Ka muhpak US Gamthu pawlkhat – 50

Ka muhpak US Gamthu pawlkhat – 50

Zomite Kikhan Tom Thei Mahmah
Ka neu lai in ih Zogamah puteek piteek ka muh masaksak awn khenkhen in lam pai uh a, teipi khun kawm a vak vive ka tam muhhi. Tua bang a khangham khempeuh a kawng a awn pen ih lokhawh singtukna ah ih awn kawmkawm hang hi zaw deuhin ka um hi. Ka cih nopna in khang puteek khempeuh ki-awn kim lo ahih manin ama nasep silbawlna tawh zong kisai mahmah in ka um hi. Hi lamah a awn kawmkawm zong a om tei hangin a tamzaw tang gega mah in lam pai tangtang lai uhhi.

Ei gamah mimal tawm pha mahmah bek teekkut guaikut in nungta uh a, ka neulai aa a si ka theihte papisa zi leh ta neisa, tu na leng a nei khin vive a si ahih tei sam hangin, tu hun ciangin ka nung ngaihsutsut ciang a tamzaw pen 50-60 gual vive a si na tam zaw hi.

Tuate lakah midang ko khan gual pawl khatte in zong hong theihpih ding ahi, Tedim ka sangkah lai mihau masa pawl mawtawpi khat leh Jeep khat tuak anei Pu Dai Pau (A khualui Gawngmual) bang ahauh ziak mahin minthang mahmah aa ka neu thu mangmawh khat ahihi.

Mi minthang ahih mah bangin a sih zong ka thei kha bilbel a, papi zi nei ta neisa sa ahih mah bangin kum tampi a phasa bangkhat a, a si ka sak leh, tukum 2010 kum October kha sungin Tulsa khua a ka lawm Mangbawi (Pa Sian Khan Mang) zi ahi, a tanu nu Niang (Nu Nem Ngaih Niang) kiang ka dot zenzen leh a sih in kum 42 bek pha pan hi hong ci mawk hi.

Tua hi a, tua hun lai in Zomite pen a kikhan sau nai lo taktak mahmah na hi mawk hi. Ka neu lai a papisa khanghamsa sisi ka cihte uh pen kum 45 pan 50 gual kim a pha vive a, asi kitam zaw mai hi.

(azom omlai hi…)

Agelh: Awn Za Pau