Ka Phawkphawk Thu Khat ~ Pu Thangboi

Ka Phawkphawk Thu Khat ~ Pu Thangboi

2000-2004 kum sung India gam Bangalore khuapi ah LST sang kakah lai in H.T Sang Liana kici khat minthang khe mahmah hi. Amah pen palik lam ah alianpen hi a Mizo kampau khat ahi hi. Thuman in citak ngiat ahih man in kizahtak in minthang vangvang hi. Azi in azum mawtaw ama’ phalna omlo pi in nazang kha ahih man in mansak ziau hi. Tua dan a thuman citak mi khat hi

Khat vei ka classmate Kachin te khat khuasung a Brigade Road ah sumbukpi khat ah avak laitak avan khat uh nawk kha ahih man in Rs 500 na liausak hiau uh hi. Tua lai in Rs 500 pen tam mahmah hi. Ong tun teh na salua mahmah in ong thuum ngaungau a kasum ong ngetkiksak in cimawk hi. Kei zong paipih vingveng in asaineipa’ kiang ah “Asum piakik zaw ding na hiam Sangliana tawh kimu nuamzaw na hiam” ci’n kasalh leelaa leh asum piakik khiankhian bilbel hi

Tua zah a vang neikhat hi. Amah pen BJP party pan kitelna ah dem in telcing hiau hi. BJP party ah alut lam akitheih ciang in mi tampi in mawhsak hi. Akimawhsakna ahang pen BJP in Christian te leh minam neute hong simmawh hi ci’n ki ngaihsun ahih man hi.

Kitelna ah alutma deuh in kasang vuah hong Pai in thu hong genna ah: “BJP party sung kalut teh ka upmawh ana bang hetlo na tam mahmah ei. Mithat misualte a ka ngaihsut ngei hiven amakaite bang uh mi athat gen thadah miksi nangawn athat ngamlote nahi mawk uh” ci hi.

Tulai thupiang tuamtuamte in hihpa’ thugen Hong phawksak mahmah hi. Na khatpeuh ih gal ngaihsut nabang hetlo mah hi. Mikang te’n “Don’t Judge A Book By Its Cover” acih uh tawh kibang kasa hi.

Mihingte in ihgupte’ thu ki hoihgen nuam in ih muhdahte’ thu ka siatgen nuam deuh hi. Lungdambawl tawh kituak in Pasian’ itna in Hong tuamkim henla tua itna ih nuntakna sung pan luangkhia ziahziah ta hen. (Facebook ki enthei mengmeng lo hi. Ong kidawk laitak Kong gelh samsam hi) Shalom to you all. Lungdam, Mung Laan Thang (Tonzang, Zogam)