Kawlgam ah Cardinal ngahkhak manin ki lungdampih mahmah

Kawlgam ah Cardinal ngahkhak manin ki lungdampih mahmah

Archbishop Charles Maung Bo pen Cardinal khatin hongki teelkhiat ciangin Kawlgambup aom Catholic thuzui te ki lungdam mahmah hi. Kawlgam panin Cardinal adang om ngei nailo a, Kawlgammi Cardinal masapenpen ahihi.

Charles Maung Bo pen Yangon ah Archbishop asep laitak hi a, hihbang in Pope Francis in Cardinal khatin hong teelkhiat ciangin Catholic thuzui te bekthamlo, Kawlgam sung aom Orthodox, Buddhist, Muslim biakna makai te na ngawn in lungdampih mahmah uhhi cih AP News in pulakkhia hi.

Pyinya Thiha kici Kawlbiakna makai Buddhist Monk khatin agenkhiatna ah hibang in Kawlgampan Cardinal ih ngahkhakpen Kawlgambup in ki lamthakna hiding hi. Adiakdiak in gamgi tengah nahoih tampi kisemzo tuamding in lamen hang. Kawlgambup sungah taangpi taangta tawh nahoih sepkhopna te hongkhangto dinghi. Tuapan in ih Kawlgam mahmahzong hong khangto semsem dinghi. Cardinal khat ih ngahkhak lungdam mahmah hang” ci’n genkhia hi.

Kawlgam pen ihtheihsa mahbang in Buddhist gam hizaw a, tulaitak Kawlgambup ah mimal phazah Population pen 50 Million in aki ciamteh ahihi. Tualak ah Catholic thuzui pen 700,000 bang phading cih AP News pan kiza hi. ZD Sawltak