Joseph namu hiam? ~ Pu Thangboi

Joseph namu hiam? ~ Pu Thangboi

Joseph tangthu ih et ciang in apaipaina ah Pasian’ ompihna in suulzuih ahih man in adau paingiat hi. Amah sila ding a alei masa Potifar in Joseph a ompih khat om ahih lam thei pah gige ahih man in ainn vai alovai khempeuh Joseph’ tungah ap pahlian hi. Tua a-ap ni a kipan Potifar in neih leh lam thupha ngah ahih man in punna khanna tawh kidim topah het-het hi.

Potifar’ zi hang in thumanlopi in Joseph gilbem sung akipuak hang in Pasian’ ompihna in zui veve lel hi. Thonginn neipa in zong tua thusim nathei lian ahih man in thongvai khempeuh Joseph’ khutsung ah ap lian hi. Pasian’ ompihna angahpa’ khut sungah ap ahih man in vaiteng lem mahmah pah hi

Faro in mang man in tua mang khiatna agen ding in Joseph thong sungpan ki lakhia hi. Joseph in akhiatna agen laitak mah in Faro in Joseph a ompih khat om ahih lam tel cihtak tel lian ahih man in thakhat thu in Egypt gambup Joseph’ khut sungah apngam lian mawk hi. Egypt gam ani ani in hau pah henhen in khangto pah hanhan hi. Joseph akhawite mazang in lawhcing ngiat mawk uh hi

Bang hang ?

Pasian in Joseph ompih hiven ! Joseph a ompih Pasian in tuni in zong tuadan mah in ompih diak mi pawlkhat nei lai veve hi. Joseph Namu Hiam ? Joseph dan namuh khak leh zuipah lel in. Na kisik kei ding hi. Nang mahmah zong Joseph nahi thei veve hi

Azenzen in Joseph nahih leh na omomna ah na lamdang piang ding hi. Athu neupen in niangtui sai natut leh nang’ tutna hang in tua niangtuisai in nidang tawh kibanglo in khawngzaw pah seding hi

Na zintunnate, na hawh na giahnate, an hong vak, puan hong leisak, Love-gift hongpiate nidang banglo in mazang in daupai ngiat ding uh hi

Joseph ih bat ding lunggulh huai pen a, ih bat zawh kei leh zong amah dan mi ih zonkhiat ding ahi hi. Joseph Namu Hiam ? Lungdam, Mung Laan Thang (Yangon)