Ka Siamsin tuanglam ~ Dal Sawm Tung

Ka Siamsin tuanglam ~ Dal Sawm Tung

Zomi Siamsin kipawlna-Myanmar thukhun ah “Siamsin” cih kammal in gam-uk kumpite ciapteh pilna bulpi (Basic Education) zo-in lai tansang pilna asin ngei, asin lai le azo khin Zomi khempeuh huamsak hi. Lai tansang pilna asin Siamsin khat ka hihna tawh ki zui-in ka Siamsinna le Zomi Siamsin Kipawlna ah ka kihelna hanga ka ngah hamphatna pawlkhat kong hawmsawn nuam hi.

A mawkna ahi lo Siamsin Maithak Muakna le Excursion

2014 – 2015 laisin kum in Geology major tawh Kalay University ah pilna sang sin ka kipan hi. State sang ka kah lai-in University sangnaupang cih pen “lawm le gualte tawh gualnuam takin lengkhawm zilzial-a laihuan nai ciang bek-a lai-et tawh zong lai ong uh” cih ka thei kha ngei hi. Kum khatna asim ding hi pan ka hih manin ka muhkhak le ka theihkhak nate kei ading athak vive hong suak banah tua bang gamtat nopna lungsim zong ka nei pah hi. Khan zong lut mello in, lawm le gualte tawh gualnuam takin hun ka zang-a ka gamtatzia le Siamsin zia aman ding le ahi ding mah ka sa kha hi.

Nikhat khan sungah lai-en in ka om laitak, ka tutpih ka lawmpa hong pai-in a ip sung pan laidal neu khat hong la khia-in hong pia hi. Tua laidal tungah “Zomi Siamsin Kipawlna – Kalay University Fresher Welcome & Excursion” cih lai kigelh hi. Laidal hong pia ka lawmpa kiangah Zomi Siamsin Kipawlna tawh kisai ka theihnop teng ka dong pah a, pilna le siamna asin Zomi sangnaupang khempeuh a huamzia le Excursion paina i thupit zia ama theih khak tantan hong gen hi. Tua bang teng tawh Excursion zuih theih nading ticket lei-in zuih ding ka khensat pah hi.

Khat le khat ki-itna om

Siamsinten laisin kum khat hun sungah activity khat in aneih den uh ahi Fresher Welcome & Excursion pai thei ding ka hih manin ka lawp mahmah a, bang puan silh ding bangci kizem ding ci-in lim ngaihsun lua-in zan bang ka ihmu thei kei liang hi. Ticket tungah kingak nading mun nga bang kigelh in tua lakah kei tawh a kinaipen na mun ahi Chin Taung Tan Tahan Car Gate ah zingtung mah in ka lawmte tawh ka ngak pah hi. Mawtaw in tai 9 pan mi hong zawn suksuk ahih manin hong zekai sim pian hi. Mawtaw hong tun lian leh kikahto henhan pah-a “pasalte a tungkhum ah nungakte a sungah” ci-in makaite hong awng ziahziah kawmkal ah mawtaw kham thei nungak pawl khat anung lam pan hong kahto sim veve hi. Tua bangin ei tumtek ah tutna ding a zongzong tawh anuai pan a-awngawng tawh khuai lal kibang liangin kiciak ziazua hi. Kei zong a tungkhumzang amai lamah ka tusuk pah hi.

Ka lampi uh sau lua ahih manin ciamnuih bawl in a ciakciakte lah ciak zo nawnlo a nuinuite lah nui zo nawnloh banah zingsang kiallap khamtak kine manlo tek ahih manin ka gil uh hong kial tek hi. Moh neiten amoh uh hong lakhia in hong hawm diamdiam-a moh a om sunsun teng ne khawmin gilkial ka do khawm uh hi. Hih banga khat le khat tungah deihsakna le itna lahna in Zomi Siamsin Kipawlna i manphatna hong telsak semsem hi. Nuihciam lel khawm kik-in gualnuam takin Excursion pai nading mun ka tung thei uh hi.

Fresher Welcome & Excursion paina mun ah maithak muakna, deihsak thu genna, pil tungtuangte pahtawipiakna, kilawmtatna, taangpal & liapal kitelna le makai thak kitelna cih bangin hun gelna om toto ahih manin thupi ka sa mahmah hi. Makai thak kitelna ah mipi deihna mah bulphuh in metang (Vote) mah tawh kitel bek thamlo telcing Siamsinte tung pan a kitelna tungtawn in amau ngaihsutzia genkhiatna hun zong pia uh a, Democracy ki-ukna tawh a kalsuan kipawlna khat ahih lam ka muh khak ciangin hih kipawlna ka zahtakna le thupi ka sakna hong lian tektek hi.

Midang tawh kilawmtatna ngah

A kham a zaang pan pil sinna sang khat ah a kahkhawm Siamsinte hong kimukhawm sak bek tham loin khat le khat hong kilawmta sak ahih manin Zogam mun tuamtuam pan pilna lunggulhna tawh pilsin dingin hong pai Zosuante ading nopna, dahna ah koh ding sanggam tampi anei suak uh ahih manin hih Siamsin nasepna pen amau ading manpha kasa diak hi. Hih Fresher Welcome & Excursion in ka minam itna hong liansak semsem bek hi loin Siamsin nasepnate ah kihelnopna lungsim zong hong nei sak toto hi. Siamsinte kilawmtat theih nading Siamsin maithak muakna le kilawmtat nadingin letmat khat Ks. 3000 bang ka piak khakna zong kisikna om loin man nei ka sa mahmah hi. Ka Siamsinna tuang lampi ka ngilhmawh ding thu khat hong suak hi.

Zomi namni, Khuado pawi, Siamsin Mangpha khakna cih pawipite hong tun ciangin Siamsin min tawh nasepna tuamtuamte ah ka hih theihzah in ka kihel-a tua ka kihelna hangin lawm hoih lawm pha tampi ngah in mipil,misiam, mihaute tawh kithuahkha ki khawlkhawm in amau mai-ah omdan, khawldan le paudan ding zong hong makaih Siamsin makai masate tungpan sinkha in tampi ka theih lawh hi. Siamsin sung ka kihel kawmkawm mah-in ka lai zong ka hahkat-a nuam takin kum khat na ka zo thei hi.

Kum nihna ka sim kum-in ka sangkah pih, kum khatna lai-a Excursion Ticket hongzuak ka lawmpa tawh Siamsin sungah ka kilimhel phadiak uh hi. “Lawm hoih neite lawh cing” cih paunak a-om mah bangin Siamsin sungah pilna laitan lam,kampau le gamtat luhek zia ah ka et-teh theih ding Siamsin makai lawm hoih khat ka neih khak manin makaih zia le gamvai thu le la tawh kisai pilna tampi ama tung pan kangah hi. Laigelh siamten “Ka lawmte lawm zong kei lawm mah hi” acih mah bangin Siamsin makai ka lawmpa lawmte makai luite, Siamsin senior le Siamsin advisor-te tawh zong lawmta bangin ka ki meltheih uh hi.

Kum khat sung Siamsinten nasep pi in aneih den uh ahi Fresher welcome & Excursion, Zomi Namni, Farewell, Universities-Kalay (ZSK-KALAY), Universities Myanmar (ZSK-UM) activity-te le ahun zui-a local pan a kisem activity tuamtuamte ah zong lawp takin ka kihel hi. Hong makaih Siamsin makai masate mah bangin Siamsin sung bek ah bual loin sang lai zong hanciam takin ka sin-a kum nihna kum-in Honours (piltungtuanna) tawh gualzawhna kangah hi. Hih banga pil tungtuang cih hamphatna kangah theih nadingin hanciam nopna lungsim hong guan ahi ka Siamsin makaipa pen ka siamsinna tuang lamah lamlak khat hong suak hi.

Deidanna lungsim a neilo Siamsinte

Nampi namneu, ngeina kampau, biakna/pawlpi tawh deidan na a-omlo kipawlna ahi Zomi Siamsin Kipawlna ka theihkhak le ka kihelkhak manin ka angtang mahmah-a ka pai nana ah a thupitzia, haksatna tampi tuakkha mah tase leh lung kihualtak-a mapang khopziate ka gencim thei kei hi. Tuni ciang dong Siamsin nasepnate ah lawptak le kipak takin ka kihel-a beina, supna le unau tanau innkuan sungah haksatna tampi zong ka tuakkha hi.

Ahi zongin lungkim tak-a i sep ahih mah bangin i ngah khak a manpha mahmah Experience te i theih khak thu le late hang in kibeingam in kisum ngam hi. Sum le pai tawh a kilei thei lo lawm le gual, midang tawh kizopzia le a kibang lo ngaihsutnate san theihna ka ngah manin manpha ka sa mahmah hi. Sang manin kumpi nasep le nasep khat peuhpeuh ah sep ding ciang hih Siamsin Kipawlna pan kangah pilnate in nasepnate ah molhtum khat bangin zat theih dingin zong ka lamen hi.

Ka Siamsin Tuang lamah lungkham haksatna lummei bang hong kai-in huihpi bang hong nung-a ka tuanglam khimkhua bang hong zing hun ciang ka Siamsin pih sengualte le Siamsin makai masate tawh lung kikhat in mainawt-a ma pankhop ciang tua lungkham haksatnate meibang hong theng-in lungnop tawldamna huihkhi hong nung hiauhiau hi. Sepkhop, ma pankhopna in khat le khat ka ki-itna uh hong lian semsem bek hi loin tuahkhak hatsatna tuamtuamte pan pilna tampi ngahin hampha ka kisa mahmah hi.

Siamsinna tuang lampi ah asuk ato lam haksa khempeuh Siamsin pihte tawh khat le khat khut kilen-a kantan in kalsuan khopnate in ka Siamsin tuanglam hong ngil sak ban ah mailam saupi ka masuan ading sum tawh khek theih loh ahi mite tawh pankhop theihna le thu ngaihsut theihna pilna tampi hong pia hi. Tg. Dal Sawm Tung, Geology, H-2 Kalay University