Interview with TS Khai (Singer)

Interview with TS Khai (Singer)

Zomi Siamsin Magazine 2009 a suah dinga Kawlgam Lasiam T.S.Khai 10.3.2009 nitaka Tg Zam Thuam te holimna

Siamsin: Hong kitheihna ah TS Khai hong kici ven, na min taktak bang hi a, kuate sungpan, bang kumin bang munah piang na hia?

TS Khai: Pa Thang Sian Khai hi. Khangnote in TS Khai in hong theizaw uh. Pimpih khua ah Feb 23, 1957 ni-in Pu Huat Cin le Pi Kim Cin-te sung pan piang ing. A nungta sung pan a u pen hi ing. Hong gen suak leng ka zi Nu Zam Ngaih Lun tawh1989 kumin kiten in tulaitak tapa 5 le tanu 3 tawh Tahan 14, Kawlpi-ah teng ing.

Siamsin: Tua leh bang muntengah sang kah ngei na hia, Tan 10 e, koipan bang kumin ong na hia?

TS Khai: Ka khua uh Pimpih ah tan 4 dong sin ing. Tua pan tan 5 Tedim High School, tan 6 pen Dolluang Middle School, tan 7 pen Hangken Middle School, tan 8 pan tan 10 pen Tedim High School ah kahkik ing. Tan 10 ka tun pen 1976 kum hi-in, tawpzel kah zelin 1978 kum ciang Thuklai High School pan tan 10 nitak sang tawh ong ing.

Siamsin: Bang kum in University lut na hia? Tua ciang bang University tengah kahin Siamsin sung koibang kihel cih hong gen ve.

TS Khai: 1978 kumin Yangon Regional College No 1 Bothatuang ah Philosophy tawh sang lut ing. 1981 kum dong ka kah khitciang kum khat khawl in 1982-83 ciang Yangon University ah kahkik in 1984 kum teh Philosophy tawh BA zo ing. Siamsin sungah bel Zo minam ni, Khuado cihte ah Tedim Family tangin Music lamah kihel den ing. Lam lam (Ngeina lam, lam tuamtuam etc.) kihel kilkel keng.

Siamsin: Zomi sungah nang hong kitheihpenna pen lasakna lam tawh cileng kikhiallo ding a, bang hun pan lasak, laphuak kipana, bang hun pan studio-ah sa na hia?

TS Khai: Lasak cih veva ciang hamsa in, 1973 pan kipan Choir makaih kipan ing cileng nuamzaw ding um ing. 1975 pan kipan Choir la phuak kipan ing. Ka phuak masak taktak pen 1974 kum pawl hi inteh. Love song khat hi. “San mun muang sa lelkha ka hiam?” cih hi. “Sing kuang le ai kuang” sungah ka sung pa Len Cin Thang in sa, kuaman hong tam theihpih kei.

Tua kum pawl mahin (1974) lungdamna thu hong kigen ciang pomkha in Pasian la bek nasa suak ing. Tua laitakin Love song sa leng hell tung dingin kingaih sun ing. 1981 kum ciangin “Sihna Kigo Zo, Vol 1” tawh studio-ah lasak kipan ing. Tu-in Vol 11 tungta, kei mahmah in main vocal sep hi. Tuama in Salvation quatet sa in Thuklai lam pan kipan ZBC gam tengah kilehin sa kawikawi ung. Sihzang gamah gupkhiatna thu la tawh a tangko masa kihikha bilbel.

Siamsin: Tua leh “Sihna Kigo Zo, Vol 1” pen bang studio-ah khum na hia? Lengtongte tawh e bangci kizop na hia?

TS Khai: Tun Logos kicita, tua hun a tuiphum pawlpite lakhumna studio pan ka khum uh hi. Tuiphumte gambup zumpi (Baptis Centre) ah om studio pen hipah. Upmawh lohpi lawhcing mahmah ung cih ding hi.

Lengtongte tawh pen 1983 kum hi-in teh hong khum masak uh, ken dawng thum saksak ing. Akhum masak uh ahimanin studio lam tawh kisai muhna theihna neikhin cia, kithuahpih ding hong zawt uh hi. Vol 1 ah Lengtong Pauno, Suamang, Vum Nang, Ppi, Lamvung, Am Pau le kei kihel ung. Suamang in saklamte tawh i deihkhop theih ding la dawng khat hong phuak in, hong ci-in “Tun sung khat pan” cih la phuak ung.

Lawm Vum Nang in a zak ciang ken sa ning hong ci pah. Ka saksak uh leh mi-in hong deih peuhmah Vum Nang zong lungdam peuhmah in dol singkuang khat tawh ka laphuaksak man lungdam hong ko. Tu dong a singkuang deih kep mahmah lai ing. Ken bel love song salo ka hi ciang lawm Vum Nang ka khin hi. Zogam la le gualnop la khat sa ing. Stage show cih khawng bawlkhawm man kei ung. Tua zawh kitam thuah man nawnlo cih ding hi.

Siamsin: Nang makaihna tawh la khui bangzah khumta na hia? Bang la nam khuma, bang haksatna khawng na tuakkha a leh?

TS Khai: Khui 22 khumta ing. Producer omloh haksa cih ding hi. Anazaw lai pen i Zomi pih ten Zola khui a kinloh mahmah hipen sa ing. Tu dong mah cih ding hi. Khuapi sunglam te’n tha hong pia mello in singtang lamte thapiakna bek cih phial ding hi. Khuapi lamte in bel lei zong a lei sawm ngiatlo hi. Tua mahmah khua ngaihhuai sa ing. Nulepa pawl khat bang “Ko kata ten kawlla le mangla bek ngai uh” hong cih san zen hi. Minam itna neihlohna khat in ngaihsun ing. I sila lungsim kipaizo nailo hi-in teh.

Siamsin: La lamah kua in hong huh pen ahia? Tua ciang kuan hong pahtah a hia?

TS Khai: Lasiam Kam’ i pa Pa On Khan Pau in tha hong pia pen cih ding hi. Khui thum ciang bang hong hawmsak. Lungsim tawh kisai tampitak tha hong pia den. La hong pantah lam gen ni cileng mangngilh theihloh ding khat pen USA a om, Pu Dai Khan Ngin hi. Ka sia masa cih ding hi. Ka neu pan la lamah hong pantah pipa hi. A mah hangin la tawh kivak himai ing.

Siamsin: Stage ah e, na lim sak hia? Lasak in bang mun bang gam ciang na va nawk a leh? A diakdiak in i gam sung ahilo?

TS Khai: Studio lasak nuam ka sak zahin stage pen nuamsa keng. Tam sakzo keng. Kawlgam ahilo India pan Lamka dong, Singapore le Malaysia-te pai ngei ing. Lamka pen sumbawl kawm, khualzin kawma a tung hi ung.

Siamsin: Siamsin sungah lalam le music lamah kihel bek ing na ci tawh kibang hong sa ing. Tua leh lia le tang vai-a na buai uh pen bangci dan ahia?

TS Khai: Ka sang kum (laisin kum) dangte ah minlawhna tawh kisai thubuai tam khol kei. Ei deihna bang tek Lia le Tang deihten Lia le Tang, Salai le Mai deih ten Salai le Mai ci-in kisam lel ung. Senpi den lel cih ding hi. A’ihhang 1983 kum Zo Minam Ni in them na buai ung. Kei le Am Pau pen Siamsin tanga lasa dingin hong seh uh hi. Them kibuai nuam pian ahimanin “Eideih bang tawh kisam ni” ci-in sun thapai a kithum hinapi hunukte in kei hun hong tun ciang, “Salai Thang Sian Khai” ci-in hong sap ciang ka hehsuak lua in, stage tung ka tun ciang, “Ka min pen Salai Thang Sian Khai hilo in Tg Thang Sian Khai hi. Khasia mahmah ing”, cihkawm tawh ka lasak ding “Tunnu Zogam” sa ing.

Hih ka cih khit phet leh upmawh lohpi Siavuan, Ulian pipi nangawn a omna munpana hong diang ngeingai uh. Eimi teng hong dian ngaingai teh Professor-te, Ulian-te in “Na pawi uh ah no teng mah bangci na’i vua” ci-in hong ciahsan pah uh hi. Amin in hong gen kei ning, ka mi zahtak mahmah khat bang apuanten lensa in hong dingto zen mawk. Kei zong la tah man zongin sa thei nawnlo pah. Stage tung pan ka tuaksuk leh i khanglam sanggamte khat in a temkun hong dokin hong len sawm, tua ciang lawm Cia Pau leh Mangpu in tuapa kiang, “Lia le Tang i cih pen temta a kihta nam hilo hive aw” na ci in tua pa hong dai. Sanggam Hakhate khat in bel, “Hai gamtat si cia,” kawlpau in hong ci. Ken zong, “Nomau haitat masa hi veu teh” cikik pah ing.

Tua ni ka lasak sung eimite adinglo kuamah omkei ung hong ci uh. Ka kinial, ka kisawn laitak un Suangpi khua ka sanggamte 8 khawng in,”Gulsih thamsih nuam na hiam?”, ci-in hong zawngkhia. Mihing 8 le khat hi-in kitom zolo in ka zuih leh eimi nupi khat i Zozu zuakna khat ah hong sel uh. A melhoih sim heauhau khat hiveh aw, kua tak hiam cih thei man keng. Kei hong sel khit uh ciang sawtpi buailai dan uh hihtuak. A nitak teh Cia Pau (Cin Khua Pau) le Mungpu (Thang Sian Mung) te innsapna ah Salai le Mai aihna ci-in zan thapai zu dawn, la sa kawm in zanhak in lam ung. Uang gamtat mahmah ung. Tua kum tan 10 ong sazian radio pan hong gen ciang Lia le Tang bekbek hong gingkhia pah ziahziah. Tua pan kipan nasiataka kikiplet semsem hi cih ding hi.

Siamsin: I “Zo Heisa” khui e leh bangci hong pian khiat ahia?

TS Khai: Sumbawl, khualzin kawm hi. Behiang khua ah Zomi bekbek om hinapi tua munah gamdangmi ci-in mat ka thuak ciang i gam le lei taktak i neih nailohna thak pawkin ka phuak uh hi. Saklam pan i sanggamte zong ei kiang hong pai leh gamdang mi hi ci-in hong kimatsak ciang, ei mahmah zongin huzo tuanlo, tua mahmah ka phuak pipen hi. Ka thuakna tungtawna hong piangkhia hi. Hih series tawh kisai hong sikpi le hong vaihawmpi pen Khampu (Hatzaw) hi. Tua hun laitakin gualnop la mawkmawk in hong kingaihsutsak. Tunai lam ciang gam itna, nam itna ahi lam hong kitel sansan, beita hiam, om nawnlo hiam ci-in hong kidawpsan zawsop.

Hih khui tawh kisai in ka sakzawh kum khat khitciang thukante in hong kan ci-in saklamah kha 9 bu ing. Saklam ka pai lam a theih teh thuneite in Cikha pan Tuikhiang ah hong delh suk. Lam kal pan kituak ung. Kei hong mungei omlo hi ding hiven, “lasa siam Thang Sian Khai na theikha hiam” ci-in hong dong in “Theikha keng” ci-in paisan ing. Tuikhiang a tun uh ciang kei ka hi lam thei pan uh.

Tua pan a sun, a zan in Cikha ah hong leh delhto kikin, kei zong zan thapai ihmu theilo, bang thu hang cihlah hikholloin, ka ihmuh theihloh veve pai kholkhol mai ning ci-in khuavak kuan teh Cikha pan ding khia ing. Ka dinkhiat zawhhiat teh Department namkim pan ka zintunna hong umlian uh ci. Khenman ka tun teh a khua ngei tui ah maiphiat in ka om leh hong pha lian. Tua laitak ka maiphiatna ka sam kawt hi ding hiven ka sam kilteng na mam hih tuak. Leh et loin hong pai suak san.

Ken lah athu tam theilo. Khua sung a tun teh “a thacing a samkil lasiam Thang Sian Khai hong tungkha hiam” ci-in innsim na sitto pah. Lawmte khat in inn awng khat ah hong khumcip, apua pan tawh hong kalhsan uh. Kei zong tua inn sungah sun thapai bucip ing. Ka kimah kileh thapai. Bangci ahiam i lau teh i zun suak pahpah. Tua zong a nawngkaipi khat hi. Nitak lam teh thunei lam teng ciah in tua ciang lawm ten kong hong hon. Kei zong pusuak in gamgi kan pheipah ing. Hong matsawm takpi cih ka theih teh kha 9 sung bu cih ding hi.

Siamsin: Aw, hih “Zoheisa” khui pan late le la tuamtuam hangin mipi tung pan thapiakna, a lungkimhuai phadiak ahizong a thangahhuai phadiak cih khawng a om na?

TS Khai: Ka thangah phatdiak khat pen 1986 kum Zo Minam Ni ka lasak zong khat hi. Ka zi bang naupang peuhmah pan. Kawlpi Zo Minam Ni pen Tahan tualpi-ah kibawl in ken “Zogam vontawi tangpal ka hi” cih la ka sak leh mipi khempeuh in nasia takin tha hong pia. Khut a tum tawh khut alam tawh hong ki-awng ziahziah. Tua zong ka thangah khat hi. Thu kan ten bang thu hiam mah na ci zel dan hi. Tua laitak kei hong man ding pen ka lawmte khat na hi in, khua lamah themvei sung om cip pak ing.

Tam nawngkai lua kei. Zomi sung khanlawhna khat mah in ngaihsun ing. Tua kum mah 1986 kum in Sia Zaw Win tawh khut kilen in Tahan Tuiphum biakinn ah Crusade bawl khawm ung. Tua mun ah ‘No 4 Mangpha’ le ‘Lakik Thei Leng Maw’ cih la ka sak leh biakinn hong pai mipi khempeuh kap ziahziah tampitak in kikhelna hong ngah uh cih ding hi.

Siamsin: Tua leh Sia tua na lasak “Lakik Thei Leng maw” cih pen a nung thukhat om kici veh e, koi dan ahia?

TS Khai: Lia Niangpi le Lia Ciangpi (Lamka) te nuntakna bulphuh a hong piangkhia hi. Ka lasakpihte uh hi. Lia Niangpi pen Pasian nasem, lasa khat hi napi a lawmpa in zu bekbek hong ne in tua kawm pan zulung hong nei lailai. A zu kham ciang vel dikdek in nungsang ciah lehlah temtawng tawh delhin vasamkik zel. Tua ciang lah va zuikha zel. Tua bang teng tawh thuakhamsa pian hi ding hi ven cancer hong vei lawh in Imphal zato-ah zato sawt veipi na lum. Lametna a bei taktak ciang sih ding ngak in aom laitak in ama thuakna ngaihsutna teng lai in na at hi.

Laidal khat sim ah “Hon Ngaidam in Toupa” cih a mal gol pipi tawh a at ka lepkik hi. Pasian la sauveipi sung sa napi kiciantak na piangthak siamlo hihtuak. “Pasian mai-ah ding, ding hita bangmah tonpihlo hon ngaidam in Toupa” cih bekbek himai. Saklam ka tungtoh ciang hih lai dal teng a innkuanpih ten kei hong pia in, “Ka U Khai hong tung ding hi. Tua ciang na piaksak un, hong ci hi,” ci-in a sanggamte in hong ap hi. “Amah na muhnop leh han-ah om in teh” hong ci uh hi. Niangpi thuakna le laigelhte bulphuh a ka phuak cih ding hi.

Siamsin: Minam le gam itna la le Pasian la bek na sakna hang kicing na kisak lohna mun, na kisikna mun cih khawng a om na? Gamitna ding late na sak ciang hamsatna om ding cih thei pi a na sak maw? Aih keh a hangsan ngiata a sa na hia?

TS Khai: Kisik nading om peuhmah kei. Minam le gam itna la bang a tam theithei sak ding hi sa ing. Itna ngaihna la bang ken ka sak kei hang a sate thapia mahmah ing. Thei tikteka akisa hi. Koltan thongtakna khat om leh bel ka paulap ding ka zonsa hi. Gtn­”Zogam leitang ngahkik mateng khawllo e” cih bang hi leh Japan gal hun a Zomite in Zola in aphuaksa la Guitar tawh sak dinga, ka phuak hi,” cih dingin kiging ing. Aih hang tu ciangciang hong man nai kei uh. Pau kizomlo in 1985 kum in khat vei ka pa neute zato luppih kawmin “Discovery of Zoland” T Go Ngin gelh pen hong kikawmna pan thuneite khutsung ah tungin bu ngei ing.

Siamsin: “Zoheisa” na khumna tawh kisai Saklamte lungkim siamlo cih khat kigen ngei veh e bang dan ahia?

TS Khai: Lian Za Go in a mau gam Industrial lam kipawlna ah Director a sep laitak hi-in tua pan “Banghang thong sung na tungsak na hi uh hiam? Leitung beidong mang nawnlo ding hiven ci gaugau ci. “Nuihciam hong lel lo aw, pianpih na laizom hi ing” ka cih mah hi. Hong honzo ding kipawlna tampi om napi vankham, kumpi deihlo a sem lah kihilo in thong hong tungsak lawmlawm ci-a, ka phuak hi. Kha nih le ni 11 sung om ing. Nuam mahmah lel.

Siamsin: Lasakna bek mah sem na hia? Gamvai lam khawng e leh?

TS Khai: Gam buai sungin “Zomi khempeuh in Democracy deih ung cih tangko khawm ung” Thang Lian Pau-te, Nang Lian Thang-te pawl tawh hi ung. Thang Lian Pau bang Master kah kimlai adingkhia dingin komau teng mah i ka thapiak uh hi. Tedim gam tangthu ah thucing atamzaw in a magilhloh ding thu khat pen, Tedim ah 1996 pawl No 4 hong lang mahmah laitak “Anti drug Christian Youth Fellowship” phuan in biakinn tengah Zogam Lalpu-te pawl tawh lasa in vak ung. Tua hangin tampitak kikhel. Hih zong minam ka veina uh tawh ka sep uh hi.

Siamsin: Minam tungah la lam tawh kisai bangci muh na hia?

TS Khai: Minam khat in la le sia (sang le biakna) a thupi bawl mateng minam thupi, minam picing hi ngeilo ding cih kei muhzia hi. I mipi tampitak in biakna lam Sia tampi tak a zahtak bawl uh hang atatak hilo-in anung a om dollar a zahtak hizaw sa ing. Sangsiate tung i muhzia suksazaw lai ing. La lam tawh ci ni cileng minam dangte in hong depcipta hi. Ei la a ngai nuam, a sa nuam tawm sa mahmah ing. I la sungah i lungsim i koih kei khak leh i pau zong bei ding hi. Thahdote bang siamlo napi amau la mah ngai hi. Mizote tha kipiak zahin tha kipia leng eimi lasiamte hauzo lai ding hi. Thupi i sak theih ding hoihsa ing.

Siamsin: Lasa sungah nu khat pa khat na hih na tawh na pattah khiat lasa siam kua teng teng om ahia? La lam kipawlnate khawng bang ci muh na hia?

TS Khai: Sia Lianpi (Tang lungtup), Sia Suangh Nang (Saizang), Tg Thangta (Idol 2008), Kam, Sanlun (Ngaih Anglai) le adangdang tampi zong om. Kei pattah mah ahi, kei pattah hi ing cih a utlo zong om lai (nui kawm in). I pattah sunsun teng Pasian nasem vive mah hong hih toh ciang nakpitak angtang ing. Tua sangin anuamzaw khat pen “Sia aw, na la hangin kapa tawh kilem ing, No 4 pan kikhel ing” cih amunmun pan i zakkik ciang genzawhlohin i biak Pasian tungah ka lungdam. Kipawlna lam pan bel Zomus pen la ukte ading nu le pa hi ci nuam ing. Adiakdiakin Singapore Zomus-te tung bang ah kei ading atuam in lungdam pha diak ing. Thupi sa ing.

Siamsin: La na uk na-in na sangkahna hong nawngkaisak na?

TS Khai: Lai bel ong den ing. La i uk ciang laisim ding bel hamsa kisa peuhmah, Radio khawngah lasa in sum tawmtawm i ngah teng tawh nuam kisa mahmah. Laisim tha hong dahsak mahmah. Khangnote ngaihsut picing takin om huai.

Siamsin: Tulaitak bang sem na hia? I Zola bangci leh na ci a? Bang gelna na nei lai a leh?

TS Khai: EBC gambup Music Director sem ing. Ka cidam nawn kei. La a sa zo nawnlo hita ing. La ukte laptoh ding le i la mipi in bangci kin ding cih ka ngaihsut laitak hi. Quality nei la khui a piang zawh ding hanciampih nuam ing. La hong ki-ukloh pen quality a neihloh man zong hi. Leitung level ah taizawh ding ka ut pen hi. Zogam sungah tu masiah laphuakpi pen Zogam Lalpu, Thawng Kim le kei hi-in ko bel D le A7 kikal ah ataitai suak hi mai ung. Guitar siamten la hong phuak kei leh i la sanglo ding hi. Thawn Khawm le JK Kam in la hong sak a Kyaw Khine cihte pawlin la hong bawl teh, them a kisangto zawhiat hi pan.

Siamsin: Siamsin Magazine pan la tawh kisai in Zomite bang na vaikhak nuam a?

TS Khai: Ka vaikhak nop ah, la nam tuamtuam neih lai ding phuak tangtang ding vaikhak nuam ing. La in gamgi neilo in hong pumkhatsak cih phawk huaisa ing. Haleluijah lasak pawi in i lungsim tampi hong gawm hi. Tua ciang Sia a kicite limlim zahtak bawl ni. Zola pen ko lai pekpan kisa thei nawnlo hi. I Zola beek theih ding kilawm sa ing. Kachin-te bang studio ah la hong khum leh Yangon pan akhang hinapi a ngeina la uh sa thei setset hi. I Zola i kinloh pen dah huaisa ing. Ka inn veng (ka tenna ngei khat) ah Cassette nei inn 8 om in Zola Khui ka khum khat bang khat zong in neilo mawk hi. Tuaci lo in tha kipiata ni.

Siamsin: Tua leh Siamsinte tung e?

TS Khai: Zola, Zo ngeina mah kan tangtang in a uk tenten Zomi nong pian ding uh Siamsinte tung kong lunggulh pen hi. Tua banah i minam hihna ahi Lia le Tang te maizumpih loin Siamsinte mah in nong zat tangtang ding uh, minvai in mi a nawngkaisakloh nading uh le mithupite mah bangin i minam hihna zumpih gamna (minam hihna hangin amaizum lohna) nong neih ding uh hong vaikhak nuam ing. La lam tawh kisai-in la tawm uk leng zu le sa tawh kizom pahpah den hi. Siamsin ten sauvei i zat theih nang tuate tawh zom pahpah nawn kei leng cih ong vaikhak ning ei.

Siamsin: Lungdam mahmah ung ei leh.

TS Khai: Kei lungdam zaw ing ei. Mangpha ci ni ei leh.

Siamsin: A pha sem!
Zomi Siamsin Magazine