Ka muhpak US Gamthu pawlkhat (25) ~ Awn Za Pau

Ka muhpak US Gamthu pawlkhat (25) ~ Awn Za Pau

Piteek Puteekte
Tuma kum 40-50 lai in ei kiangah kum 60 a valkhin uham khinsate piteek puteek in kiciamteh in zong hamsuah in guai khin demdam thei takpi mah uhhi. Tu hun ciangin a khangto gam Japan, US, Europe cih ahau gamte ah kum 90 pan kipanin puteek piteek tawh kibang panin kum 80 gual pawl pen teeksuah nailo in na mah sem tangtang lai zen uhhi.

Mikangte pen a lungsim uh lian in khauh mahmah uh a, a sep zawh lai liai nak uh leh kumpi huhna zong la nuam lo liangin sum ngahna ding zongin, a ngap zawh zahzah nasep mah sem nuam hamtang lai uhhi.

Mailamah a kikhel vat kei leh cih loh buang, US gammi khat sum ngahna nei lo, a vak ding om lote, kum 65 a phak khit a kipan kumpite tungah huhna kisiau thei hi. Kei theihna pakah ei mi nupi R khat bang hi lam hong tun lim mahin kum 65 val khin ding hita a, kumpi huhna a siauh leh sumtang $ 733.00 leh Food Stamp or SNAP kici, anneek tuidawn cikhum bawngnawi leina dingin letmat $200 man mah kipia pah hi.

Tua sum ngahte pen SSI (Supplementary Security Income) kici a, bangmah khasum sanna a nei lo, a kem a khoi ding a tu a tate mahmah zong, kumpi in mi zawng ci a, a ciangtan zah (poverty line) sung a lutte bek huhna a pia ahihi. Tua banah cinat lunat na neih ciang a akisam zatui zaha akiman a lei theih na ding hong pia lai ding uhhi. Van man sum man khanna tawh kizui in a sum a kul bangin kikhan toto hi. State khat leh khat zong a piak zah uh kibang khin lo hi.

Ahi zongin US citizen ngahsa khat in na nu na pa na sap ciangin, a mau ading omna ding tenna ding leh annek tuidawn ding sikh zo mah ning na cih ciang bek mah in na sap ding hong phal pan bek a hihna tawh kizui in, tua na nu na pate SSI hong pia kilkel lo ding hi leuleu uhhi.

Tu aa ka cihte pen USA ah nasep a nei lo gambeel kum 65 val a phate a piakzah a gen ih hihi. Ahi zongin deih loh pen in tuahsiatna khat hang peuh tawh anu cih thadah amau mahmah in zong neek ding taak ding haksatna khat nei leh anu a kipan mau innkuan a’dingin huhna kisiau thei veve ding hi. (azom omlai hi…) Agelh: Awn Za Pau