Kawlgam Union Day leh ‘Zomi minamni’ pahtawi leh bawlbawl lai ding maw?

Kawlgam Union Day leh ‘Zomi minamni’ pahtawi leh bawlbawl lai ding maw?

A beisa hunsung Zomi te kalsuanzia en pak le’ng ‘INNGUA HAHLO GAMGUA HAH’ cih ih paunak pen, Zomi-te mahtawh kituak phamahmah leh kilawm hi. A hih leh, a thuuk in ngaihsunkik taktakleng;

Tu ciangciang, ei leh ei sang’ minamdang khatpeuh muangzaw, enpizaw bekthamlo, a gen’ khatpeuh umnuam zaw, a hihkei leh, a mau tung-ah cihtakna aa kipan, thukhualna te ih lakzaw thei hi. Hibang gamtatna pen ih sungthu-laigil hilo-in, ih puathambek hileh thuhoih ding khat na hi gige hi. A hizong, ei-mi sung kipumkhatna ding kigengen tale’ng, ki kheltat ki lehtat in, namdangkhat cihkhat peuh ki sangnuamzaw, ki huainuamzaw laithei hi. A taktak in, ei leh ei ih kimuan leh ih ki panpih mateng’ mite’n hong zahtaak leh hong muang taktak ngam tuanlo ding aa, ih hoihna ding hamphatna taktak zong hong pia khollo ding uhhi.

Zomi minamni leh Kawlgam Union Day hong piankhiatna, ih etciang in, mipi leh mitamzaw thukimna a thuhoihpen a hihphial-hang, a sakhi tuinek-a bulpi kan-in, a gah ih nek taktak ciang kha’sa-in, tudong a kitomtom hileng kilawm hi. A cil pek-in, Union Day apian theihnang’ Kawlgam sungah kigawm sukse lo in, ei leh ei om lel leeng tu’a sahang meilet aa, ihlet sang’ a hoihzaw thamding na hihtuak hi.

Zomi namni (Chin/Zomi National Day)ih cih la’nla’n zong, Zomi-ukpi te deihloh na hang’ aa, mipi te ki thutuahni himaizen lel hi. Tua hunlai, ih pu leh ih pa te tuahna leh ngaihsut-theihtawp zong hikha ding a hihzah in, pilna laak-huai thu hong hita hi. Ih etkik ciang, tua hun ukpi te zong, Mangkang te nung ah, Kawlte a pomsukuh hita lel aa, a mau uksung zong sawtnawn loding cih muhtheih a hihi. Mipih te kikhuallo in, ei leh ei mah ih ki nawk kulzel hi.

Ngaihsun kikhuai khat, ‘Sing omlohna ah gua kizang’ ci-a, minamni ci-nuam tentan hang ih cih lehzong 1947-48 pawl aa ih pute hong lam khialhpihna te hang in, tudong mangbang aa, ih kiveivei nate’ lungngaihna leh lungsialna in zat huai zaw lo hiam?

Ih minamni taktak ding pen, thunamtui tawh kipumkhat ni, midang muanglo ei le ei ih dinni, minam min, lai leh pau min kician sitset thukim aa, ih ciaptehni hi leh maw?

Tangthu ciamteh in ciing ni.

Leitung galpi masa (World War 1) a pianzawh tukum 2014 -in kum100 cingta aa, mangkang te’n kum 100 cin phawkna in, lai-atna, limlahna tawh ahizong, tangthu te suutsuut mai uh hi.Mailam lamlak ding-in, taangthu sang’ a hoihzaw omlo na ci uh aa, tangthu theite (Historian) zong zahtaak phadiak uh hi. Tangthu-te ciaptehna tawh kisialh ding sang-in, a beisa khialhna te khialh notloh nading naci zaw uhhi.

Eizong Cope Topa hong piak Lai ih neihzawh kum100 cin ih bawl khin zota hi. Kum 100 cin phawkna lai leh limte mipite ettheih ding ih suutna, tam lualo cileng kikhial lo ding hi. Ih minam min Zo maw? Zomi maw? tuamah bangin ih kampau zong Zokam, Zopau or Zomipau? Zolai maw Zomi lai? A hih keileh Tedim kam/pau, Tedim/Kam Hau lai cih bang lungbuaina mun-ah tampi ki omlai hi.

A beisa kum 100 sung, ih tangthu te enkik pak le’eng, Kawlgam sungah, ih ki-ap ni (Union Day), Zomi-ukpi te deihloh ki thutuahni (Zomi-namni) ih cih zong ih laineih khit hi. Thual Zen gal leh Zomi Baptist Convention a suah leh a sih zong ih laineih khit mah hi. A beisa ih khialhna te khialh kiklohn’ang lam honglak ding meivak in, ih tangthu hi.

Tangthu theibek hilo, ih ciin ih zat theih keileh a kimanna omtuanlo zel hi. Mangkang te’n Knowledge is Power ci-a, Power a piantheih nadingin Practice kisam hi. Tua knowledge zangthei te Power bek nei lo-in, Wisdom zong na ngah uh hi. Wise ih cihciang in, a khialngeilo hilo in, a khialhsa te uh khialnawnlo cih hizaw hi. Knowledge ih neihkei leh Stupid hong kici ding aa, Knowledge nei gige na pi-in ih zatkei leh Foolish hong kici ta ding ahi hi.

Tulaitak Zomi leh Zogam masuan

Hunhoih te hong pai kik pahpah lo a hih ma’n, pilvang tak-in zatsiam huaita hi. Israel te zong nam 12 om a kicih mahbangin, tuhun Zogam leh Zomi minampi-in hong kiciapteh nading ih buaisan laitak-in, Zomi veve sungah zong, 1947 kumpawl aa Zomi ukpi leh ZBC official aa hong phuangkhia masa, Laisiangtho teikhia masa zosuante, Zogam ah Pasian thu tunmasakna tawh kizui aa leitung thupha ngahpha diak aa kimu zosuan(Sihzang) te leh a min uh amangngeilo ding Zo a kici zosuan te’n zong itna leh thukhualna tawh panmun la-in mapang phadiak leh lunggulhhuai leh a kilawm thu khat zong a hihi cih tawh,

Zomi namni taktak ding’ 2014 Myanmar Census ni hita hen.

Nantal’suan

Ngaihsutna hongsuah khiasak leh Lam honglak thului te:

1. Kawlgam suahtakna tangthu(Myanmar School Text book)
2. Sukte Chronicles
3. Zogam leh Christianinty hongtunna thutuamtuamte (a diakdiak in ZBC, ZOLUS leh ZCLS articles)
4. Zomi leh Zogam tawh kisai netsung (Zomidaily, Tongsan, Zogam online, Zomi messager, mailgroup tuamtuam….) aa ki-at tuamtuam te
5. World War 1 documentary (BBC)