Ka Pa Nungsangah Hong Kitutpihnate – 2 ~ Hau Za Cin

Ka Pa Nungsangah Hong Kitutpihnate – 2 ~ Hau Za Cin

2. Kawlpi Ah

Ka pa luang hawm han a tanni in Tedim pan Kawlpi zingsang in ka delhsuk uh a, Tahan ah ka ni Nuam Ngaih Cing kiangah khawl uh hi. Murlen ah vuina hun a kibawl laitak tawh kituak in ko zong Tahan ka Ni Cing (ka pa nuai a lian, unau 5 lak pan a thumna) inn ah Phawkna leh Khakna Hun ka zang uh hi. Ka pate unau: 1. Nem Za Ngai, Aizawl 2. Pum Do Lian, Murlen, 3. Nuam Ngaih Cing, Tahan, 4. Zam Luan Cing, Lamka, 5. Siapi Khai Za Dal, Murlen ahi uh hi. A ute gel paizo a, a nau teng thum damlai uh hi. Ka Ni Cing kiang ka pai uh ciangin amah zong na dah mahmah in na lungzuang mahmah ahih hangin veng leh pam, u leh nau, pawlpi mite in na tutpih in na hehnem uh ahih manin a lungleng khuangaih nuamtuam dingin ka um hi.

Sia Job Thawngno in khamuanna leh hanthotna thu hong gen a, Upa Vial Khan Do in hunuk in a paikhawm mipi khempeuh lak pan a ut khempeuh in ka pa ka phawkna uh ka gen uh hi. Upa Ngo Khua Nang in ka pa a neulai pan a theih ahih banah a tangval, a zi neih ban ah a vai thupi khempeuh ah haitawi ahih na thu gen in a it mahmahna hangin a thu nangawn gen hoih theilo in kidikdik hi.

Ka Ni Cing in zong a u Lian a phawkna thu gen in amah tawh hun nuam tampi a zat banah mailam ah hun nuam zanga kimu lai ding a lamet laitak hih bang hong pian pen thuak hak a sak dan zong gen a, vantungah bel kimu kik ding hi hang ciin Christian kikhamuanna, lametna tawh kihehnem hi.

Kei leh ka zi Vung Deih Cing in zong ka pa ka phawkna uh, ka itna uh gen in cidam a kimu kik ding ci a ngaihmuanga ka om laitak vua hih bang thu hong pian vat haksa ka sak dante uh ka gen uh hi. Ka nupa vua ka ciah lai un Vapar pan hong dawn in Vapar khuakhung ah Sapthei (Mangthei, Passion Fruit) tampi min euau a ka pa in hong lawhsak in ka nek ziahziah thute uh ka phawk uh hi.

Sapthei tui a um hong bawlsak in ka ne uh a, a Grape Huan ah hawh in grape kungte ka en uh hi. A huan bawlna sungah Apple, Avocado, Nahtang, Linguih, Kawltu, leh a dang tampite ka vel khop uh, ka nek khop uh banah Aizawl pan hong pai Pa Suak Khaw Gin makaihna tawh itna late sakhawm in zanhak a hun nuam ka zatte uh ka phawk uh hi. Tua bang hun nuam zangkik dinga kilamen laitak hih banga thu hong pianvat pen mihing lam pan ngaihsut in hamsa mahmah hi.

Hong nusiat dan:

Ka pa pen 26 April 2015 Nipini zingsang kikhop kihkawm khin in sun kikhop pen Numei kikhop hi a, amau inn ah ka tute khat Pa Khai Lam Sang Buansing s/o Pa Nang Ngaih Lian Buansing tawh King kineih uh hi (Chess kimawl). Anih tuak un a khut veilam uh tawh a kha uh dom in kun uh a, kuamah kienlo in a King kineih uh en gega tuak uh a, amau khin hun in a khin zel uh hi. Ngavei bang a kimawl khit uh ciangin nitak nai 3pm bang satta hi. A zom a kimawl uh, ka pa khin hun a tun ciangin khinlo in a lusu bangin om a, Sangpi in, “Pu Do, nang khin hun hi,” ciin a hopih hangin dawng tuanlo hi.

A liangko pan sawn in a phot hangin dawng tuanlo a, a veilam khut tawh a kha mah dom in kun hithiat a, nak ngeina in nak hi. A lawn hang phawnglo cih pen lamdang sa in tutphahsau tungah lumsak a, a photphot hangin tho tuanlo, dawng tuanlo ahih manin hu mop in a awm sawn (CPR hih) a, bangmah kilamdang tuanlo hi. Murlen a compounder Pa Khup Dal Suante sam uh a, amah in zong a bawlbawl hangin bawl zo tuanlo in 3:30pm ciangin a hu damdam in kiam a, a khutdawh mangin a nuntakna in hong beisan ahi hi.

Lamkhat pan in natna thuak hetlo in hong beisan hi a, tawldam in a ihmu suak ahi hi. Leitung ngak ding omlo leitung mihingte adingin sih nuam ahi hi. Ahi zongin hong dampih lai henla, hong ompih lai in kikhawl in kiho in, nuihciam lel lai lehang cih lunggulhna leh deihna koh a paisan a tate, a innkuanpihte adingin bei ngeilo hi. Vantung pa kiangah kimuh kik mateng sim leitungah bel a kimu kik nawnlo ding kihita hi.

Kawlpi ah tam sung mah in Kawlpi Tuiphum Pawlpi pastor Sia Kathawn in hong delh in ka sungh te inn ah hong tutpih a, thungetna leh hanthotna kicing takin hong neihsak leuleu hi. Ka kisapte hong vanpih in thu leh la tawh hong huai lailai ahih manin ka lungdam mahmah hi. Amah pen ka zite pawlpi sia hi in Senior Pastor Sia Haupu omloh hangin pawlpi siate in hong nusia hetlo in hong van uh ahi hi.

Zomi Youth Association (ZYA) te in zong hong delh in hong tutpih uh a, makaite a om thei tengin tutpihna leh dahpihna thugenna, thungetsakna hong neihsak uh hi. Sia Pauno, Sia Tuang, Sia Dopu, Lia Sannu ban ah a dangte zong hong kihel thei uh ahih manin ka angtang mahmah hi.

A zak phetphet vua hong delh Rev. Vung Suan Kham (Sia Khampi) te nupa, Dr. Thuam Khan Suan te innkuan, Siapi Cin Lian Nang, Township Education Officer te innkuan tungah zong ka lungdamna lian mahmah hi. Ka giahna uh Hotel neipa Pa Lianpu, Chin Tawng Taan in zong a kisam bangin vanleng ticket leh giahna ban ah galna sum nangawn hong pia ahih manin Zomi te i ki itna Vaphual lim suun lai hi hang cih ka phawk a, ka lungdam mahmah hi.

Ka kisapna khempeuh ah hong van ka sunghte Pa Thang Cin Khup te innkuan, Pa Cin Lian Thang te innkuan, Nu Vung Hau Dim, U Cing Lun Niang te tungah zong kama gen zawhloh lungdamna ka pulak uh hi. A kisam banga zat dinga mawtaw hong zangsak Pa Gin Lam Cin te nupa tungah zong ka lungdamna uh ka gen uh hi.

Mimal a hong hopih, hong tutpih, hong delh, hong phawk a hong thungetsakte khempeuh — min ka gelh kim theihloh khempeuh tungah zong lungdamna lian mahmah hi cih nong theihpih ding uh kong thum hi. (zop lai ding) Hau Za Cin