Kah-nuihna ngaih baang ~ Tdkhen

Kah-nuihna ngaih baang ~ Tdkhen

1. A kahnuih theite lungsim cidam, pumpi cidam hinuam hamtang hi.

2. Kahna leh nuihna a tuam tuak hi a, a thuahkhawm zote mithahat ahi hi.

3. Kahna pen khuazing vai hi a, nuihna pen khuavak vai hi-in, khuazing khuavak phamawh a sa lote mi picing ahi hi.

4. Na sa mahmah napi-a nuihtheihna pen lungsim siangtho kilatna ahi hi.

5. Heh mahmah napi-a nuihtheihna in maisakna gah khat ahi hi.

6. Ahizongin gul in, “Ka mei hong sikkha henla ke’n tu leng” ci acih lungsim pua-a, a heh laitaka a nui pawlkhat om kha mah ding hi. Banghanghiam cihleh a suk nading mu thei kisa hi. Hibang mite en phapha lecin na tel thei ding hi.

7. Dah ciang leh nuam ciangin a kap pahpah thei leh a nui pahpah thei ki om mah-a, a gennop khat peuh khitui kal-ah a gen thei ziauziau ki om hi. Tua mah bangin a nui khempeuh a lungdam hikhinlo thei a, a dah khempeuh zong kap khinlo thei hi. Tua ahihmanin a ngaihsut bangin a ta ziauziau theite mi hampha ahi hi. Lungsim banga pumpi a kha theilo zong ki om hi.

8. Nuihna ciang pen lungsim hoih tehna cing zo lo-a, kahnuihna in ahihleh lungsim hoihna hong lak hi.

9. Mipilte in ngaihbaang a sak pen kuate hiam? A kahnuihte ahi hi.

10. Kahnuihna in Khristian zia khat ahi hi. Banghanghiam cihleh na a sak hangin a lung a kim hi. A piangsakpa’ tungah khasia ngei lo hi.

Thukhupna:-
A ihmu taktakte sangin a ihmu kipangte phot hak zaw a, ahizongin a kap taktakte sangin a kahnuihte khem nop zaw hi. Banghanghiam cihleh a khitui kawm panin hong nuihsan khin hi. Tdkhen