Ka mangngilh mawh August 9th, 1988 ~ Zen Lian

Ka mangngilh mawh August 9th, 1988 ~ Zen Lian

Tan8 laivuan ding aa ka kipat laitak in, kaveng vuah a om, RIT sangnaupang leh a kiim a pam aa om khuami te kitotna hang in buai na hong piang hi. Sandarwin niangtuisai ah hong kitom in,tua laitak in zong nitak niangtui nek laitak a hih man in ka mittawh ka mu kha lile hi. Tua tawh hong khawllo in, a zan ciang in vengbup haltum ding a cih ciang ko veng kibuai khengkhan peuh mah in, a ihmu ngam kua mah ki om lo hi.

Tua pan aa kipan sangnaupangte lungkimlohna nakpi in hong khang semsem in Rangoon University hong lawh taktak ta hi. Tua hunlai in, Kawlgam Parliament kikup ding hun tawh hong kituak hi. Kawlgam in leitung ah a zawngpen gamkhat in kiciamteh leh gamdangpan huhna tam ki ngah ding ngaihsut hunsung zong hong hi hi.Sangnau pang te zum lua mahmah a hih na leh Democracy ngen zaw leng kawlgam in mailam naakpi in lemtang zawding cih hong mukhia hi. Tua hun pan kha nga bang hong tung aa, August kha hong hi peetmah ta hi.

Tua hunlai in Zomi movement ki nei nailo in, Chin min tawh lungpho na ki nei hi. Ko Zomite in Democracy ka deih uhhi, cih laipi kitawi in, ko ka hih teh tua Flag tawi te nung ah, (Doh A yii, Doh A yi) ka ci luai luai nong uh hi.

Pu Nang Lian Thang inn (Sanyeihnyeng) mai ah zingsang tung in ki kaikhawm in, Lasian Siam minthang Thang Sian Khai te pawl bang a mai ah Lan tawi pawl hi in,Shwedagone pagoda lamzuan in khe tawh ki pai in, Mi ne kone bang tun ciang in, lampidim in lungpho mi lompi bek bek pai zuah zuah hi.Shwedagon nitumna lam a lutna lam pan ki lut in,ei kiang pan ih muh tawp dong mi bek bek om ziahzuah hi. A sawtlo in, North Okkala lam pan lungpho mipi te hong tun ciang , khut ki bet ziah2 hi.

Hun sauveisim mah ngak khit ciang Daw Aung San Su Kyi in thugen na hong nei in tha ki ngah mah mah hi. Mipi mai aa a thu gen masak zong hi in, ki neulai sim hiam or bang mah ki thei nailo hi ngel ding hi ven, hong ki dong kik leh ka gen kik ding tawm mah mah bilbel hi.Pasian in hong kem mahmah in a phuakkham lian ding aa ki selsim bomb zong Phunggyi te in hong mukhia kha bilbel a hih man in ki nuntak na hubei kua mah ki om lo hi.

Hun man ciang in, inn lam zuan ding ki hi sam na pi in, paina ding lampi ah mipi dim cip in innlamzuan ding pen lampi awng zaw deuhdeuh na ki zuan pong mawk in, ih mai aa te paina nung ki zui zui hi. Mihau deuh te ten na Wyndamere sung zong ki lut kha in, mihau te ta nu/pa te in a inn mai vuan tui tawh neek theih tuam2 tawh hong pang uh in, ki tha lawp mah mah hi.

Tua pan nai 3 khawng khe tawh pai to to pong in, a bangci hiam khat teng tawh Kabareye sity phaya lann ka va tung to mikmek uh hi.Hih mun ka tun tak tak teh mangnon mawk lo e ci in, lungsim ki kha muan mah mah ta hi.Tua mun pan in Tadar lay lam zuan in khetawh pai pai mai in,a hun khat teh Tadar lay ka tung uh. Bus cih bang meileng cih bang pailo in, mawtaw golsim khat ka bawm uh hi. Kei ka kahtoh leh ka khesikna ding mun khat ngah na pi ing, ka kithuah pih Pa (Kam Pian Thang) in hong bawm zolo citciat in, nusiat san ngam lo kahih ciang kangtak in ka tuak kik hi.

Tua Tadarlay pan in Tamaing Lansone dong Pasian hong piaksa khe mah tawh lamsiau suk leuleu in, khat leh khat ka ki ho zo nawn mel kei vua, ki en giau giau lel uh hi.Tua pan in ki nai mah mah talel ci in , ka omna Kaweichan ciang lamsiau suak vet in, inn ka tunkik ciang nitak nai 8 bang hong sat khin ta hi. Inn tunkik leh nitak ann zong nezo nawnlo in, lumna ka ki den na hi.

More: Interview with Tg. Zen Lian (Guitarist)

Gim leh tawl thuah kawmin, Pumpi luang bang sih lawh dektak a hih hang Nainganyii a koici bang, cih theilo pi in- Demonstration a va pai ka hih lam ki nungtheih ing. Gina takei leh hih lai tawh 8/8/88 a Kawlgam kikhelna ding a luang hong pia khia mi kisim zolo teng tung vangpiakna leh thupisak na lungdam ko kik kawm in, Zen Lian !!!!