Ka muhpak US Gamthu pawlkhat – 37

Ka muhpak US Gamthu pawlkhat – 37

Nupi Sanggsia Leh Teeksia Muisia
Ih gam ah ih zawn luat mahmah leh ih nasep tam hang’ bekbek mahin zi nei ta nei pasal nei khin a hih nak leh a kuamah peuh ih kipuah nawn kei hi. A diakdiak in numei ta neisa kipuahpuah zong a hoih lo lam vive in kimu thei zaw lai hi. Nawi zu vive tawh a tate vaak ahih manin ta 4 ta 5 hong neih khit tak ciangin, a pasal humhum leh meekmeek sakna akipan, a tate luaihluaihna teng tawh nupi nawi pen a gildung zui in hong kai dipdiap/diapduap ta hi. Uipi khangham tapekhte bangin gawng mahmah leh a nawi kai dipdiap tawh ‘uipi sangsia’ mah hong bang takpi khongta uh hi.

Tua bang ngeiingeii in pasal puteekte zong, a ci a sa hong guai in a teek bek hi lo in a ha teng hong bei hong tok ciangin a muk teng hong meth pah dihdeh hi. A meel a sa zong niiksia puan sia mah tawh kibang ahih manin teeksia a ci, ih hi ta lawmlawm hi. A meel a mang zong nidang zah in mai malh zo nawn lo in siat suah mahmah ta hi. Tua pen a meel a mui sia ta kici aa, tua kammal gel kigawmin ‘teeksia muisia’ a kici ahihi.

Tua hi a, cidam a khansawt a kinuntak tek ding nak leh a kuamah tek in ih phut khak ding din mun vive ahihi. Tua bang hun ciangin a tung a ih kammal zatte in a teek a guaii ih pi ih pute aa’dingin tha ngahna suak lo in a nuntakna uh a tha neem a kiam saksak, alung sim uh a neusak semsem tawh kibang hi. Tua bang kammal ih zat sangin thei gegu mah in khang no meel lai taktak teh, hat lai peuhmah teh na meel zong hoih sansan veh aw.., va ci thei leng a na heh het lo ding uh hi gige uhhi.

Hi lam zongah a tate a tute in nasem in mangg bang ahih manin, kikep kicinna tawm mahmah hi. A hih hangin nupite in nau nawi lim piak lo ahih manin, a tam zaw a teek a guaite nawi zong kaai diapduap lo in tal veuvau lai mawk uhhi. A teek mahmah uh hangin nupa kop ahih kei leh meigong guak mah om uh a, kipuah sitset zo lai mahmah uhhi. Bangbang ahi zongin ei inn lam a, a tute’ a tate’ it theih kep theih aa, teek kut guai kut a nungta te’ mah a hampha taktak mah hong suak hi.

A hi zongin ei khua lam pawl khatte ah, ta numei nei lo tapa leh mote bek tawh kithuah a kamsiate a’dingin, a tu a tate’ a mote’ akipan in teeksia muisia ci in thu sungah koih nawn lo in nawlkhin kha thei uh aa, a khasiat huai mahmah pawl khat om leuleu hi. Kuamah kiang aa lah a gen nuam lo leh a gen ngam lo aa, khasiat muisiatna lianpi tawh ahong sih sanh piteek puteek tam mahmah kha ding hi.

Hih munah ei Zomite tawh teh leng, Kawlte in a nu uh leh a pa uh zahtak bawl pha mahmah uh hi. Ahunhunin a mai ah khuk din in zahtakna pia tangtang uhhi. A nu nawi tui tawh kivak in a nu kepna nuai ah khangkhia ahih lam mangngilh bawl nuam lo uhhi. A gol diak ciangin anu leh a pa’ deihsakna tawh amau neek awl taak awl liangin pilna ki-zongsak hi. A nu leh apate kepnate tawh kizawitawn in, a nu a pa teek mahmah ta se leh, hun khat lai aa, anu leh apate’ kepzia khoi ziate mangngilh peuhmah lo in, a teek a guai a sih dongmah uh it bawlin zahtaak bawl uhhi. Nute pate tungah a khoi a vaak bek hi lo in a kamkhialh khak ding na-ngawn uh kikem mahmah uhhi.

Mi pawl khatte in tua bangin ngaihsun peuhmah lo in leitung ngeina hi. Pasal leh numei ki-iplahna pan a tu leh ta a piangkhia hi lel hi ci aa, a za-angkhai mahmah pawl khat om thei mawk uhhi. Tua bangin ngaihsun mawk leng ganhing tawh ih kilamdanna a om lo tawh kibang ding hi.Mihing ih hihna a manphatna om lo suak ding hi.

Tua ahih manin a kua mah peuh in teeksia guaisia muisia ci lo in, ih piteek ih puteekte’ a nuntaak lai teng ih lim kep mahmah ding tha ih piak semsem ding ahihi. A nuntak lai amm in thu cin thu tang dong in na hopihpih zawh ding ahoih semsem ahihi. Tua puteek piteekte in eite hong kem hong khoi hong vak ih nu ih pa ih pi ih pute ahih lam – ih lungsim sungah ih vom theih den ding thupi mahmah hi.

(azom omlai hi…)

Agelh: Awn Za Pau