Kammal kilawm pawlkhat (azom 27 August)

Nungak tangval akum tam pian simte zineih pasal neih hun kisa mahmah napi’n,
kum bang tam sim pian ta piangthak nailote lah pianthak hun kisa khollo bilbel se hi.

Sumpi leh sawm-ah-khatte- ah, sum kicingsak zo ngei lonapi-in, adang dangte-ah bel sum zatna i kicingsak bilbel hi.

Kikhop lap ngei lo napi-in, pawi mawkmawk khawngah bel a tung masa lamah i om se hi.

Pasian min leh gam adingin piakkhiat ding nei lo ci napi-in, adang dangah piak ding ciang lah inei kik bilbel hi.

Sumpi ding ciang a neu/tawm theithei kiakhia napi’n, vuihtheih khamtheih lei nading khawngah bel a tam thei thei i pia khia zo bilbel hi.

Itna pen muhdah lohna ciang bek hi loin, telsiamna leh maisakna tawh kizom pelmawh ding hi.

Hai hong kisak leh lungkia thanem pahpah kei in. Leitunga mipilpente zong a theih loh uh nak tam lua hi.

Zawng hong kisa-in hong kineumuh leh khasia pahpah kei in. Leitunga mihaupente’n zong aneih loh uh nak tam lua hi.

Meigong tagah daipaam ci-in hong ki simmawh leh thuak teta lel in! Meigong tagah daipaamte a kempa in na khempeuh hih thei hi.

Na kam tektek tawh na tate thu na hilh loh hangin, na nuntakzia leh na gamtatnate tawh, na tate thu a hilhhilh nahih lamtak phawk gige in!

Nu leh Pate’ kam pana thuhilhna bek hi loin, Nu leh Pate’ gamtat luhek zia tungtawnin zong pilna tampi kila thei hi.

Na hehna hawmkhia kei in la, na lungdamna hawmkhia in!

I tu i tate lim takin i pattah siam kei leh hun khat ni ciangin, nu/pa ginalo hong suak toto lai mawk le-uh, i khang tangthu-ah miginalote nam ci-in hong kiciamteh in hong kilipkhap toto lai kha ding hi.

I khang tangthu hoihlo teng puah pha-in, Jesu min tawh a khel ding, khangthak momnote hi hang.

Khazih sungah,
David Tuang