Jesu Suah Lundamna Thupha ~ Fr. Joseph Mungno

Jesu Suah Lundamna Thupha ~ Fr. Joseph Mungno

Christu sungah kongit thuzui nu leh pa, u leh naute Topa Jesu suah lungdamna thupha leh Kumthak thuphate note tungah hong tungta hen ci-in hong nohset ing. Tua thupha a sangmite nuntakzia tawmkhat honggen nuam ing. Vantungmi Grabriel in Tonu Maria kiangah, “Na lungdam mahmah ding ahi hi. Topa in nang hong ompih a, thupha lianpi hongpia zo hi” (Lk 1:28). Elizabeth in Tonu Maria hopihna awging a zak ciangin a sunga a naupaii John lungdam in a diang hi.

Elizabeth zong Khasiangtho tawh hong kidim a, nakpitakin kiko-in, “Numei khempeuh lakah thupha ngah pen nu na hi a, napaai naungek in thupha ngah ding hi. Ka Topa nu kei kiangah hong hawh nadingin, bang hangin hih bang thu lian kei tungah hongtung ahi hiam? Bang hang hiam cih leh nong hopihna awging ka zak phetin ka sunga naungek nuamin a diang hi. (Lk 1:41-44).

Hih Laisiangtho en leng, Vantung mi Grabriel in Tonu Maria kiangah “Topa Pasian in nang hong ompih aa thupha lianpi hongpia zo hi” na ci hi. Pasian in leitungah thupha lianpen ahi a tapa Jesu pen Tonu Maria tungah napia masa hi cih teltakin kimuthei hi. Tonu Maria in Pasian kiang pan thupha a san khit ciangin Khasiangtho tawh hong kidimin tua thuphate a hi a tapa Jesu leh Khasiangtho pen ei leitungmite tungah hong hawm sawn hi.

Tua a hih manin khasiangtho tawh a kidim ahi Tonu Maria awging a za John in a nu Elizabeth gilsungah lungdam in diang hi. Elizabeth in zong Khasiangtho tawh a kidim a hi Tonu Maria hopihna awging a zak ciangin Khasiangtho tawh hong kidim in lungdamna tawh Tonu Maria pahtawina hong nei hi. Khasiangtho a sang mite bekin Khasiangtho tawh a kidim mite pahtawithei hi cih pen hih Laisiangtho in teltak in hong theisak hi.

Eite khat ciat in zong Jesu suah lungdamna thupha ih san takpi leh Tonu Maria mah bangin Khasiangtho tawh ih kidim ding aa, Tonu Maria ii awging aa za John in lungdamin a dian mah bangin, eite ii awging aza ih innkuanpihte, ih lawmte in zong lungdamin diang ding uh hi. Elizabeth in Khasiangtho tawh a kidim khitciang bekin lungdamna tawh Tonu Maria a pahtawi thei mah bangin eite khat ciatin zong Khasiangtho tawh ih kidim khit ciangbekin ih Nu ih Pa, ih innkuanpih te leh ihlawmte lungdamna tawh in pahtawi thei pan ding hi.

Ih gamtatna, ih kampaunate khempeuh, ih innkuanpihte, ih lawm te, mikhempeuh aa dingin lungdamna a hih hun ciang bekin leh ih innkuanpihte, ih lawmte gamtatna, kampaunate khempeuh ei a dingin lungdamna ihhihsak hun ciang bekin Jesu suah lungdamna thupha a sang takpi te ih hi pan ding hi. Tonu Maria mah bangin Pasian kammal upna tawh sangin, Jesu suah lungdamna thupha midangte tungah a hawm khia zo dingin Ih Biak Topa Pasian in hih lai a sim mimal khatkim ciat tungah thupha hongpia ta hen! Amen.

Christu sungah,
Fr. Joseph Mungno