Jack The Ripper

Jack The Ripper

Kum 1888 kiima London Whitechapel a kithahna ‘Whitechapel murders’ kici pen kithahna tawh kisai thu ah a minthang pawl ahi hi. Kum zalom 19 na kiim in London East End kiangah Irish leh Juda galtai tampi teeng uh hi.A nuntakzia uh sia mah mah mai hi. Zu zuak,zukham leh numei kizuak tam mah mah hi.Bek tham lo in inn kiluh leh mi kithat tam cihtakin tam hi. Numei kizuak bek zong tua hunlai in 1600 om uh hi.Tua ciangin numei te kizuakna mun bek zong East End ah 60 val om hi.Tua bang lak pan in serial killer Jack the Ripper hong kilang hi.

31 August 1988(Friday) zing nai 3:40 hun in Numei kizuak Mary Ann Nicolas luang Buck’s Row, Whitechapel ah ki mu hi. A gawl leh a gilpi ki at in aki mawk thah hihtuak lo hi. 8th September 1888 zingsang nai 6:00 kiim in Annie Chapman luang Hanbury Street, Spitalfields ah ki mu kik hi. Amah zong a gawl leh a gilpi ki at kek bia bua hi. Annie Chapman pen zingsang nai 5:00 pawl in a sam vom mikhat tawh a tawn khawm ki mu hi. Tua khit a sawtlo in a si luang ki mu kik hi. A tawnpih pa pen kua hiam cih ki theikhia zo lo hi. London Police te lungsim patau mah mah uh hi.Police lam ten thudawn lo sa lua uh ahihmanin East End kiim a mipi ten Vigilance Committee phuan uh hi. Commander dingin George Lusk seh uh hi.

30th September 1888 sun nai 1:00 kiim in Dutfield’s yard, Berrner Street ah numei kizuak Elizabeth Stride luang ki mu kik hi. A gawl ki at in a gilpi bel ki kuikek lo vanglak hi. Tua khit deuh in Mitre Square kici Elizabeth luang ki muhna pana gamla lo cikah Cathrine Eddowes luang ki mu kik hi. A gawlah ki at in a gilpi ki khuahkhia hi. Cathrine Eddowes ii’ apron pen Goulston Street a Jud ate teenna ah ki mu hi. Ahizongin hih pen Jud ate a ngawhnop man ua ki koih tawm in ngaihsun uh hi.

Cathrine Eddowes sih khit a sawt lo in Vigilance Committee makai George Lusk in laikhak khat ngah hi.Tua laikhak ten Dear Boss ci in gelh bilbel uh hi.Tua laikhak pa in numei kizuak te thah nuam a sakna thu gelh hi.Tua man in thah zel lai a sawm lam zong gen beh hi.Elizabeth Stride pen a thah laitakin midang hong pai ahihmanin a gilzangte laikhia man lo ci hi.

Tua man in midang khat that kik in a kal them zong khak hi.A laikhak kik ciang a bill eh a sin khak ding cih zong gelh hi. A tawpna ah From hell ..Jack the Ripper cih gelh in a min sign hi.London Police leh vigilance Committee ten laikhak ngah zel zel uh hi. Ahizongin a ommawh khat ii’ gelh hi dingin ngaihsun lel uh hi. Tu tunga pen bel Jack the Ripper mah hi dingin ngaihsun pah uh hi.

November 9,1888 (Friday) sunma nai 10:45 kiim pawlin 13 Miller’s Court, Dorset Street, Spitalfields inn room sung khatah Mary Jane Kelly numei kizuak mah luang kimu hi. Tua tungin Ripper in a gilzang te room ah vial zaak gawp hi.

Tua khitciang London Police ten Ripper kiang pan laikhak khat ngah kik uh hi. A sin kangin a neekna thu va hilh hi. Tua khitciangin tuadan kithahna hong dai vingveng hi. Kithahna lim limb el om den zel lai hi. Hih mi 5 te thukan ten Ripper ii’ thah hi dingin ngaihsun uh hi.

Tua khitciang si luang li (4) ki mu kik in ahizongin aki thah dan pen Ripper ii’ thah hi dingin ummawh phalo uh hi. A mi thah dan leh a atdan khawng a et ciangun police ten doctor aihkeh mi at ngei khat peuh ii’ thah tawh kibangsa uh hi. Ki atdan a thei mah mah khat hi dingin ngaihsun uh hi. Upmawh nei mahle uh Jack the Ripper pen kua ahi hiam cih thei khia zo lo uh hi. Pau Tun Thang