Jan 4, Kawlgam suahtak ni ~ Pau Khat Suan

Jan 4, Kawlgam suahtak ni ~ Pau Khat Suan

Jan 4 pen British kumpi khutsung pan Kawlgam, Union of Burma, a suahtak ni ahi hi.

Hih suahtakna a piantheihna ding a a thupi mahmah khat in 1947, Feb 12 a Panglong Agreement ahi hi. Panglong Agreement leh Union Day cihte i theihtheih sa vive ahi hi.

Hih “ni leh thu” thupi nihte tawh kisai ka ngaihsut sim in ka lungsim ong phawng gige leh ka theih zawhloh thu pawlkhat om hi.

Panglong Agreement ah Proper Burma, Federated Shan States, Kachin Hills leh Chin Hills makaite thu kikupna, thukimna suaikaihna tawh Union of Burma ong piangkhia leh suahtakna a kingah hi a*, hih hun in Karen, Mon leh Arakan/Rakhine minamte “Proper Burma” sung ah kihel cihna hi ngel ding hi.

Ahi zong in, Kawlgam suahtakna leh suahtakna ngahkhit a Kawlgam kilamzia ding a geel, a makaipi ” the architect of the Independent Union of Burma” Aung San kithat mawk hi.**

Suahtakna ngah khit ciang in, ngahkhin phet Karen gal kipan pah hi.***

Karen, Mon leh Rakhine gamte Proper Burma ah banghang a kihel thei ahi diam? Tua hi napi, suahtakna ngahkhin phet banghang a Karen gal kipan pah hiding hiam? Suahtakna ngahkhit ciang U Nu cabinet a Union Minister lak ah Rakhine gam a Bengali Rohingyate bang kihel thei a, Parliamentary secretary panmun bang ah kihel thei mawk uh hi.

Kawl, Karen, Mon, Rakhine minamte’ kikal ah, Panglong hun mapek in, ki thukimna om khin ahihman a hihte Proper Burma ah a kihel ahi diam? Tuabang thukimna omkhin ahih leh…. Official record omlo maw?, ahkl kiselcip, ki-imcip maw? Ahkl a om mah ke’n a mukha lo hizaw?….

A thei i om leh ong hilh thei omleh ka lungdam mahmah ding hi.

* Hih Panglong Agreement pen “10 years lease” hi cih i theihsa ciat ahi hi.

** Aung San leh ama’ naseppih teng a kithahna ahang pen U Saw tawh political tha kidemna hang bek mah ahi diam? A kisel thusim thu lianzaw a om diam?

*** Karen gal a kipat pahna pen Aung San sihna tawh kisai leh thu kisel sim, a kilumlet zong om gige ahi diam? Pau Khat Suan