Ka sunga om Mawhna hi (Rom. 7: 20)

Ka sunga om Mawhna hi (Rom. 7: 20)

Ka nuntakna ah mawhna a bawl kei hi nawn lo cih thu tawh kisai (It is no longer I who do it, but sin that dwells within me – Rom. 7:13-25)

Gal: 2:20na “Kei a nungta hi nawn loin ka sunga om Jesuh a nung ta hi” a cih ciangin Paul in a mihing hihna a beitum mang pah cihna hi lo hi, ci-in ih gen khitna thu kong phawk sak nuam hi. Ih pianlui ngaihsutna le lunggulhnate in hong uk nawn lo, hong makaih nawn loin, ih sunga om Khrih in ong uk, ong makaih ta cihna hi bek hi. Ci le sa sungah a nungta lai nuntakna pen Pasian’ tapa upna sung bekah ka nuntakpih ta hi, cihna hi beka, mawhna gu hangin ih pumpi si thei nawn lo ding cihna hi nai lo hi. Ka sunga om kei hi nawn lo ka hih manin ka hih bangbang ka sep bangbang Khrih ahi hi cih theih nading hi lo hi. Piangthak khatin piangthak pianzia khat bek a neih kul ahihna thu a gen hi a, ahi zongin ih mihing hihna a bei hi nai lo cih thu ih kikum zo hi. Pianzia khat bek kinei hi ta mah leh mawhnei mi mawhna hong kimai sak pa ahihna thu a gen ahi hi.

Tua ahih leh pianzia nih a nei bangdanin hong gen leuleu Romans 7: 13-25na en dih ni. Hih Lai Siangtho mun in Gal. 2: 20na ah a kitel khial thei ahi tua pianzia khat (one nature) thu a tel genna hi a, Gal 2: 20na leuleu in zong Rom. 7: 20na ah a kitelkhial thei tua Pianzia nih (two nature theory) thu a na gencianna hi leuleu hi. It is no longer I who do it, but sin that dwells within me. Ka nuntakna ah mawhna a bawl kei hi nawn loin, ka sunga om mawhna hi ci-in Rom. 7: 20na in a gen ciangin thu-ummite in pianzia nih kinei cihnopna hi lo hi. Gal 2: 20 ah bel pianzia khat bek gen hi. Ahi zongin tua lai mun leuleu ah pianzia khat bek thu a gen hangin ih pianlui pianzia a bei nai lo ahihna hih LStho mun nih gawm khopna tungtawnin a kihanthawn nuam hi hang.

Nih kikal sungah a om ih hih hangin a khat pen ih pianzia ding hi nawn lo hi. Hih Roman 7: 20na ka nungtakna ah mawhna a bawl kei hi nawn loin ka sunga om mawhna hi a cih ciangin mawhnei mi pianzia le piangthak pianzia nih kigawm mihing hi hang, a cihnopna hi dek suai lo hi. Ka bawl bangbang ka sep bangbang kei hi nawn loin ka sunga om Khrih hi, mawhna cih bang om nawn lo ding hi cih banga, Gal 2: 20na mun ih up ih san khialh loh ding thupi hi. Ka bawl bangbang ka sep bangbang kei hi nawn loin ka sunga om mawhna hi, ci a Romans 7: 20na zong ih tel khialh ih pomkhialh loh ding thupi hi.

Romans 7: 13-25, hih LStho mun pen a piangthak khinsate thu tawh kisai Paul in a genna hi ci-in Christian upna guipi a tamzaw hi pom uh hi. Ahangin, 1. A laigelhzia ah Paul in Present Tense tawh gelh ahih manin ama’ pianthak khit ah a tuahzia thu a gen hi. 2. Thu um lo mite’n thukham zuih nopna lungsim nei lo uh hi. Ih Lai Siangtho mun ah thu genpa in thukham zuihnopna lungsim nei hi. 3. Keimah “I” cih kammal le si le sa “the flesh” cih kammal kilamdanna thu kimu thei hi. Nang pen na si le sa tawh na kikhen theih nai loh hangin na si le sa’ neihsa na hi nawn kei hi. Ka sunga om mawhna hi vs. Ka sung a om Khrih hi. Na sunga om mawhna pen Dawimang pa a nusiat siat ta hi cin a, Nangmah taktak pen na hih leh na sunga om Khrih tawh a kithuahtuah ta a hi hi. “I” vs “the flesh”. 4. Hih lai gelh pa in Pasian thukham sungah nop a sakna kimu thei hi. A zuih zawh sitset loh hangin thukham iplah mahmah hi. 5. Pumpi ci le sa pan suahtak siangna pen hong tung lai ding ahihna zong kimu thei hi. 6. Thu hoih le thusia, si le sa le kha nuntakna a kibuanbuan lai ahihna thu zong kimu thei hi. 7. Christian te pen Khrih sungah diktang khinte ih hihna, thumaan mite ih hih khitna, hi mah ta leh ni tawp ni hong tun masiah a kicing siang nai lo, a gen bang lai ih hihna thute hong kimu thei sak hi. Tua hi a, Paul in ama’ tuah thu le piangthak mi khempeuh in zong hih bang pianzia a tuah lai loh a phat mawhna thu a gen ahi hi.

Christian te pen mawhsakna thukhenna pan Jesuh ih upna hangin a suakta khinte ih hi ta zongin ih sungah mawhna teng lai a, mawhna in hong nawngkaai sak lai ahihna kimu thei hi. Christian/piangthak/ thu-ummite khempeuh in Paul mah bangin ih mawhna hangin Pasian thumaanna le dikna ih ni sim nuntakna ah ih tukpih zelzel laina kimu thei a, ih kidop ding, mawhna ih thahthah lai ding a kisap laina le thungetna, a picing nuntakna le a khangcing nuntakna Christian life ih kisapna hong kimu thei sak hi. Mawhna ii gu a buai pih lai hi hang. Paul in tua buaina panin ih Topa Jesuh in hong honkhia zo ding ahih manin Pasian tungah ka lung a dam hi, ci-in a lai gelh na khup hi. Kei’ omzia taktak ahih leh ka lungsim tawh Pasian’ thu ka zui a, ka pumpi in mawhna a piang sak thu a zui kha zel hi, a na ci a hi hi (v. 25).

Ong tankhia pa in khatvei sep a tawntunga kimang a bucing hotkhiatna ong pia khin hi. Eite’ behlap theih bang mah om nawn lo hi. Paul ii laikhak dangdangte ih sim ciangin Christiante ih dinmun pen a beisa, tulaitak le hong tung ding pan hotkhiatna a kisamte ih hihna ong lak hi. Salvation from the Past, Salvation from the Present, Salvation from the Future. Pa in teel, Ta in tan, Kha in gum hi. Tua teng kigawm hotkhiatna hi. Thu ummite pen hong kihonkhia khin, hong kihotkhiat laitak, hong kihonkhia siang lai ding dinmun ah a om ih hihna hong kimu thei sak Romans 7: 13-25na ahi hi. Kam dangin gen lehang thu-ummite pen hong kitankhia khin (look back at the Cross/Justification), hong kigupgup laitak (Christian life/ maturity/ prayer/ sanctification), hong kihonkhia siang lai deuh ding (the future/ the Second Coming of Christ/the consummation) cihna hi.

A hi khin hotkhiatna “the already aspect of salvation” le ahi siang nai lo hotkhiatna “the not yet aspect of salvation” zia tawh Paul in a laikhakte gelh hi. Ahi khin hotkhiatna cih ciangh thu-ummite pen hong kitankhia khin cihna hi. Ahi siang nai lo hotkhiatna cih ciangin Jesuh Khrih ong pai kik nading a gen ahi hi (that believers will be saved ultimately and for all eternity at the return of Christ.
I have been saved. I am being saved. I will be saved yet. Justification=> He has been saved from the guilt of sin (Eph. 2: 8). Sanctification=> He is being saved from the power of sin (1 Cor. 1: 18). Glorification=> He will be saved from the presence of sin (Acts 15: 11). Tua ahih manin Christian te pen a hi khin hotkhiatna le hong tung laiding hotkhiatna kikal sungah a om lai ih hihna thu kitel huai pha mahmah hi.

Ih sungah ahong om lai mawhna koici bangin that ding?
Khatna ah, ci le sa tawh hi loin Kha zia tawh kalsuan nuntakna tawh thah ding ahi hi. Nihna ah, ci le sa nate’ tungah ih lungsim kinga sak nawn loin Kha nate tungah mitsuan nuntakna zia tawh hi ding hi (Rom. 8: 4-5). Kawlgam ah a kimu thei nate tam mahmah ah, khual zin lehang muh nading a lemna mun khempeuh ah taattung kimu den hi. Tua ahih manin Lai Siangtho in muhna tawh hilo upna tawh na ci hi. We walk by faith, not by sight (2 Cor. 5: 7). Note: a up huai lo thu upna pen upna kici lo hi. A buaihuaina khat ah, a lamdang Pasian’ nasepnate pan’n a uphuai thuteng a uphuai lo a suah mi tam mahmah ta hi. Thumna ah, ih sungah ong tendeen Pasian’ Kha Siangtho ompihna tawh ih mai ih nawt ding ahi hi (Rom.8: 9, 11).

Evan. Suang Dal