Kawlgam vai – makai 4 te muhna VOA thusuah

Kawlgam vai – makai 4 te muhna VOA thusuah

USA Washington DC bulphuh VOA Myanmar news pan U Than Lwin Tun leh Kawlgam Makai 4te – President U Thein Sein, Innpi ukpi U Shwe Mann, Galkapmangpi Sr. Gen. Min Aung Hlaing leh NLD Chairman Daw Aung San Suh Kyi, November 20-23 sungin Kawlgam kilamzia leh 2015 President panmun vai, Makai 4te kimuhna ding vai, 2008 Danbupi puah ding vai, Gamsung kilemna leh Minamneute khualna tawh kisai dotnate kigawmkhawm Ayeyawaddy media thusuahna pan kila hi.

1. Democracy Kumpigam Kikheelna leh 2015 Kiteelna Ah President Panmun Vai: U Thein Sein in President kuanglui ning acih lianloh hangin gamsung piazia leh mipi deihna tungah kinga hi ci-in gen hi. Innpi ukpi U Shwe Mann in 2015 President mun ah Daw Aung San Suh Kyi ahi a, adang khatpeuh ahizong dem nuam ing ci-in Siangtakin gen hi. Galkap lam panin President ngah thei dingin Vice President mun ah Sr. Gen. Min Aung Hlaing kikoih ding hi cih kigen a, amah’n hivai gen ding hun nailo hi ci-in dawnga, thukhun 59(F) puah ding hi theilo ding hi. 59(F) pen mimal gawtna a kibawl hilo a, gambup bitna dinga kibawl hi ci-in khauhtakin gen hi.

2. Makai 4te Kimuhna Ding Vai: Daw Aung San Suh Kyi lunggulhna tawh President, Innpi leh galkapmangpi tawh kimuhna ding vai pen U Thein Sein leh Sr. Gen. Min Aung Hlaing in Kawlgam mailam ding hih makai 4 bek khensatna toi lua ding hi ci-in ngaihsun uhi. President leh galkapmangpi in minam tampi omna ah ei mimal 4 kimuhna bek kicinglo hi ci-in amuhna uh kibanga, Daw Suh Kyi in NLD ah minamkim kihel a, minamkim aitang hi kici thei a, thuliante mipi kimuh ziaizuai hithei pahlo ahihna hangin makai 4 kimu leng muibun ding lam-etna hi ci hi.

3. 2008 Danbupi Puah Ding Vai: 2008 Danbupi puah ding vai ah amuhna uh kibanglo hi. 2008 Danbupi puah ding pen 2015 kumpi thak hun sungin kizom ding hi ci-in Innpi ukpi U Shwe Mann genna Daw Suh Kyi in thukimpih hi. Ahih hangin Thukhun 436 puah ding vai ah NLD leh democracy deihte in min million 5 ngahin innpi apuakna thu pen Sr. Gen. Min Aung Hlaing in million 5 cihpen Kawlgam milip million 51 sehsuah sawm ah khatbek hiel a genthamlo hi ci-a, Daw Suh Kyi in tua bang na cih leh gambup thukimna lak ding amansa hing ci-in dawng hi.

President U Thein Sein in Danbupi puah ding Innpi thuneihna hi ci-in gen a, Daw Suh Kyi in galkapte tung ah kingah hi – 75% puah ding ahih leh, galkap 25% lote Meeting kah zolo omin 75% cing ngeilo a, hithei ngei kei hen cihna hilel hi. Kumpi leh galkapte in Danbupi puah ding alauna uh bang hi a, asem nuam lai ahih lehzong thaumuk kingat bek tawh bang piang nawn tuan ding hiam? USDP leh galkap ahilote in Danbupi puahnopna pen kipuah kei leh galkapte in akhang akhangin ukcip sawm uh ahih man a kipuah nuam hi.

Mipi launa tawh Danbupi puah ngamlo ahih leh mipi pen amau aa dingin bang ahi hiam? Mipi in Danbupi puah ding banghangin hizah takin lunggulh hiam cih leh damdangte bangin khangto nuam uhi. Tun kipuah kei leh Kawlgam aa dingin buaina lam kimanawh zaw ding hi ciin hangsan takin gen hi.

4. Gamsung Kilemna Vai: Gamsung kilemna dingk ideih hi ci-in President leh galkapmangpi in gen hi. Kikapna pen alang tuakin tavuan nei hi. Galkapte in thautawite leen akaploh ding uh kigennapi kidalna omloh phamawh hi. sihna liamna khatpawl gamsupna hi ci-in U Thein Sein in gen hi. Galkapmangpi in KIA in hong phinphinse ahih manin warning piakna tawh kikap hi ci-in KIA phualpi laiza misi 23 leh aliam 20 val thu gen mai leh sawm hi. Aki thuak keikai hi zaw hi ci-a, KIA galkap mangpi Maj. Gen. Gum Maw in Kawl kumpi muanna kiam hi ci-in pulak hi. NCCT in lemgenna hun kisot hi ci-in tangko pah a, kumpi lam UPWC in December 25 ma neih ding ut hi.

Daw Suh Kyi in hih lemgenna ah hong zawnlo ahih manin kei kihel theilo hing cihsan hi. Makai 4 kimu ni ka cih ciangin kamtam napi uh, banghangin lemgenna ah hong hello hiam ci-in amau bangin phunlo hing. Alangnih un hong zawn om nailo a, hong kizawn leh apai dingin amansa hing ci hi. Thun Shwe Mann in Gam ilemna ding kigen laitakin Minister (Mangpi) lui U Aung Taung pen USA in black list (Mihoihlo) ah akoih hangin Kawlgam eithu, amah pen MP, Committee chairman hilel a, hithu buaitak hilo hi ci-in gen hi. Hih atunga thute Ayeyawaddy news in November 26 ni asuah uhi. Editorial, Zomi Times