Innkuan nupakaal ~ Lengtong Pauno

Innkuan nupakaal ~ Lengtong Pauno

Aki itpen, aki ngaipen, aki hehpihpen, aki khualpen, aki masakpen, aki neekngaihpen leh, kuamahdang alahkhiatloh aki lak, kuamahdang apiakloh akipia pen, nupa akicite bek ahi uhi.

Ikhuapih ituipih, ibeh iphung, iki naipih tanau tetawh iki thutuakmel kei a, inntuan sate bang, inu ipa ipi ipu ini igang isanggamte tawh iki lem melkei leh ki hawhlohziau, ki leenglat ngeiloh lel tawh piangpiang maimai theilel a,

innkuan nupakhat kilemlo in kisia taktak mawkzen lehang maw… ki hawhlohziau leh kiholohziau khawngtawh hong maimaithei vetlo hi. Nulepa sanggamte tawh khakhat ikisiat sang’… izi ipasal tawh minit 5. bekbek kisiatkhak… namahmah zawlai hi, ci uhi.

Tua hi a, leitungah na nuntak tawmvei sung adingin nang’ adinga athupipenin, nazi, napasal ahi hi. Ka lungdam, Munkhai’pa

BUMLEHNA LA, HONG PIAN’NA THU

1985 in Manipur, Singngat sub division, Lungthul D khua kapai hi. Papi khatin: “Kazipen, ka nulepa leh ka naute tengin, deihvetlo uh ahihmanin, kam khatpau in banglo khat hih leng, hong mawhsakden uh hi.

Lengtong Pauno laphuah theingeilo maw? Nazi hangin na tate hangin, sanggam nulepa mudah ke’n. Zileta ki zongthei a, tunlezua leh pian’pih laizom ki zong theilo, acive leh… hongci la’la’ pahpah uhi. Bangcih banglawh ding kahiam?” hongci ngeungau mawk hi.

Bum lehna la dawngkhat phuahkulveem maw. “Na nulepa adingin, natapa na it leh, azi (na mo) it in. Na tapazi pen, na tanu ahi hi. Na naute teng’ adingin, na upa nait uleh azi it un. Na unu uh ahi hi” cih lakhat phuahloh aphamawhpan a, Emergency bumleh la khat hong piangkhia ahi hi. Ka lungdam, Munkhai’pa

TOPA’ ZATDAN ZONG ATUAMTUAM

Sia Khambawi'(Rev Dr Hau Lian Kham)cialpi bawlbawl hunlai in, Sia Khai(Rev Dr Chin Khaw Khai)in zong azuihzuihlam kathei hi.

Loudspeaker, microphone pan a thugen pen, Sia Khambawi ahi hi. Sia Khambawi’ thugen angai azate’ ainn alo, ameikiang ataptungah, hawhngiat a anungzuihkik kheekhee pen, Sia Khai tepawl ahi hi.

Ko’khua bangah, “Sia Khambawi’ cialpi bawllai a, Sia Chin Khaw Khai’ hong genpihna tawh gupngah akitel hi ing” aci honkhat aom hi. Ka lungdam, Munkhai’pa

MIHAI PA’N, AHAIPIHTENG MAH DEIHSAKSESE

Tu bang nuntak dinmun’ katun’teh, katheihlohlam kathei a, kahih kasep theihtheih danin ka hai’pih tengmah deihsakin lai kong gelhgelh hi.

Lungzuangselo, kuamah e’ngtuanselo a, ihih ipian’ itun’na tan’tan tawh Topa’ tunga i lungkimding ahi hi.

KASIN’SA KHAT:

Ei kumtamkhinte pen, i ihmut suaka, i ihmu theikeiphialzongin, dinglo, tulo aa, lupna tunga mitsisa a iluppen itha tampi adim’ ahi hi.

Ding, tu. icih ciangin, imitin muhmah nei in, ibilin zakmah nanei ahih ciangin, mitsi a lup hithiat tawh kibanglo hi.

Kawlte’n အာ႐ုံ၅ပါး acih, phawktheihna nam 5 te’ tawlngakhunpen, ihmu akici ahi hi.

Tu ateng cipak ni. Ka lungdam, Munkhai’pa

HOPSAWN, DEIHSAK THU (asuaktanailo, alunglutte’ adingbek)

*Hpakant ah sawt omluakha kahi tam?… Zakaang (No. 4.)icihte kum 4. sungmah kana zangh khamawk hi.

Phiatnuam, zanghnuam nawnlo, tua omlo a lah bangmah vai kihawm theilo, bangcih ding? Tha khatthu in phiat leengzong siding himai.

Kei pen akisun(kikap) hinaisamlo, ateep, adiik kahi a, khatvei kadiik leh siin 4.(၄ဖံုး) ahi hi. Nikhatin siin 4. 4veita ka diik hi.

Tua nikhat 4vei pen, 3vei in ka hahkat hi. Kahihzawh teh, siin 4. pen, siin 3. in, ka hahkat leuleu hi.

Asawtteh nikhat khatvei, siinkhat, ka tung zota hi. Tuateh ni2. siin1. khatvei. Ka hahkat toto a, kaalkhat siinkhat khatvei…..cih bangin Zakaang ganno(ေဆးဘဲဘဝ)pan Topa’n hong suakta sak hi. 1997 kum ahi hi.

Zakaang (No 4.)phiatna ahoihpen in, kipumsil (ေရခ်ဳိး) ahi hi. Ka lungdam, Munkhai’pa