Ka sungthu kiukhat (1) ~ Deih Tung

Ka sungthu kiukhat (1) ~ Deih Tung

Nang kong muh cil ni in Tedim sangpi pai na palik lennuai lampi pan a hihi. Ka lawm te khat tawh lampi ah na na om uh a, ka lawm pa in nang leh kei hong meihset hi. Tua ni in ka lawm pa kiang ah kei tawh ki sai thu khempeuh a dong na hih lam ka lawm pa in hong gen kik a ka khua nung theih hi. Na biang ah tangsiat pi khat na nei a, kunteh tawh na belh hi. Na sam sau in mam mah mah a, na et lawm hi. Sangpuan tawh na ki lawm mah mah a, na sam sau in na tawbo dong ban suk hi. Sangsung ah kei a makai ka hih lai tak in nang pen midang makai te kiang na ut kei a, kei makaih na sung bek ah na om nuam hi. Mi khem peuh in nang pen hoih hong sa uh a, lai zong pil na hih man in siate mai pha na ngah hi. Laigelh siam mah mah khat na hih lam ka thei a, a beisa kum te ah nang pen kawlgam bup lai gelh kidem na ah a ki hel ngei na hih lam zong kong theih ciang kong kihta sim pian hi.

Kih tasim pian cih ciang in zahtak huai kong sa a, na mel hoih lai a hih man in kongpak ta deuh lai hi. Ka lawm pa kiang ah ka thu te na nadot na ahang pen kei hoih hongsa in nong ettheih pian khat ka hih man a hihi. Tua ni in ke’n kong muh cil ni ahih hang in nang kei nong muh cil ni in koi tak hi a, bang mun hiam? Ka phawk lai hi. KamHau tual pi ah bawhlung sui ki dem na om a, kei zong bawhlung sui te lak ah khat ka hihi. Bawhlung suih ki pat ma in nungak te in paak khat tek hong pia ding uh hi a, tua mun ah kei paak hongpia pen nang na hihi. Tua pak nong piak ni zong ka bawhlung suih na uh ka man siang dong uh nong en a, nang nong et man a hi mai diam goal 2 ka khum a, ka kidem pih te uh ka zo uh hi.

Na lawmte tawh na ki thuah ciang kawlpau bek bek na zang uh a, kawl te kong sa hi. Nang pen Kawlpi, Mandalay,Yangon cih te ah sang a kah ngei khat na hih man in kawlpau na siam a, kawl lai zong na siam hi. Sang khan sung ah lai na theih loh te kei nong dong a, lungduai tak in kong hilh hi. A hi zong in nang pen lai thei lo na hi kei a, ka aw a za nuam na hihi. A thei lo na ki neih a, kei nong thu pi sim hi. Sangsia te omsung in lai gelh ding a om te thakhat thu in na gelh nuam kei a, siate pai khiat khit ciang ka laibu nong kawm a, ka lai bu sung pan na tei sawn sese hi. Ka khutma, ka letzi hoih lo lua a, a hi zong in nang na tel veve hi. Hoih lopi pi mah pen ka laibu mah nongkawm tantan a, ka lai bu mah na nuam tuam hi. Khat veivei ciang in ka laibu sung ah lai na gelh pawl khat ka mu zel a, hoih ka sa hi. A hi zong in hoih a sa lo, a deih vet lo ka ki neih te nang zong na thei hi.

Yangon ah laigelh ki dem na ah Zogam bup ai tang in na va kidem a, nong ciah tak ciang suaklu nong puak hi. A khat na na ngah zo kei a, na tupna ngah zo lo na hih man in na lung a kia hi. A hizong in kei tawh ih ki muh kik ciang na ngaihsut na no suak kik a, a ngei na bang kik hi. Maitai in kamsiam lai leh pil na a nei khat nang bang lawmhoih kongneih pen angtang ka ki sa hi. Tua bek hi lo numeilawm ka neih cil na hi kawm lai a hih manin nangzah a ka diip in puk puk a cih midang om nai lo hi.

Sang kapai ciang in kei tawh ton ding na ut a, ka khut nonglen den nuam hi. Ka khut nong let ding ka ut kei a, ka sangthungip mong bek kong len sak hi. Ka puansilh dan pongmaan loh na aom ciang nong bawlsak nuam a, ka ut kei hi. Tuition ih kah ciang inkei tawh bek na tu nuam a, sang sung ah zong kei tawh bek na tu nuam hi. Sangsia te lawm te in hong ko ding na lau kei a, kei tawh om nop na sa hi. Sang inn ah moh lehnek theih na zuak a, kei a mawk na in nong pia hi. Midang te sang in ka hoih zaw tuan kei a, ahi zong in kei bek nong ci teta hi. Sangsung leh tuition kah na ah kei tawh a tu khawm mawkmawk hi lo in ka khut a hih kei leh ka khe nang tawh ki sukha lo in na ut kei hi. Ka pum pi na khat teitei tawh nong ki sukkhak kei leh na lung kim lo a, hi thei hi leh ih khut ki len sa in om det ding na ut hi. Sangtuah ciang in ka inn lam uh hong tawn in nong ci a, ka ut kei leh ka sangthungip ah nong kaih na in ki kek hi.

Nitak ciang video en ding ci in nong zawn a, kei bek tawh na en nuam hi. Video mu nuam na hi kei a, kei tawh ki thuah ding na ut man a a hih lam kong thei hi. Video et sung in kakhut nong len den a, ih video et in bang hiam cih zong na thei kei lai hi. Sum neih leh neih loh pen nang a ding in a thupi hi lo a, na kiang ah kei ka om ding bek na ut hi. Kei tawh na om nak leh midang te na mang ngilh a, na lung sim ah thudang hong lut zo nawn lo hi.

Tui ka tawi ciang tui nong tawi nuam a, na tha nuam hi. Tui tawi a tha nuam na hi kei a, kei tawh tui tawi khawm leng na ut man a hihi. Sing ka puak ciang in sing na pua nuam hi. A tha nuam lehsing a ki sam na hi kei a, kei tawh na ki thuah nop man cih ka tel hi. Vok an pua in ka pai ciang in zong nong zui a, no a ding zong vok an na pua hi. A hi zong in no vok a nei lo na hih lam uh kong thei hi. Keel an ka puak ciang in zong tua mah bang a hihi. Kei sang in a tam zaw keel an na pua a, ahi zong in no keel a nei lo pi na hi uh hi. Kei tawh ki thuah nuam asa na hi a kei hang in gim a thuak na hi hi.

Ka omna ah nong hawh a, ciah hun cih bang na thei kei hi. Na pa te lung kham in hong kan uh ciang kei kiang ah na om lam thei uh a, mun dang kan nawn lo in kei kiang ah hong kan pah pah uh hi. Ka innveng vuah na lawm te tawh na vak ciang na aw ka zak theih na ding in na aw na sang sak a, a ngaih thei thei in na pau hi. Innveng te in na lawm nu aw hi ei hong ci uh a, ka zak lohkhak ding a cih man un hong gensawn lai uh hi.

Zanah pi ka teep ding ciang in kei zong khat vei teep khat bek bek hong teep sak in na ci hi. Zanah a duh na hi kei a, ka zanah teepding pen nang na nuam tuam a, tawm khat ta na teep nuam sese hi. Zu ka dawn ciangin zong kei zong hong dawn sakin nong ci a, a duh lo pi pi in a dawn dan na ki neih hi. A tak tak in nang pen zu a dawn thei lo na hih lam ka thei hi. Zu ka kham ciang in midang te muh na ah ka et lawm loh ding nong deih kei a, hoih tak in nong kem hi. Zusai pan in ka inn uh ah nong kha a, ka lup na dong ah nong pai pih hi. Ka khedap nong suah sak a, ka khe zong tui tawh tawmkhat nong sil sak lai hi. Hoih tak in ka lup na ah nong lup sak khit ciang ka inn pan un na ciah a, tua zawh nai 3 khit khawng teh nong pai kik a, ka dawn ding tui lim no no nong puak lai hi. (Zolai khantoh na ding deih na leh Zomi Khangno te in laisim na lawp na ding uh deih na tawh nungak leh tangval thu kong gelh hi) Deih Tung