Iraq gama Mosul khuapi ah IS te’n mi 60 that

Iraq gama Mosul khuapi ah IS te’n mi 60 that

Nov. 12, 2016: Islamic State galkap ten tu kal sungin Mosul khuapi ah Iraq galkapte huh/kipawlpih ci-in mi 60 val kaplum uh hi ci-in UN in zan in pulak a, Iraq galkapte leh a pawl ten Oct. 17 panin Mosul lak kik ding hanciam in, a kipat khit nung uh IS ten mi za tampi that ta uh hi ci-in UN human rights zum in gen beh a, Mosul a kilak kik zo pah kei leh kithahna nasia zaw sem ding hi ci-in a lunghimawh thu uh gen beh hi.

IS ten a kaplupte uh puang eng silhsak uh a, a puan tung uh-a laitui san in “gam lehheek/kumpi langpang (traitors) leh ISFte’ agent” cih gelh uh a, a luangte uh Mosul khuapi sunga mei khuam (electrical pole) tuamtuam ah khai uh hi. “Pithai (Tuesday) bekin IS ten gam lehheek leh Iraqi Security Forces (ISF)-te tawh kipawl ci-in mi 40 kaplum uh hi,” ci-in UN rights office spokeswoman Ravina Shamdasani in gen hi.

Mosul khuapi nisuahna lam-a sunga teng Abu Saif in zong laitui san in, “gam lehheek leh agent” cih laimal kigelh siluang muh ding tam mahmah a, mi 30-40 kikal ka mu hi ci-in gen hi. Daesh/IS ten mi hon mat in, mun khatah koih khawmin pawl khat thau tawh kaplum uh a, pawl khat a ngawng uh tansak uh hi ci-in gen beh hi.

UN in a genna ah Mosul ah kum 27 mi pasal khat pithai ni-in mobile fon a zat manin IS ten that uh a, Nilaini in Mosul leilu lamah Iraq galkapte tungah thu zasak ci-in mi 20 that uh hi ci-in gen hi.

A thahte uh pawl khat tungah ISFte tungah thusim pia ci-in laitui san in gelh uh hi ci-in gen beh hi. Hih kithahna thuakte ISte thukhenna inn (court) in thah dingin a mawhpaih vive ahi hi.

Hih kithahna thu khempeuh a kitheihna pen IS ten a thahte lakah pasal khat a si kineihkhem a, tua pa hong suakta a, tua pa’ tung panin thu kingah hi ci-in UN rights office spokeswoman Ravina Shamdasani in gen hi. Source : USA TODAY/The Hindu/ Thang Khan Lian