Jesu Topa tawh ~ Rev. Fr. Damian Dal

Jesu Topa tawh

Jesu Christ a umlo, asangthei lo mite in “Hi mi pa Pasian kiangpan hongpai hilo ding hi. Banghanghiam cih leh amah in Sabbath ni in nasem a, Sabbath ni tanglo hi,” (Jn 9: 16) ci uhhi. Banghangin tuaci bangin gen uhhiam ihcih ciangin Jesu in Sabbath ni in cina damsak in, Sabbath ni in nasem ahih hang ahihi. Jesu Topa in Sabbath ni in, leivui pan buan bawl in, mittaw pa mit ah zutsak a, damna apiak na hangin hici bangin agen ahi uhhi (Jn 9: 14-16).

Jesu pen honpa leh gumpa a, asangthei lo te in amawhsak mahbang un, tuhun mipawlkhat te in Sabbath ni atanglo mite mawhsak in, Pasian tawh akizom lo, Pasian thu umlo zahdong in genthei uhhi. Alamdang hilo in, Jesu Topa a umlo te ii pianzia ngeina anuntak pih ahi uhhi. Topa Jesu mahmah zong Sabbath ni tanglo pa, migi nalo pa, Pasian thu umlo/zuilo pa ci in na ki ko hi.

Tua banga amawhsak te pen, Topa Jesu in akineihkhem mite (hypocrites) ci in, na tai hi (Jn 9: 15). Tua bangin atai nahangin, amah amawhsak mite in maizumna thuak hi ci in Laisiangtho sungah naki gelh hi (Jn 9: 17). Ahi zongin, amah a um mite ahihleh lungdam natawh Topa nasepna te pahtawi hi ci in honghilh beh hi (Jn 9: 17).

Banghang in Sabbath ni in nasem hiam cih thu, Topa Jesu in siangtak leh teltak in agen in ah: “Ka Pa Pasian in tuni tu hun laitak mahmah in zong nasem ahih manin, kei zong asem ka hihi,” (Jn 5: 17) ci in nahilh hi. Sabbath ni atang te in, Sabbath ni pen Pasian tawlngak ni hi ci uhhi. Topa Jesu in ka Pa Pasian in tuni dongin nasem lai hi ci hi. Tua hi leh Sabbath ni in, Pasian tawlnga hi cihthu in bangkhiatna nei ding hiam. Literally interpretation aki ci laimal om bangbang in akhiatna la in, adeihna khiatna in Laisiangtho khiatna tawh kilehbulh thei in, khialhna lampi hongtunpihthei ahihna thu hong theisak hi. Topa Jesu in:”Sabbath ni in, mihing te adding a kibawl hi in, mihing te in Sabbath ni ading a kibawl hilo hi,” (Mk 2: 27-28) ci in honghilh hi.

Mihing te in, hun ciaptehna tuamtuam, pawini ciapteh na tuamtuam te ii khutnuai a sila dingin Pasian’ hongbawl ahi kei hi. Ahi zongin, Pasian tawh kizopna ahoihzaw, asiangtho zaw, apicingzaw, a etlawmzaw, athupi zaw cihte en in, lei tungah ni le hun te azang dingin hongbawl ahi zaw hi. Tua thu hangin, mihing in Sabbath ni ading hi lo in, Sabbath ni in mihing ading ahihi, aci ahihi. Hih thu Paul in teltak in honggen na ah: “Tua ahih manin annek tuidawn, biakna pawite, Khadet Pawi, leh Sabbath ni tawh kisai-in kuamah in ngeina zuihding bawl kei un. Hihte pen mailamah a hong piangding nate’ lim hi lel a, ahi zongin tu-in a taktak ahi Christ hong omta hi (Colose 2: 16-18).

Hih thu hangin, Christian te, Jesu hon pa le gumpa a asang, Jesu Topa abia, aphat, apahtawi leh amantawh anungta tawntung dingin, upna tawh anungta te in, Jesu Christ ii ni ahi, sihna zo in hong thawhkikni in, atho kik Topa phat in, bia in, pahtawi in, ama ni asiangtho sak ihihi. Jesu minthang tawhtung ta hen, Amen.

Rev. Fr. Damian Dal