Ka muhpak US Gamthu pawlkhat (27) ~ Awn Za Pau

Ka muhpak US Gamthu pawlkhat (27) ~ Awn Za Pau

Zato Kah Mantam Lua – Siavuante Kithupi Bawl Lua
America ah Dr te hamphat dan a kipibawl dan leh, zato kah man a tam dan Kawlgam tawh kikhai lua mahmah hi. Dr te’ letmat lo in zatui kimawk leisak peuhmah lo hi. Zatui lah tam man thei lua mahmah hi. Siavuan letmat lo a ki-lei thei vitamin leh bukkhuh za, sungpuak damna, meimaza cihpiante pawl bek ahihi.

Cina khat pen anatna dan acisa a bilsung a mitsung, a kamsung akisam khempeuh nurse ten tehsak dikdek phot a tua tawh kizui in a tawpna ah siavuante in a kul bangbang in hong en pan hi nek bek hi. Tua ka cih ciangin kiphasak kiliansak hi ka cihna hi peuhmah lo leuleu a, mipil mah din omin thusiam in dik thei mahmah leuleu uhhi.

A buaihuai mahmah sawnsawn lai khatah, cina gim mahmah khat zato kipuak leh, a natna tello, kiciantak a thei lopi tawh zatui pia pah vatvat ngam lo hi. Zun leh sisan mah bulphuh in a natna zong masa uhhi. Tuate tungtawn in natna a muh masak lohin zatui pia ngam lo uhhi.

Ahi zongin a damdam losa, ama natna tawh kisai akisam siavuan lai a tuamtuamte pansan a, a natna tawh kisai a bawl ngam pah leh cih loh, zatui a piak khialh ding a bawl khialh ding kidawm mahmah uhhi. Tua huhau in cina gim mahmah mithakte bang zato a tun hangin, a natna zong phot masa in akician taktak a, a theih a muhkhiat mateng, akisap leh First Aid tawh kisai lo buang, hici koih phot tadih uhhi.

Banghang hiam cih leh cina khat kibawl khial kha leh thu kibawl pahpah ahih manin, siavuante in Kawlgam danin upmawh thu bek tawh sem ngam mahmah lo ahih hang’ ahihi. Human rights akicih den keei mah bangin US kumpi ii policy pen liberal (ta-anhzau, ta-angzaii ) mahmah lua liang a, siavuanpa’ lam pangpan bek ngaihsut sak lo in cina nu’/pa’ lam pangpan zong a etna a ngaihsutna ahihi. Tua hi a, US ah zuih ding thukhun, thu bullet, thu meilet a tam penpenna gam zong ahi pah dingin upna ka nei hi.

Ei Kawlgam a siavuan siamte pen hi lam tawh ngaihsut kakna in a kiallap mahmah khat na hi gige hi. Zatui zaha leh siavuan kilah man zong a tawm mahmah na hi zawzek lai hi. Tua hi a, cidamna lam tawh kisai Kawlgamah zato kah in kilak leng kimanzaw thampek hi. Amau kiangah Medicaid, Medicare or Health Insurance ih neih kei ngaal leh cih loh, Zato ah kibawl man pen kuata’ piak zawh ding hilo hi. Hi lai a gammite’ na ngawn in zong amau gamah sum tam bei lua sa in Thailand leh India zato minthangte zuan zaw uhhi ci’n akigen ka za ngei hi. (azom omlai hi…) Agelh: Awn Za Pau