah mawtawsung panin Mobile Phone 3 leh Kawlgamsum 800,000 Kyats zong matsak uhhi.

Thaizi Police Officer khatin agenkhiatna ah hih nupa tepen “Arms Act of Myanmar” thukhun tawh kizui in thu kibawlding cihi. Kumpi thukhun palsat in thau zatna, puakna pen kum 3 sungbang thong kiathei bekthamlo, liausum zong tampi ki piasakthei hi.

Police Officers te’n guihtheih khamtheih vankham azong in mawtaw akhawlsak uh hi a, lamet hetloh in thau honkhat amankhiakha uh ahihi.

Hih akiman nupa te’n apuak uh thaute pen azuaksawnding ci uh a, palik te’n kuatawh kizom, koi ah zuaksawm cihte limkansan mahmah uhhi.

Thursday ni in hih nupa tetawh akizomding in aki ummawh Maw Ra @ Cung Lian Sang kici kum 45 aphakhin khatzong Mandalay khuasung aom Hotel khatpan kimankhia cihi.

Yangon Times te genna ah Maw Ra @ Cung Lian Sang kici pen Kalaymyo, Tahan vengsung aom khat ci uh a, tua thaute pen Maw Ra in akileiding un avaikhak cihi. Tua thaute pen avek in Kawlpi akipuaksawm hi a, lamkal ah akiman ahihi.

Related: Kawlpi ah Phone sai kiluh, teng 170 man kigu khia

June 2015 kum inzong Mandalay, Chanayethazan Township sungah thau 40 val kimankhia ngeihi. Tua thaute pen unau pasal 2 tungpan in akimankhia hi a, Rifles, Pistols, Revolvers cihbangin thau namtuamtuam leh guihtheih khamtheih vankham honkhatzong mankhia uhhi. Sawltak #zomidaily