iZomi Group leh Zomi Daily holimna

iZomi Group leh Zomi Daily holimna

Tutung Zomi sungah R&B leh Hip Hop lasaksiam mahmah Group minthangkhat kong pulak khianuam uhhi. Tua Group tepen Zomi sungah a awging uh ih zakzaksa leh muhnop ihsak mahmah iZomi Group te ahi uhhi. Hih iZomi Group tepen lasak siamciangbek hilo uh a, kineihdan kizepdan (Acting & Styling) zong siam mahmah uhhi. Bekthamlo a Video kizaih te uhpen azaihtelah siam, Editing lahsiam, Idea hoihnono tawh ong gawmkhop lailai uhciang in etnop mahmah a, etcim theiloliang in leitung Level abanzo Quality nei Video vive ong suahkhia uhhi.

Tualeh hih iZomi ihcihcih kuate hitaktak mawk hiam?

Ih zakzak, ih muhmuh ahihsam hangin khatveivei mipi in ki theikimlo hi. Tua ahih manin Zomi Daily pan Siama Deih Mang makaihna tawh iZomi te holimna tomno cikkhat kana neithei uhhi. Holimna kaneih pakna panun mipi theihding tawmkhat kong hawmkhianuam uhhi.

iZomi Group pen mi bangzahpha uhhiam?

iZomi Group tepen mi 3 hi uh a, alawmta teng un ki khangualthei, moitheilai mahmah uhhi. Tuhunciang kum bangzah phakhin nahiam kicih tangtanghun hinawnlo ahih manin, hih iZomi tangval tezong kum 20 gual (20s) vive hipan uhhi ci’n na ciaptehsak un.

Kuateng himawk hiam, nathei taktak hialeh?

1) Pau Muan Sing (SB Muan)
2) Zam Sian Mung (Mung Leuh)
3) Dal Muan Sang (David Sangpy)

SB Muan leh Mung Leuh pen Kawlpi (Kalaymyo) pan akhangkhia uh hi a, David Sangpy pen Tedim pan ahihi. iZomi te Video Director pen Khanpi in sepsak a, Standard nei in, Quality hoih a, muhnop etnop mahmah hi.

iZomi bangcibang in ongki pankhia?

Hih lawmta 3 tengpen 2009 kum in ongki thuahkhawm liailiai uh a, lasakhawm, lagelhkhawm in ongki thutuak mahmah uhhi. Tuabang tengtawh 2010 kumciang in iZomi Group ci’n ongki pankhia uh a, leitungbup Zomi sungah ong minthang mahmahpah uhhi.

iZomi cih adeihna?

iZomi acih ciangin “I’m Zomi” “Kei Zomi khat hi ing” cihnopna ahihlam zong onggen khia uhhi. iZomi Group ong piankhiatna ahangzongpen hih lawmta 3 tengin Hip Hop Music lam ah uklua mahmah uh ahih manun, iZomi cih Group khat ong piangkhia ahihi.

iZomi Group te lasakte pen lamal Lyric hoihthei mahmah a, bangcibang in naphuah uhhiam cih kadot uhciang in atamzaw pen SB Muanpi phuah ci a, a lawmta 3 unzong Idea gawmkhawm in aphuah uhzong om cihi. A late atamzaw pen R&B leh Hip Hop Style vive hizaw a, Itna bulphuh in akiphuak vive hizaw ahih manin Zomi khangno nungak tangval te’n deihphadiak uhhi.

Tulaitak?

Tulaitak bangtawh buaipen nahi uhhiam ci’n kadot uhciang un lakhum khawmzel, ngaikhawm zel leh Idea athakthak atuamtuam zongkhawmzel cihbang tawh nabuai mahmah ung ci’n ongdawngkik uhhi.

Mailam ngimna?

Tuaban ah asawtlo in Album bawlzawhnang ong hanciam nung cihzong onggenkhia uhhi. Ei Zomi mimal Population ihtawmlai mahmah hangin, USA gamsung Tulsa khuapi panin leitungbup leimongdong ah Zomi te ongki theihkhiat semsem nadingin ong hanciamnung cihzong onggenkhia uh ahih manun ih angtang mahmah hi.

iZomi Group te’n Zomi Daily ah kongki heltheih uh lungdam mahmah ung ongci tangtang uh a, ataktak in Zomi sungah ih kisaktheihpih mahmah ahi iZomi Group te’n Zomi Daily leh asim mimal khatciat adingin ahun manpha tampi ongpiak manun ki lungdamzaw thamtham hi.

ZD Sawltak #zomidaily
2012-05-09