Ka muhpak US Gamthu pawlkhat – 40

Ka muhpak US Gamthu pawlkhat – 40

A Sih A Nat Uh Ciang In
Kawlgam suahtakna ih ngah ma pekpek in Mikangte laigelhna ah Zomite in misi it thei mahmah hi ci in hong ciaptehsa uh ahihi. Ni dang lai in a tawm pen ni 5 pan ni 11 cih bangin kikoih hi. Haksapipi in khankenh kuasah ih kiguan tangtang hi. La-angh tawh kizawngin si kilamh kawmkawmin lasa in kilam ziahziah hi.

Tu hun ciangin abeisa hun a ih zatte ih zuih nawn loh hangin, tuni ciang dong Zomite in ih sih ciangin itna kilak in si kigal in ih kipha hamtang hi. Khankenh cih kammal ih zat nawn loh hangin, sih zawh man zawh ciangin khankenh kiguat zah mah in, innteek bek hi lo a nei zo a sanggam suahpite dongin, meipum nei ganhing lianpipi ih go leuleu hi.

Cina luna ih gim mahmah ciangin Zato ah cina naak lah liang ding dongin ih umcih ngeiingaii hi. Yangon na lengah Zomite nat kiveh dan pen kim leh pam siavuan siamate in dongkholh hongsa mahmah uhhi. Cina guak koih hithiat a khawlngaksak ding sangsiik in, nat kiveh aa akiang anaii aa kiphak tangtang ding mah ih manpha sak zaw tangtang lai hi.

Hih lamah ei aa’ tawh kilehbulh linlian cih ding ahihi. A ci a lu a nat ciangin a zi a tate lo buang inh kiveh khollo uhhi. A sih uh zong ciangin pastor leh upate, innteekte sap tuamte lo buang si vui hun bawlna ah mi 40-50 kan zong pha ngei lo zaw uhhi. A vui masiah misite innah zong a kisai mahmahte lo buang kuamah dang in kipha lo uhhi. Amau innkuan dah aa khitui naptui tawh om pen mi musak nuam lo zaw uh ahihi. Mi muh lohna ah suakta takin kap nuam zaw uhhi. Kua mah tek kimanlah mahmah kim ciat ahih manin, amau hangin midang khat peuh ii vaii leh hunte a beisak ding ut lo uhhi. Kim leh paam leh mi dangte nawngkai sak nuam het lo uhhi.

Ka kikhopna Harvest Church biak inn nei pa’ Pastor John Wakefield in, lungtang natna tawh dam lo aa hong om vat tak ciangin, zato ah a kah ding leh operation a bawl ding vaii a meeltheih pawl khat theisak khol aa, tua hunsung teng peuhmah thu kong zaksak kik mateng uh, kua mah peuhmah kei tawh kimuh ding hong sawm kei un, ka inn uah hong hawh kei un.. ci zaw bung leh hi.

Tua mah bangin hi lamah sihna bangna a tuah uh zong ciangin hong sap kei ngal leh ei lam bang aa kithukhual sak aa pai ding hi lo hi. A kisam akikho teng bek mah a pai hi zaw uhhi. Khangto lua mahmah ahih manin, ei a khangto mahmah naii lo gamte tawh akilehbulh linlian ih hihi. Hun khat teh ei nisuahna lam gamte zongah tua bang hunte hong tung teitei dingin ka muangmawh hi.

Ei Zomite ih sih ciangin a innah kipha pah ngeiingaii a hun kibawl pah ngekhngekh hi. Innteekte a’dingin ih heh ih dah noptuam takpi ahih manin ahoih mahmah kihehnepna ahihi. A hi zongin a khangto gamte ah mawtaw car vive tawh kipai ahih manin, mawtawte lampi dungteng dim zihziah hi. A veeng a paamte vahna ciahna ding nawng kai sak hi. Amau hih bang dan na zang ngei nawn lo uh ahih manin, sihna dahna ahih hangin dongkholh hongsa mahmah uhhi. Pil vaii hongsa het lo khong uhhi. Tua hi aa ei Zomite zong a sawt lo aa, amau deihna bang aa ih gamtat theih ding ih zuih loh aa phamawh ding hun hong tung teitei ding hi.

(azom omlai hi…)

Agelh: Awn Za Pau