Karaoke lasakna ah nasem numeino

Karaoke lasakna ah nasem numeino

‘Katanu in Karaoke ah nasep ngahta. Karaoke a lakisa te lotngah ta. Lasa kawm in laamthei ta. Nikhat nai 16 sung Karaoke ah nasem ta. Tu’n sum manman in hongkhak thei ta’ ci in a lungdam nu le pa kua mah omlo ding hi. ‘Ka tanu in itna nei in mite’ pheitungah tu in, kawi in pilmahmah ta’ ci in a kipak nu le pa om ngeilo hi.

Karaoke ah mi’ ta (nungakno) te mu in etlawm, ngaihbang nasak mahmah hangin na tanu te hileh na khasiat suak in na enngam kei ding hi.

Hihbang i deihloh, midangte, mipil te sepnoploh teng gamdangte’n kawlgam mi te hong semsak mawk hi. Thai, Malaysia, China cihgam te ah Kawlgam mi te tammahmah hi. Ih tu le ta te tua munah nasep kiguan hi. Hotel boss te, Ansai neite, Club neite a’dingin sumlut tam a piangsak pen nasep sem uh hi. Tua nasep hangin boss te in $1000 a ngah hangin nasem te in $5 (a kiciangtanval) ngahlo hi.

Banghang hihbang tuabang munte ah nasep va zong i hiam? Tua munte ah nasep hong kipia hiam?

Gtn: vaimim a duhlo mikhat in vaimim nelo hi. Ahizongin nek ding a dang an a omlohna ah a gilkial ciangin ne veve ding hi. A sihding sangin nuntak nading vaimim a ne ding hilel hi.

Tua tawh kibang hi. Pilna zonglo i hihmanin pilna i nei kei hi. Pilna neilo i hihmanin siamna i nei kei hi. Siamna neilo i hihmanin septheih i nei kei hi. Septheih neilo i hihmanin mi hong koihna munmun ah a kiom hi ta hi.

Mi hong koihna mun ah sem kei leng gilkial ding a hihmanin paulo in a kiom a hihi. Nuamsa in, thupisa in leh deihmasak tawh gamdang leidang ah a kipai masa hilo hi.

Tuahiaa tuni pilna thupi ngaihsut ding hihang. Pilna mah sin tangtang ding hihang. Neihlelam a bei zongin nu le pa te in ta te pilna mah sinsak ding hihang. ‘Kawlgam pilsinna hoih kei’ a kici phialzongin sangmah kah tangtang ni. Siamna sin ni.

Tua hileh pilna leh siamna neite in a sep nasep te i sem thei pan ding hi. I sepnop i teltheih nadingin pilna, siamna nei masa ni ci in a gennuam i hihi.

Hihlai pen gamdang muntuamtuam a vazin kawikawina pan hongciahkik mikhat in a lainatna hong genna tawh kizui in hong ki gelhkik a hihi. Siamsin Library