Iraq te’n Amerli khua lakik theita

Iraq te’n Amerli khua lakik theita

Iraq leh Kurdishte in, US te Vanlam pan huh natawh IS te khut sung pan in Amerli khua lakik thei ta uhhi. Hih khua sungah Shiite Turkmen minam te 15,000 val te in kha nih sung IS te umcih na nuai ah kil leh saat thuak in om uhhi. Tu’n ahih uh leh US bek hi nawnlo in UK, France leh Australi te in zong an leh tui, zatui zaha akipan huh thei ta uhhi.US te in IS te van lam tawh Aug.ni 8 akipan 118 vei akapna hita hi. US te in IS te akap na ah IS te tank, mawtaw 5 leh check point khat kapsiat sak hi.

Pakistan gam Islamabad khuapi ah PM Nawaz Sharif deihloh na hang in mipi tulsawm lom in, Sharif tenna inn ah pai in deihlohna lungpho laknanei uh ahih man, palikte leh mipi te nasia tak in kisuk na om ahih man, palik leh mipi te zali liam in mi sagih si cihi .Hih a PM pa uh adeih loh na hang in 2013 kum kitel lai in me guksimna om hang leh nekguuk na tam lua hang hi cihi. Hih lungpho na ah amakai te pen,Imran Khan ( criket star lui) leh Tahir ul Qadri hi in, PM sharif pen aza pan khawl ding pen mipite ngetna ahihi. Pakistan Galkap thunei pi pa in zong alemtuah hang lemtuah zolo hi.Mipi te in ka tup kasawm uh ka ngah mateng uh khawllo ding hi ung cihi.

Israel te in Palestinians te leitang Acre 1000 khawng laksak ding ci in radio pan genkhia hi. Alaksak na ding hang pen in Palestinians te in Israel te tangvalno thum June kha a athat sak hang ci hi.

Tunung kha a Beijing khuapi ah ganja tawh aki man Taiwan mi, kineih khemsiam Kai Ko pen thong ah ni 14 atang khit ciang suakta hi cihi. Nung nipi sangkah ninga ni in Beijing ah press conference a neih na ah mipi te kiang a theihsiam na ding in, thumna nei in, ni dang ciang ganja zang kik nawnlo ding hi ci in gen hi. A zing ciang Sani ni in, Taiwan ah zong media te 100 val te kiang ah thum na mah nei hi. Tua lai ah Hongkong flim star Jaycee Chan (Jackie Chan tapa) a thong kiat pih pa thu aki dot ciang , amah pen mi hoih hi in, lawm ta ka hi suak ding uhhi cihi.Amah pen tu dong mah Beijing ah thong kialai hi cihi.

Ebola natna pen Senegal gam ah akhatvei na ding in ki mu hi cihi. Hih natna pen Guinea gam pan Senegal gam ah vanleng tawh apai khat pa tung pan in kimu hi cihi.Hih nat na hang in mi 1500 sikhin in mi 3000 te in natna nei uhhi.

Ciannuih

Thangno pen asungpa akhem aki pan a lung nop nawn lo a, a sungpa maimuh na ding in gamta ta hi. Hih thu hang in khua sung ah mite in, sung lel, zi lel ci in, gen uhhi. Hih thu in Thangno ngaih sut na tawh ki leh bulhhi.Thangno ngaihsut na ah sungta makta cih pen anei zawzaw in ki huh ding, ki pan pih ding, nung le ma lamte et tawm neilo ding cih ahihi.Ahih hang in zi lel ci in mi gen azak akipan lungnop het lo in ,a zi tung na ngawng ah sim heh heh mawk hi.

Ni khat avak a leh alawmte zu dawn te tawh ki tuak in amah zong zu dawn ngeilo ahih hang, ka lungnop na ding ci in , dawn hi.Zu dawn ih cih tak teh mu le mal neilo in, ih ngaihsutna khuak te hai sak hi.Lungsim amsak hi.Thangno zong adawm dawn a leh kham lua ta in, hoi dangdangmai hi. Tua bang tawh inn ah ciah in inn a tung tak teh a lung kim loh na teng phul in, a zi kiang ah ,azi minpi in lo in, “hongpai hongpai , mi te in zi lel ong ci, ken ong lel maw, kitum ding , inn nuai ah hong tuaksuk ci in, to hi.

Thangno zi in zong lamdang sa lua in, nidang in ” ngaihno” ci a hong sap hi a ci in, tun bang tuak ahi tam maw ci in, hehns nei hi ing teh ci in dawng veklo in akoih leh Thangno zong cih na ding theilo in, zukham lua in ihmu suak hi. A zing sang teh Thangno apil vang ciang damdam in aw nem tawh hopih in thu ikup piha,a omdan teng a gen teh Thangno in a zi grnpihna teng thei in,a zi pen zipil, zi hoih hi ci in muhi.

LST sung ah David in Nabil te inn kuan a thah sawmlatak in, numei pil Abigial in pil kam tawh thu agen tak ciang David ahehna kam in suakta sak hi. (2samuel 25:32) Tekoa khua ah numei pil khat in, Joab galkap mang pa sawl bang in a gen tak ciang,Absalom leh Kumpi David ki mu sak thei hi.Esther kumpi nu zong kumpi kiang ah zahtakna tawh thu a gen tak ciang a mipih te a honkhia thei hi. Tua ahih man in zi hoih pen a pasalminthan na le lungdam na hi cihi.

Zi hoih pen suang manpha sang manpha zaw cihi.( pau. 12:4) Numei pil anei inn kuan, veng leh paam, khua le tui, pawppi leh mipi te hamphat na hi.Abelbethmaa khua ah numei pilkhat om hi.Joab galkap mangpa in tua khua sung ah Sheba ki ci kumpi langpang om ahih man tua khua suksiat sawm hi. Tua Abelbethmaa khua a om numei pil in Joab galkap mangpa kiang ah thu hoih tak in a gen leh Joab in tua khua susia lo hi. Numei pil nu in tua khua honkhia thei hi. (2 samuel 20;14-22) Ref: Time, jpost, The stat paper, bbc. Cin Ngaih