Jesuh’ lampi a khaktan sawm mi 5 te ~ Rev. Thang Van Lian

Jesuh’ lampi a khaktan sawm mi 5 te ~ Rev. Thang Van Lian

Luguh mual (Golgotha) zong akici Kalvary mualah Topa Jesuh akikhai lup ni-in ei zong upna khamit tawh Luguh mual lam enin Topa in nang leh kei adingin tangtawng akipan ageel kholhnate tawm lungngai dih ni.

Topa Jesuh’ nuntakna, nasepna, a sihna leh thawhkikna a khaktan sawm ngei mite thu na phawk kha ngei hiam? Amaute in Pasian’ geelna kipelhsak zo het lo uh hi.

1. Kumpi Herod: A suak thak kumpi naungek thu a zak ciangin kum 2 nuaisiah naupang khempeuh thahna tawh khaktan sawm a, khak tan zo lo hi. Topa’ geelna tawh akilehbulh a na gamtat khak leh gim huai mahmah ding a, ama’ geelna sungah na kalsuan theih leh na tawldam mahmah ding hi. (Mat 2:16).

2. Satan: 1) Pasian’ tapa takpi na hih leh hih suangte anlum suaksak in… 2) Pasian’ tapa takpi na hih leh hih lai panin tuaksuk in vantung mi in hong cing ding hi… 3) Ka mai ah kunin hong bia lecin hihte khempeuh nangma tungah kong pia ding hi… Satan in ze-et zo lo hi. (Mat 4:1 – 11). Judas Iskariot zangin Jesuh sihna ding na vaihawm leuleu a, tua sihna mah zong Jesuh’ gualzawhna suak hi. (Luke 22:3).

3. Siampi liante leh uliante: Jesuh thah lup sawm uh a, zuau teci pang ding mi zong uh hi(Mat 26:59; 27:1); Barabbas khah in, Jesuh that in… a ci dingin mipite khem uh ( Mat 27:20). Ahi zongin Pasian’ geelna kipelhsak zo tuan lo uh hi.

4. Simon Peter – Jesuh’ mai a kikham ngampa: Jesuh akhual luat manin Malkhas kici siampi lianpa’ nasempa’ bil na sat khiatsak man hi (John 18:10-11). Jesuh in ka Pa’ kiangah ngen hi leng vantung galkapte hon sawm le hon nih val thakhat thu in hong puak pah ding hi… na ci hi. Messiah hihna tawh sihna athuak ding pen nungzui ta dingin zong theihsiam ahaksa lua mahmah ding ahi hi. Ahi zongin anung ciangin Pasian’ geelna a thei uh hi.

5. Pontius Pilate – Uaikaai Thukhen Mangpa: Azi nangawn in Jesuh a thah loh nadingin gen khol khin a, aman zong thah nading thu mu lo hi. Pilate in 4 vei bang Jesuh thah nading na pelh sawm sam a, ahi zongin mipi atamzawte’ thu aman manin thah dingin na pia hi. (Mat 27:19; 22-24).

Hihte khempeuh i lungngaih kik ciangin amau’ mimal dinmun leh a ngaihsutna uh pan hanciam mahmah tek napi uh tua hanciamna pen Pasian’ geelna na hi lo ahih manin khat zong tangtung zo lo, Pasian’ geelna kipelhsak zo lo, khaktan zo lo uh hi.

Hih khempeuh tangtawng akipan nang leh kei adingin Topa’ geel kholhsa ahi hi. Nang adingin Pasian in gupkhiatna nasep a sep ciangin kuamah in dal zo lo, khaktan zo lo hi. Nang adingin Topa’ itna leh hong hehpihna pen kuamah in khaktan zo lo ding hi.

Tuni hun a singlamteh tungah akikhaipa’ thu na lungngaih kawmin Pasian in nang adingin hong geelsakna leh hong sepsaknate phawk in la, lungdam kohna tawh singlamteh phung hong zuan kik in.

Mi khatpeuh, ulian khatpeuh, kumpi khatpeuh ahi a, Dawimangpa in ahi zongin nang ading a Pasian’ geelna khaktan zo het lo ding, cih phawk in.

Gam lapi mualtungah, singlamteh tul gemgam, Gentheihna, maizumna lim ahi; Tua khuampi ka it hi, leitung buppi tan ding, A it huai penpa hong sihna hi. (Tedim Labu 134). Rev. Thang Van Lian