Itluat tano aa ding laikhak ~ Peter Suumpi

Itluat tano aa ding laikhak ~ Peter Suumpi

Kong it ka ta aw (Seth), Na kum tu in kum 3 bek hipan ahihman in laisim thei nai kei niteh. Hi lai sung ah kong gennop thu te telzo nai kei mah niteh. Ahihang in na tuak khak ding nuntakna le kei napa in ka tuahsa nuntakna, ka sinsa nuntakna, hih thu te hunla in ka lungngai hi. Na tuakkhak ding haksatna te na kiginkholh theih nading in kei napa tung ah vaipuak om hi ci in na ngaihsun ing.

Hih laisung aa thu te tuni in tel zo naikei niteh. Ahihang hun khat teitei nong gol hun ciang hih kong gen thu te pan pilna le thu theihna nam khat in na muh theih ding lam-en ing kata aw.

Na kum tawm lai hi. Nuntakna in nang susia nailo hi. Na nuntakna sung ah lungmanna, khasiatna, khattangna, thasanna, lungsim natna te in hong zui nailo hi. Acimtak huai hun sawtpi nasepna te le nisim nuntak haksatna te in nang hong mancip nailo hi.

Hih aading lungdam in. Nuntakna ii a etlawm penpen dinmun ah nang na om laitak hi kata aw. Hih bang dan aa a etlawm dinmun te na nuntakna sung ah tuak to lai ding hiteh. Ahihang hih te pen olno takin ngah zolo ding hiteh. Akituak aman (price) piak ding le na tuah khak ngeiloh pawl khat na sep ngam kul ding hi.

Kong hilh ding ka sinsa thu te in ahoihpen in nang ii nuntakna lampi ah hong huh hamtang ding hi ci in ka lam-en hi ka ta aw. Ngiahsut piakna te bel meh bang hileh zasan meh dan in na sang lel in. Bam (bang hang hiam) cih leh kei aading alem hang in nang tawh lem thei lemlo thei cihna hi.

“Nuntakna in hong bawlsia dikdek thei hi.” (Life can be cruel)

Na nuntakna sungah miginalo te zong om thei ding hi. Amau tawh na kibat lohman in (ahk) zawhtawh thu tawh hong ko in hong nopneh thei ding uh hi. Amau te in zong hong bawlsia thei ding uh hi. Ahihkeh hong mindai sak ding uh hi.

Hibang hun na tuak ciangin omdan khawldan na kisin ding lobuang adang hih ding bang mah omlo hi. Tua kawm in lawm kithuahpih hoih zonsiam kisin ding hiteh. Nang hong hehpih thei, hong thudon te, nang tung ah hong citak hi na cih mi te nalawm ding in kikholh pih in. Hibang mi te na muh leh na kilawmtatna khahsuah kei in. Amau te manphatna te thupi sak in. Amau tawh na kikholh nading hunpia in. Amau te tungah hoih in. Amau te it in.

Khat veivei ciang in gualzawhna sang in lungmanna, thanemna te tawh na kituak kha thei ding hi. Nuntakna cihpen nang ngaihsut bangin atawntung in hong lemtang khingai lo ding hi. Hipen na sinbeh ding, na tuak khak ding thu hi. Hih thu in nang kensang tung pan hong sawnkhia tawh kibang ding aa ahihang in ka ta aw hibang hun ciang in thuak teta in mainawt ding hiteh. Lungsim kisiat thanemna te sang siam inla thuakzawhna kisin in. Lam-et loh laitak aa hong piang lauhuai na te awlmawh lo in na sunmang na tangtutna ding hanciam veve ding hiteh. Thusia khat pen thuhoih in na khel theih nading kisin ding hiteh. Tua teng khit ciang nuntakna ii ahoihpen na te na sem thei ding hi.

Na nuntakna sung ah na itpen na lawmngaihnu in hong nusia, hong taisan cih te om thei hi. Hibang thu te tam vei na tuah loh ding lam-en ing ka ta aw. Na tuah khak zenzen leh zong khat vei kipan kik in nuntakna lampi ah kalsuan kik in. Ahoihzaw, asang zaw nuntakna lampi na tung theih nading hibang dan thu te in hong tungsak hi ci in ngaihsun in. Thaukzawh hatna kisin in.

“Bangbang hitaleh na kha te zaak inla nungta in” (But be open to life anyway)

Himah hi. Nuntakna sungah khasiatna te, zawngkhalna te tawh na kituak kha thei ding hi. Ahihang hih te hangin athak na ngaihsutna te nial kha kei in. Nuntakna lungkia kei in. Ki hepsawm kei in. Nang le nang kikhaktan kei in. Na ngaihsutna thak te ang pom in. Thu theihna in nei in. Lawm thak nei in.

Zawlthu ah 10 vei tuahsia khin kha thei mah ding hiteh. Ahihang a 11 vei na ah ahoih penpen numei zong mukha thei ding hiteh. Zawlthu ah tuahsia den ing ci in nang le nang itna kongkhak te khak in na om leh tua bang numei hoih pen te tawh na nuntakna sungah nuam nasak ding te khaksuah kha ding hiteh.

Na tuakkhak mi te ii zahkona, nopnehna te na thuak kha thei ding hi. Hibang dan mi songbong te dazin khat tawh na kituak khit ciang lawm hoih taktak khat na mu ding hi. Azenzen in lawm thak deih keng, muang ngam keng na cih leh sumh tuan lo ding hiteh. Ahihang na suploh mah bangin na nuntakna sung ah haksatna natuahkhak ciang, na nuntakna aading ahoihpen thute hong puak ding mi te tawh kimeltheih kimaingapna ngah khalo thei ding hiteh.

Tamvei pi na guallel ding hi. Ahihang gual ki lelsak lel in na hanciam nawn kei leh gualzawhna taktak acih te na ngahkha nawn kei ding hi. Guallelhna cihpen gualzawhna ii kahlei tawh kibang hi.

“Nuntakna pen kidemna hilo hi” (Life is not a competition)

Sanginn ah, university ah, nasepna ah hitaleh nang sang asiamzaw nuam hong dem nuam mi om kha ding hi. Ahoihzaw mawtaw, ahoihzaw inn, ahoihzaw silhleten, anasia zaw kimawlna te deih ding uh hi. Amau te aading nuntakna pen amau ii lungnop nading midang te sang ahoihzaw, asangzaw ding in dem uh hi.

Ka ta aw, hilai mun ah thusim khat om hi. Nuntakna pen kidemna hilo hi. Nuntakna pen khualzinna lampi khat hi. Azenzen in hih khualzinna ah midang te’ hong enn ding, midang te sang’ ci in na dem leh hih khualzinna pen amawkna vilvel hi ding hi. Alangkhat ah hih khualzinna pen nuam nasak theih nading in kisin in. Anuam penpen khualzinna ahih theih nading hanciam in. Atawntung in sinna khualzinna hisak in. Atawntung in itna tawh akalsuan khualzinna hisak in.

Ahoihzaw mawtaw khat (ahk) ahoihzaw inn khat na neih nading (ahk) ahoihzaw sumlut nasep aading in na lungkhamna te valsak kei in. Hih te pen athupit loh mah bangin lungnopna takpi hong pia zolo ding hi. Hih te na ngah zenzen leh ahoihzaw na lunggulh lai ding hi. Alangkhat ah na neih bangbang tawh lungkim theihna kisin in. Sum zongin van khat na lei ding sang in na ut na khat semzaw in ka ta aw.

Na lunggulh na na muh khit leh kuhkalna khahsuahlo in na ngah dong hanciam in. Leibat loh in nang le nang ki gim saksak kei in. Nuntakna pen tomkal sungbek hi. Tua ahihman in na cimtak nasep khat ah na hun mawkbeisak in sem kei in.

“Itna pen na nuntakna ii thukhun hisak in” (Love should be your rule)

Azenzen in na nuntakna ii piciang pen kammal khat hi zenzen leh, tua kammal pen “itna” hisak in. Hipen azakha te in zong vamsa khollo kha ding uh hi. Hi pen kei napa in zong thei ing. Ahihang hih sang ahoihzaw nuntakna thukhun omlo hi cihpen muangmawh kei in.

Mipawl khat te in “gualzawhna” pen nuntakna ii thukhun in ciamteh uh hi. Amau te pen anuntakna sung ah suakta lo ding uh hi. Anuntakna sung kawcik ding hi.

Mipawl khat te ii thukhun pen “khat tang aituam” ahi hi. Midang te kisapna pen amau ii meet nading in zang uh hi. Hibang mi te anuntakna sung uh ah “khat tang” uh aa zong lungnopna takpi ngah ngei lo ding uh hi.

Tua khit ciang mipawl khat in thumanna aading aa nunta hing in ci in amau ii thuman na taangko khia uh hi. Amau ii thuman acih tawh akituak lo mi te thu hilh uh hi. Mi te athudon uh hangin atawpna siatna lam manawh zaw veve hi. Atawpna ah alau huai amau bek aman ci in amau thu bek thusa in anuntakna uh beisak uh hi.

Ka ta aw, itna tawh na nuntakna kidim sak in. Na zi it in. Na ta te it in. Na nulepa na lawm na gual te na lungtang takpi tawh it in. Amau te kisap te pia in. Itna longal hehna, thangpaihna, kithutuah lohna le lam-etna neihlohna lim te na gamtatna te ah kilang sak kei in. Amau te na lungsim tawh vei in.

Ka ta aw, nang hong it mi te bek it kei in. Na veng te, na nasep pih te, midang te zong it in. Amau te pen Pasian sung ah na sanggam u nau te a hi uh hi. Na kituahpih mi te maitai hamtang in. Kammal hoihte tawh amau te hoihpih in. Mai-ngap mel lak in. Amau te kisapna ahuh ding na khut te ziakai sak kei in.

Ka ta aw, na veng te, midang te ban ah na gal te zong na it in. Nang hong bawlsai mi te, nang tung atatsai mi te zong it in. Amau te aading thu ngetsak in. Nang ii itna te amau te kisam uh hi cih phawk in.

Athupi penpen khat ah nang le nang ki it ding hi ka ta aw. Midang te in hong gensiat, hong hawmtawh ciang in nang le nang gina lo kici kei in. Tua bang thu te na lungsim sung pan hepkhiat theihna kisin in. Nang le nang ahoihpen, akicing pen, nuam asa pen, itna anei mi in kingaihsun inla nang le nang na ki it theih nading kisin in.

Atawpna kong gennop in “Hong it lua ing ka ta aw”. Atawntung in hong it ding hing cih phawk in. Alamdang, alauhuai, acikziak huai thu te tawh kidim in upzawh lohna tampi tawh akidim nuntakna lampi kipan ta ding hi teh ka ta aw. Na gei ah kei om ing ka ta aw. Na sepna peuh ah gualzo in ma tun in maw… Nong it, Na pa (Lailet: Peter Suumpi, Ref: duwenzhang)