Kawlgam kitelna leh a lungngaih huai pawlkhat

Kawlgam kitelna leh a lungngaih huai pawlkhat ~ Kap Lian

Zomi te in bel minam party ZCD vote I piak manin hamphatna kingahlo hi a ci pawl ki om a, tukum kitel ciang NLD lam a lunglut tampi om hi. NLD leh ZCD te’n (ZNC hun lai) term masa 2010-2015 Thukhunpi deihlohna hang tawh boycott uha kitelna-ah lutlo uh hi. NLD te’n a pua lam pan sem ding ci uha, lem thei lo hi. Tua ahih manin 2015-2020 term ciang kitelna-ah lutkik uh hi.

NLD te mungtuppi pen ahih leh Thukhunpi kheng ding cih hi a, tuni ciang bangmah lawhcing zolo uh hi. A pualam pan sep sawm ta leh lawhcing lo, Lotdaw sung pan sem leng lawhcing ding ci uh a lawhcing tuanlo uh ahih manin amau hun a beita suak phot hi. Gambup level a I muan mahmah NLD in zong bang mah sem zolo uh ZCD bel gen vet a kullo hita hi.

2015 Kitelpi-ah Kawlgam bup zawh cihtak a zawh uh hang bang mah sem theilo uh ahih manin tukum kitelpi-ah bel mipi muanna ngah lai sam le uh zong tampi kiam ding hiphot hi. Kawlmite lakah a tamzaw a zo phial uh zongin mualtung mi tualsuak minam khempeuh in amau gam (State) ciatah amau minam party vote pia ding uh hita hi. Mualtung gam (Gamke) khempeuhah Tualsuak minam Party in zawh cihtak hong zo ding uh hi.

NLD dinmun pen Kawlmite lakah zong patauh huai simtham ta hi. USDP in zong mi pawl khat nei, 88 makaite’n zong mi nei, Swemann makaih Party in zong mi a hiciang khat mah hong nei ding uh hi. Tua ahih manin NLD in mun tamzaw-ah a zo phial uh zongin Government form zo lai mah ding uh hiam cihnop huai ta hi. Kawl Party dangte tawh kibelpawlna a neih uh leh bek government form zo ding uh hi.

Zogam lamah bel minam Party nusia phot a gambup Party NLD lam a tai ding pen Mualtung mi namdangte tawh kilehbulh linlian kha ngel ding hi hang. Zogamah NLD vote piahuan leng zong ei mite deuhdeuh pen I lamet pi khat ahi CM leh House Speaker khawng ngah nading lampi om vetlo hi. State level a makai omlo pah phot hihang Chin State a makaipi ciang bang na om hileng zong CM, HS khawng kilamet theih hi ahih hang Township level bek I hilai phot tadih uh hi.

NLD pen mipi muanna bei ta ahih manin Minam tualsuak Party thupi sa lo a Gambup Party mah thupi zaw hi a cici te aadingin mai lamah 88 makaite tawh hoihtak na kipawl thei zaw leng I ma vang zaw pek ding hi. Tu a NLD lut pan, I buakhuan zong vaikai lua khinta hihang. Mailamah 88 makaite hong khangto ding hi, 2025 ciang hong hat mahmah ta ding uh hi, mun lak kholh huai zaw hi.

Bang hangin NLD mi’n muang nawnlo hiam cih sutsuk pak ni. ALD Party in Rakhine gamah zawh cihtak zo uh hi na pi’n CM ding pen ALD pan kipia lo in NLD mi khat kipia hi. Tua huhau in tuni dong AA tawh kibuai toto den hi. NLD te’n Mualtung mite lunggulh (sunmang) ahi den Federal vai gen ngeilo uh a, 21st Cent. Panglong vai zong bangmah tangtun lo ding uh hi. A mau mungtuppi Thukhunpi khek ding cih zong sem zolo, ei sunmang peuh sem lo ding bek thamlo sem le uh zong sem zo lo ding uh hilai hi.

I sunmang mualmong et mah bang lai hi. Amau zong Kawlmi mah hi. Mualtung mite vai tawh buai manlo ding uh hi. Mualtung mite vai (Federal vai) a gen thei zel pen 88 makaite bek ahi hi. Amau hun ciang Mualtung mite lunggulh kigen khia pan ding a tangtung thei kha ding hi. Gamsung daihna, Minam kilemna leh kilam thakna cihte khangthak mi a tamzaw lunggulh leh Tualsuak Mualtung mite lungdeih sunmang ahih manin NLD pen mipi muanna ngah nawnlo uh ahi hi.

Tua ahih manin I minam Party a dinpih nuamlo vette’n NLD khawng peuh cici nawn dah unla Khangthak Party (88) khawng a hun omlai (hunlap in) lut in madawk zawleng I ma vang zaw pek ding hi. I lunggulh pi Federal vai hong mualsuah pih zo ding Kawlgamah 88 makaite bek om hi. Mailam ciang ZCD te zong NLD nusia in hihte tawh kipawl huai leh hong kipawl le uh a tup uh tangtun baihzaw ding uh hi. Kap Lian