Ka nu khetul puakkham leh ka pa pheituamtaw kithuap ~ Deih Tung

Ka nu khetul puakkham leh ka pa pheituamtaw kithuap ~ Deih Tung

Ka nu leh ka pa kikal ah zan ciang in ka lum a, khuadam mah mah ta leh khuadam lam kaphawk kha kei hi. Ka nu in a ang ah hongpom tinten a, khualum ka sa mahmah hi. Kei a khop in midang te ka eng kei a, kuama nuntak na ka phawk kha kei hi. Ka nu a khe a tonciang in kakhetul uh khatveivei ki sukha a, ka nu khetul in hong kiat phampham in lamdang kasa hi. Khat veivei ciang in ka nu khetul puakkham in ka puanza teng uh zialmang thei a, ka pa bang heh mah mah thei hi.

Ka nu khetul puakkham in hong sukkhak vat ciang bang in ki lau man liang hi.Ka nu khetul puakkham pen banghang hi mawk hiam? Khuahun vot luat manmaw? Khua hun ka mawhsak ding hi. Banghang hiam cih leh ka nu in khedap hoih lei zo lo a, a khe puakkham te na ngawn sathau nuhzo lo lai hi. Ka sum neih loh uh leh ka pa ka mawh sak kei a, khua hun ka mawh sak hi.

A taktak in khua hun zong hi tuan lo a, sum ka neih loh man un a hi ta zen hi. Ka nu khuasung a vak ciang a khetul puakkham in siluang a, pawlkhat te bang in nin anei sa thei lai uh a, ka nu mai zum thei mah mah hi. A taktak in khetul puakkhampen khedap hoih neihzawh loh man a hihi. Khedap hoih bulh in sathau zut zo peuhleng khetul apuakkham zong in phalbi sung bek khawng hi sam a, ahi zong in ka nu a pen dam hun nei thei nawn lo hi.

Nipi ni sun kikhop man khit ta ciang in ka pa in phimleh khau tawh tutna khat la a, a khedap sia teng khui zelzel thei hi. Ka nu in a hih leh khedap sia khuithei lo a, ka pa in a khui a hihi. Ka pa in a khedap akhui ding teng a man ciang, ka nu hong ki pan leuleu a, ka pa pheituam tawvang teng thuapsak sak mai hi. A pheituam bek hi lo in a puan te zong thuapsak a, ka pa puan te pen a mel taktak bang hiam cih ki thei nawn lo hi. Ka pa in lopuan ding khat bek nei a, puan dang zong haulua tuan lo hi. Ka innkuan un mimalkhat ciang puan 3 ta ka neih uh leh bek hi ding hi in ka um hi. Tua te zong pen a hoih lua hi lo a, a ki silhthei cih ciang bek a hihi.

Khua ah ka om sung in ka lungsim hong sukha mah mah in ka nu khetul puakkham leh ka pa pheituam taw kithuap a hihi. Ken lah sum zongzo lo, khua ah sumtha lawh ding ci leng zong nitha khat ciang tul khat hi leh ni pi khat sung bang ka tha lawh ciang khedap khat khawng ki lei zo pan, tua kawmkal ah annek ding ki sam lai, nisim in vaimim cim ki huan, vaimim pen duh pen a hih loh hang mai ngaplo sa in neknek mai in om hi.

Zingsang tho phet in an kisu pah a, suktum a giksimsim khat ki likziahziah pah mawk hi. An pen vaimim cim hi a, an kam lim lo sa in ki ne den hi. Ankam lim loh na pen mehlim om loh man zong a hi ding hi. Ka nu leh ka pa hehpih huai ka sa a, ken lah bangmah ka lawhthei kei hi. Sum nei-in hi leng ka nu khetul phuakkham a nuh ding sathau ka leisaknuam hi.Tua bek hi lo in ka pa pheituam taw ki tuap ka laih sak nuam a, ka laih sakzawh kei phial leh zong a khui na ding phim leh khau beek ka lei sak nuam hi. Khua lam nuntak haksat na te pan in bangcih leng suakta thei ding ci in ka ngaih sunsun a, ka lung a kham hi.

Ka neulai siahsiah a hih leh sangkah kah ka hihman in sum ka zongman kei a, ka sangsap ding, ka sangpuan ding leh ka kisap tuam tuam te ka nuleh ka pa in hongleisak zelzel uh ahih man in amau a ding bang ki mangngilh liang uh hi. Ka nu khetul a puahkhap loh na ding in khedap hoih a leiding ciang ka sangsum ding ki sam a, ka nu in kei a ding in hong khen hi. Ka pa zong tuadan mah a hihi. Kasang sum ding tawh hong buai pih uh a, ama nasep puan ding second hand na san lei ngam lo hi.

Hihdan dinmun ah ka om om pen kei leh kei ka ki hawmthawh mah mah a, sum zong khia ning ci in ka ki thawi hi.Gamdang pai honglang mahmah a, kei zong gamdang ka pai nuam hi. Sum ka leitawi uh leh 10% a ditkikdingin ka ngah uh a, kei zong Gamdang ka pai hi. Gamdang ka tunkhit ciang innlam a sumhaksat na thei ka hih man in sum hoih takin ka khol hi. Sum khol ka cihsam hang in ka khasum tawm lua a, tam ka ngah kei hi.

Gamdang a ka pai pen ka nu leh ka pa khua leh tui a taisan ka hi kei a, ka nu leh ka pa ading, khua leh tui a ding ci in gamdang a pai ka hihi.A zenzen in khualam a ka nuleh ka pa, khuapih tuipih te, Zomi khem peuh in nuntakna nuamzaw deuhsa in hong ciah ta un hong ci le uh ka ut mah mah hi. A hih kei leh zong sumleh paai kicing nei in nu leh pa, khua leh tui, Zogam a puah kik zo khop ding in sum leh paai nei leng ka ciah baih nuam hi.

Lunggulhna, tupna kician nei a, a hanciam mi ading in hih leitungah a piang zolo ding a om kei hi. Deih Tung