Ka muhpak US Gamthu pawlkhat – 57

Ka muhpak US Gamthu pawlkhat – 57

Mi Pawl Khatte’ Hong Muh Dan
US ah kumpi nasem ahi aa company nasemte ahi zongin pensen lak theih hun (retiring age) pen kum 65 mah in ciangtan hi. Ahi zongin aituam companyte ah a sep nop lai nak leh kum 80 dongdong sem thei lai mawk uhhi. Ka gensa mah bangin, khangham zawhnua aa nasep ka ngah theih lai veve pen ka ki-angtang sak mahmah kawm kal ah, mi pawl khatte in hong muhna dan uh leh hong gal gen dan ka nungzak ciangin, hehpih huai hong sa mahmah leh tudong Kawlgam pan pensen la khinsa hi napi, na semsem lai a kamsia mahmah hi..,a hamsia taktak mah hi.. a hong cici na leng ei sungah na om tuak lai mawk uhhi.

Tua bang aa ngaihsut zawk ding hi peuhmah lo hi, gimpi tawlpi leh sinkham lungkhamna ding mun a nasem bang hi zenzen leng, kei zong ka sem peuhmah sam kei ding hi. Kum 65 val khin tham ta ka hih manin US kumpite kiang pan Supplemental Security Income (SSI) ngen leng aki-ngah thei ta ding ahi aa, tu aa ka tha lawh khasum tawh ki-nakkhaih peuhmah lo hi.

Inn bekbek ah ki-om mawk leh US gam aa om hi lel ngeel bek ding aa, bangmah khantohna om tuan peuhmah lo ding hi. America ka tun phet in, Dahpa Kawl khuang nei hi khong leng, ka kum 20 – 30 khiap theih hi leh ka khiam nuam mahmah hi. Ih theih ngei nai loh ih muh ngei nailoh sin huai theih huai tampi tak om hi. Sum lah ngah lai pilna siamna zong ei laak theih zawh ciangciang kitawtaw thei lai.. ci in nasep ka ngah khak pen kei leh kei tu dong mah ka kipaak peuhmah zaw lai hi. Kei leh kei ka ki-moisuahsakna hong suak kik bilbel hi.

Nasep ih sep taktak ciangin ih naseppih ih lawm ih gualte pen mikangte ahih zenzen hangin, a mau zong mihing mah hi lel ngeel aa, a sawtsawt ciangin khat leh khat ih ki-maingap thei pha mahmah lel hi. Hun khat teh innkuan khat tawh kibang aa kizop theih hun hong om veve aa, om dan khawl dan hong nuam mahmah pah lel hi. Na sem lo bang hi zenzen mawk leng, tua bang hamphatna leh sin khakna a ki-ngah kha lo ding ahihi.
Tua ahih manin khanglai, momno, tuailai, seino tanggual/liagual khempeuhte aw, na lungsim ngaihsutna na tupnate uh ciangtan masa peuhmah kei un la, khanto semsem zaw un. A si ngei lo ding bangin nasem in na masuante uh mapang un. A si ngei lo ding mah bangin thu khualin mailam tute tate khang nadongin ngaihsun kholkhol ni. Ih khuamuhnate leh ih ngaihsutnate tangzaii sak taanzau sak mahmah kankan ni. Lam etna lianpi tawh ih bukmunte ih khantohtoh ding kisam pha mahmah hi.

Ahi zongin zing mah thaii mah ciang a, a si pah ding bangin thu ngen ni. Ih Pasian ap masa ni, ko masa ni. Pasian deihna thukimna om lo leh theih loh kal a, a piang tawm na khat bek om lo hi. Ih Topa’ Pasian mah ki-makaih sak tawntung ni. Ama deihna leh Ama gam zong masa kim ciat ni. ‘Na upna tantan na muanna zahzah kong pia ding hi’ a hong ci Pa’ –ih Pa’ Pasian in ih tupna ih ngiimna ih masuatna ih kungmuii khempeuhte ah, a tawntungin gualzawhna tawh hong dawntuah taktak na-ngawn ding hi.., cih lungmuanna lianpi vom kim ciat ni.

<<< Beita>>>

Agelh: Awn Za Pau