Kawl Party NLD, USDP….???

Kawl Party NLD, USDP….???

Kawl party, Namdang party, Minam party cihte bangtawh teh a, bangci bang a i seh ahi hiam? Minam party cihbang a om mah hiam? Mizoram ah MNF leh MNU (1980s hunlai in) om hi. Koi pen Minam (Mizo) party hiam?

Party pen mipi ading politics na a semnuamte in panmun a ngahna ding a a siksan, mipi’ vote zonna platform hilel hi. Party pen party hi a, Minam pen minam hi. Minam pen party’ neihsa hilo a, Minambup neihsa party cihbang omlo hi.

NLD Kawlte’ aituam neih hileh banghang in Chinte VP suak a, banghang in Kachinte’n Pyidaungsuh Hluttaw Speaker semthei ding hiam?

USDP, NLD cihte a gum leh a deih lua mahmah kahi tuan kei hi. Gambup a uk kumpi a sem party i minam ading in bangci bang in lok in, i deih gah leh teh singkhia zo ding ihiam.. cih ngaihsut huai a sa kahi hi.

Minam party ci a i minvawh, Minam minpua party tawh bangzah ciang (a muibun zaw a) lok zo a, bangzah lokkhia khin i hiam? Midangte sang muibut zawkna gah bang muthei khin ihi hiam? Tehpih, tehkak tawh ong gen un. Ong hilh un. Thuman tawh mipi ong thuzawh un.

Gambup thukhunpi Constitution articles 127 (c), 133, 138 (b), 158 (b) cihte zui in MP khempeuh in Hluttaw meeting sung ah a kibang a thu gen thei uh hi. Party leh Minam tawh kideidanna omlo hi. Party leh Minam in a khaktanna zong omlo hi. Tuamah bang in, Hluttaw Channel a thu kigente, a ding khempeuh (ZCD lobuang) a party min, a minam min gen kuamah omlo hi. Thugen dingte zong a constituency bek kigen a, a party leh minam min peuhmah kitangko lo hi.

Minam ading nasepna, mapanna ah a phu, a gen, a sem takpi ding tangmi (MP) leh eitawh ong pangkhawm ding pawlpih kisam ihi hi. Kawlgambup Pyidaungsuh Hluttaw MP 664 lak ah 5 bek apha eimite’n eiguak din tawh bang kilok zo ding hiam? Pawlpih, ei ong angvan ong panpih ding mi neilo in bang phukhia zo ding a, bang lokkhia zo ding ihi hiam?

Zomite’n i ma bangci phut lehang vang ding a, bangci bang in gambup kumpi lok lehang i duh i deih gah limci, teh limci lokkhia zo ding a, lokhia zo ding ihi hiam? 2020 kiteelpi ong naita hi. Pau Khat Suan