Ka Pa tungpan kasinkhiat Thupawlkhat ~ Carey Suante

Ka Pa tungpan kasinkhiat Thupawlkhat ~ Carey Suante

Amasa in Happy Father’s Day! Zomite in zong pate manphatna thei leh pawk in i omna ciat u’ah Pate Ni lawmin i pate uh i pahtawi uhi. Pawlkhat in a pate uh card pia in, puanthak pia in ahizong in, restaurant ah nitak annekpih zong om kha ding hi. Pate tung ah lungdamna lak in amau tuni ciang hong gualzawhpihna uh thupi sim in a pahtawi i om kha ding hi.

Ke’n tuni tua bang in ka pa ka itna, a tung ah ka lungdamna ahizong in ka lak thei nawn kei hi. Ahizong in, tuni tan in leh mailam ah zong ka zat tohtoh ding ka pa tung pan ka sin thu pawlkhat hong hawm in ka pa ka pahtawi nuam hi.

Na Upna Sihpih Ngam In

Leitung ah mihing khat peuh in ei deihna ciat i nei tek hi. Ei lunglut leh vei tuam tek i nei hi. Mite’n hong deihsak man in a tuamtuam na sepna ding, na neekzonna ding tuamtuam hong genpih, hong kuppih kha ding uhi. Mi cih peuhpeuh “aw” na cih den leh na lawhcing kei ding a, na lawhcing (hauhna leh za hoih na ngah zong) na lungkim kei ding hi.

Tua hi a, ka pa in a Gumpa leh Honpa Topa Jesu nungzuih ding a khensat in, haksatna tampi tuak hi. A sanggamte in deihsakna tak tawh, “Pasian na sep ding thupi a hih tei hang in, ei innkuan ah nang bek laithei na hih ciang, kumpi officer khat hong suak in, na innkuanpihte hong laamsang, hong makaih leteh hoih ding hi”, ci uhi.

Ahizong in, ka pa in a nuntakna ah lunggulhna khat bek nei a, tua pen Topa na sep ding bek ahihi. Ama gam leh mipite a ding nasep telzaw in, tua mah bang in a nuntak sung teng Topa nasem in hauhna leh minthanna zong lo hi. Kumpi nasepna zong amah tawh kituak na ngah ngei hi. Ahih hang in na zomlo in, a upna sihpih ngam in Pasian na sem hi. Sihpih ngam ka cih ciang in, sihna bek hilo in, mindaina, zawnna, haksatna, sanggamte hawmthawhna tuak ngam cihna zong ahihi.

Tua hi a, hong sihsan ciang in midangte bang in neihsa (inn leh lo, sum leh pai) bangmah hong nutsiatlo a, a upna bek mah hong nutsiat hi. Lawhcinna i deih leh mite’ mitciip liang mah in i hanciam ding kisam hi. Ka pa a hauhloh hang in mihau tampite zin zawhloh na gam tuamtuam ah va zin hi. Leitung buppi in hong theih pih kei zong Zomi sung ah makai khat in hong kiciamteh sak hi. A lawm a gual in khuapi lianpipi ah inn 3-4 nei in, car hoihpipi 4-5 a neih uh hang in, ama’n englo in lungkimna nei thei hi.

Kamtawm le’ng, Kipau khiallopen

Ka pa pen kam tawm mahmah khat ahihi. Ahizong in ama lunglutna khat peuh genpih kha leng a tawp pak thei zong hilo zel hi! A kisamlo thute gen nuamlo a, mi heh nading thu gen utlo hi.

I Nuntaksungteng Siamsinna beilo

Ka pa’n 1993 in MTh hong sin kik ciang in mi pawlkhat in, kisam salo in, teek nung vuai nung in laisim kik kisam kei si e, ci uhi. Ahizong in, ka pa’n MTh zo in kum 10 val zang man lai hi.

Tua bek hilo in, CBA pan a sepna ah voluntary pension la in Shillong ka peem uh ciang in 1997 kum in M Phil North East Hill University ah hong sin kik leuleu hi. Mi’n lamdang sa in a dot ciang un, ama’n nui kawm in,”Khangnote ka hanthohna hi e!” ci zel hi.

A gennop pen i nuntak sung teng lai hi in, siamna khat peuh zekai lua, hun nawnlo cih omlo a ci nuam ahihi.

In loving memory of Rev Khup Za Go, who tirelessly fought for and exemplified his beliefs and principles through his life, in the spirit of Father’s Day celebration all over the world. Carey Suante (Khup Za Go family 1980s)