Ka muhpak US Gamthu pawlkhat – 42

Ka muhpak US Gamthu pawlkhat – 42

Kamsia – Kampha Koi Munah Zang Ding?
Khat vei ka bangkuapipa tapa Mungno, Vum Suan Mungte nupa inh Tulsa tawh Arkansas gun in hong halna Jenks, OK lamah innthak khat lei a, innteek papi muan khat ka hihna tawh thu genna ka nei hi.

Amah pen sya Cicin (Rev Thawng Khan Cin) pastor sepna Myanmar Zomi Baptist Church (MZBC) ah sumkempi khat ahihi. Sya Cicin in a pawlpi mite a sun a zan ci lo in, akul hun ciangin a kul bangbangin vaan zo in, hunbit in pawlpi mite kisapna buaina atuamtuamte’ a hunlap in panpih den hi. A innthak leina lungdampihna in amau innah pawlpi sia leh upate vaihawm siamna tawh in Christmas lawmh-an neekpih uhhi.

Tua banah Mungno pen khat vei a nasepna pan kisuk khialhna khat ngah kha a, Zato na tung hi. Ko mau theihloh kal mahin sya Cicin in manlang takin akisamteng na vaanin na panpih khin hi. Kei zong ka thugenna ah syapa tung lungdamna ko nuam se lua, ka tapa Mungno pen MZBC ah Pastor Sya Cicin tawh akituahkhak theih zenzen pen ‘kampha’ ka sa mahmah hi, ka cih leh ka thugen a ngaite hong nui ngeiingaii mawk uhhi. Kei zong kitheihmawh bawl in ka thugen ka zom teitei hi.

Kampha cih kammal munah ‘Pasian thupha’ hi, cih ding hong deih uh ahihi. Ken ka zatluat het kei hangin tu lai khangthakte’n a na zanglua uh ahihi. Tua kawmkal ah khatvei ‘Zonet’ hiam aw koi zaw hiam aw khatah, ka theih ngei lo khat in kampha cih kammal Zopau ah om nawn lo hi.. cih dektak khat in lai hong suaksak ta leuleu hi.

Kei zong Mikangten zong luck, lucky, cih kammal zang lai buang hi ven, kamsia kampha cih kammal ih zat nop kei leh tua kammal munah bang kammal zang ding ih hia? ci’n ama ‘e mail’ mah tawh ka kitheihpih ngei hetloh pa mah ka dot kik leh, kamsia kampha munah ‘tuahsia tuahpha’ ih ci ding hi ci in hong dawng hi.

Bangbang ahi zongin ih Pasian upna ih sanna nidang tawh kibang lo in a san siam semsem dingin zong ka ki-ngaihsun a, hi ka sa peuhmah kawikawi zel hi. Ih kammal zat dante zong picing semsem zong kasa a ‘khial hi’ cih giap dingin zong hi kasa tuan kei hi. Tua bang hi leh kamsia kampha kammal pen beisak takpi ding maw ahih kei leh koi lai munah ih zang tam…?

(azom omlai hi…)

Agelh: Awn Za Pau