Ka zanmen zan

Ka zanmen zan

Pialkhanga tangval pawlkhat khawl khomte thu kikup leh laa ngaihte’n hong ihmu sak thei lo a, a diakdiak in ka pu Ngaih Langh in laakhui sunga a sak “Lenlai Tanlai” acih ka galzak ciangin ka lungsim hong tangpil sak semsem ahihmanin hibang thu peuh ka ngaihsun hi. Aw leitung icih pen gentheihna leh khitui luanna gam hi a, ei mihingten “hici zawdeuh leh cih a om lohna mun Pa angsung” bek lametna tawh aki ngak ciuceu hi icih den sam hangin azawng pen leh a genthei pente’n zong Lenlai Tanlai hunnuam na nei ciat uh hi. Mihaute bek hi lo mizawngpen te nalengin zong mihaute nuntakna genloh Vantunggam naleng zong phawk lo lianga nopsak hun aki nei ciat himawk cih thu ka phawk hi. Kah ngeungeu hun a om mah bangin nuih kheuhkheuh hunzong gentheihna gam hih leitungah ana om hi veve sam hi. Topa hoihna kicing si e maw…

Ka lupna tungpan tuabang peuh ka ngaihsut laitak in pialkhang a tangval tukhomte laka khatin aki za khop ciaiciai in nailon tutphah hong beng keuhkeuh a “…taikhua a valnop leh val henla, buahal zong khuang lel hen…tuzan ei zankhua hi” cih laa ngumngek hongin pan mawk a, asa thei tengin sakpih pah in, keilam panin ka sakpih theih loh hang amau tawh kibangin ka lupna tungpan a zanhak ding ka hihlam ka tel pah hi. Lawmte lungleng khawng “Ihmu lel un” vacih ding ki-awi lo ka hihman in ka lupna pan tho to in keilekei Coffee ka kibawl a, tua Coffee dawn kawmin ka Pukhai laptop tawh sabuai omna lam ka zuan phei a, lungsim sunga thu om bangbang ka khensuk pah ziahziah hi.

“Lunglai khaubang ka hualhual ciang tang bang dam ding sial bang lian pen e. Tangbang dam ding sial bang lian pen, heisa bang pal dingin sam lai e” cih tawh hong zomto leuleu uh hi. Tutpha ging bek kiza nawn lo a, tuasanga a ginpha zaw khat hong om ciangin lam kawma sual tuan om hiding in ka ummawh pah hi. Ka kawngkhak vangpan ka et phei aleh ka upmawh bang lian na hihi. ” Sesum minthang ka ngaih manin pupa theih loh singgamlei ah sawlbang hei ing….sian aw lum bang hong sung in…” cih la asak lai takun a laivua alam kiaukiau pa mitpa’n a khitui taksuk keuhkeuh zong ka gal muh hi. Zukham ankham lah hisam lo a tuabang a pasal takpi khitui tawh kidim ka muh ciangin ih omna kawlgam, ih tenna Zogam leh gamdangte khantohna lamah ih kikhaihzia, mi ih bat zawh nai lohzia ka phawk semsem a,tuain hong uk thuneite hawmthawh huai zia hong telsak tektek in ka lungsim sunga liamma hong thaksuah kikkik hi. Zomite khauhual khat banga ih pankhop theih hun ciangin tulai taka ih thuak gentheihnate hong veng na ve maw cih tawh ka ki hehnem zo bek hi.

Laptop zat icih zong hong sawt pian leh khutngong kham thei veve a, tuttutna tawbo zong sah mello ahihmanin lupna tungah ka tawlnga leuleu hi. Pialkhanga Zola saten zong tu liliai kawmin ” Eilah nunnuam in ih leng a, gual ii enloh ding eiteng liliai aw e” cih la hong sa ta uh hi. Ka lupna panin nui kawmin ka sakpih hi. Ahizongin sawtvei ka nui zo kei hi. Bangtan vei khitui tawh kahnuih kawmsa in Zomiten hih la ih sasa lai tam aw! Ka Phuitong leh ka Heisa hong paal phot henla, ka Gullu hong kito phot leh… namdangten Eiteng liliai hong eng ta sam lo dia maw!

Malaysia ah khuahunte manlang lua ahihmanin ak khuanma in khuavak den hi. Tunzong khua avak khin na himawk a, pialkhanga zanhakte lasak ” Khuakhal vakin a, lei lengthe hong khuang zankhua sawt in bang sial ka hiam aw….” cia Lengtong Pauno in a nasak pen ngai kawmin ka thoto a,kisil in, tuakhit ciang ka nasepna mun lam manawh in nawh takin kal ka suan phei pah let let hi…

Francis Lamthang
….Zomi Quavadis…..