Japan ah ahun khengval in nasepding kikhaam ~ Job Cinpi

Japan ah ahun khengval in nasepding kikhaam ~ Job Cinpi

Japan ah nasep ding ciangtan hun khengval a nasep ding kikhaam – Thului khat sungah hih thu ka sim khak ciangin ka um zo kei phial hi. Citak a nasep hanciam ding a thupitna a kigengen kawmkal panin Japan gam ah nasep ding ciangtan hun khengval in na a sem mi tamlua uh ahih manin kumpi thuneite le company neite in ciangtan hun khengval a nasem a om loh nadingin khangzui pilna tawh a kibawl vanlengno (Drone) bawl hi ci uh hi. (Bang hangin hun khengvak a nasep ding phal lo uh hiam cih thu a nung lam ah kong gen kik zaw ding hi.)

Hih vanlengno in hun khengval a nasemte bangci khaktan ding hiam cih leh nasep ciangtan hun a tun ciangin nasepna mun teng ah tua vanlengno lengsak kawikawi ding uh a, tua vanlengno tung panin nasep ciangtan hun khengvak ta hi, na inn uah ciah ta un cih kammal tawh nasepna a nawngkaisak zo ding zah khop in a ngaih la khat kihong ding hi ci uh hi. Bek tham loin tua vanlengno tungah manzaihna kithuah dinga tua manzaihna pen mimel a sittel thei dingin kibawl ding hi ci uh hi.

Bang hangin tua bangin nasep hun khengval a nasep ding khaktan uh ahiam, thu hoih hi zaw lo hiam cih dotna om nuam kha ding hi. Ahang hih bangin gen uh hi.

Hun khat lai in Japan gam pen vut le vai suak ngei hi mah leh gammite nasep hanciamna hangin tu in gam hoih gam nuam mahmah khat hong suak kik ta hi. Tua hangin kumpi thuneite in gammite nasep hanciamna phat uh hi. Ahi zongin gammite in tua bangin nasep bekbek hong hanciam uh ahih manin hun awng cih tam neih nawn lo uh a, tua manin gammite sungah lunggim natna thuak mi hong tam semsem uh hi.

Nasep bek tawh buai uh a, innkuanpihte le lawm le gualte tawh gualnop suahtak hun tam neih ngei lo uh ahih manin a lung uh a gim ciangin amau le amau a kisihbawl mi hong tam tektek ta uh hi. Lungkiat natna le lungtang natna a nei mi kum khat khit kum khat hong tam tektek ahih manin gammite in innkuanpih lawm le gualte tawh gualnop suahtak hun tam a neih zawk theih nading uh cih deihna tawh hih gelna a nei ahi uh hi.

More: Japan gamah kumpi thak le hunthak kipanding

Ahi zongin gammite nasep hanciamna pen tungsiah thuneite sawl zawh thu tawh nasep a hanciam hi peuhmah lo uh ahih manin hih nasep hun khengval a sep loh ding gelna a thukimpih lo mipi hon khat mah om hi ci uh hi. Job Cinpi/ Everytimestory