Kammal kilawm pawlkhat (azom 20 Oct 2015)

Kammal kilawm pawlkhat (azom 20 Oct 2015)

Mite’ adingin, i thupitna leh i manphatna pen, pilna siamna, neih leh lamh leh sum leh paiite’ tungah kinga kha mah ding a, Pasian’ adingin ahih leh, i manphatna leh i thupitna pen, Jesu Khris i neihna leh i kiniamkhiatna tungah kinga hi.

Thu hoih i cimtaak theih lai teng, thusia adeihdeih(thusia aniallo) ihi gige hi.

Khemna(zuau) zangin, lawhcing daupai-in, i gualzawh sangin, thuman citak vilvel a, a guallel ibat pen hoih zaw veve hi. A hun tun ciangin thuman mite in nopna bukim ngah ding uh hi.

Nahoih sepna-ah midangte’ sepkhiatna etteh ding hi-a, ahi zongin midangte’ sep zah tehsak ding hi lo hi. Eima sepna bel i teh zelzel kul ding hi.

I thuakna a tam ciangin, a guallel kibang den a, ahi zongin gualzawh nading lampi a bawl kholkhol ihi gige hi.

Mite’n na pil na siamna leh na theihna tawh kizui-in nasep hong pia ding uh hi. Pasian in amah it-in na zahtakna tawh kizui-in thupha hong pia ding hi.

Piangthak ing cinapi-in, nuntakna diktak i neih theih nai kei leh, Jesu thei napi-in, Jesu aneilo ihi kha ding hi. Ki sit phakik ni.

Jekhe, Jesu tawh a kimuh ciangin, a nun lui gamtatna khempeuh nusia-in kikhel a, a gamtat luhekziate a kilamdan’ mah bangin, Jesu nei taktak ing i cih leh, i nun lui(i pianthak ma) gamtatna hoih lote ki nusia nuam dinga, i gamtat luhekziate hong kilamdang pelmawh ding hi.

Khazih sungah,
David Tuang