Innkuan leh minam Dalan/ Lehheek taktak kuate?

Innkuan leh minam Dalan/ Lehheek taktak kuate?

Innkuan khat ii dalan taktak pen, innkuan sungthute’ kepbit ding sang in, venglepaam ah a puak kawikawi, eilai bek hilo-namdanglai tawh innkuan sungthu a taangkokote leh kilemloh theihtheih nading lampi tuamtuam zang in, a hanthawnthawnte a hi uh hi. Tua innkuan leh minam laptoh ding sang in, “siacip uh henla, mangthang khinta uh hen”, a cici a hi uh hi. Tuabang ginatlohna a sem sung ah, siatsak sawmngiat’ a ommah bang in, a seplam a theikhalo innkuanpih zong a om theilai hi. Bangsemcih theihloliang dingdong in, lungsim pumpi zawngkhal lualiang maw? Na theih hunhun in, kileh kik in.

Minam sung, innkuan sung ah a ki makaihkhial pawlkhat omthei gige hi. Khantohnopna lungsim hong paaisak pawlkhat lak ah, a kihhuai leh a lauhuaipen langnih-hiam tembang in hong susia khat in, thangpaihna tawh kithuah a sia in, thuhkik-nopna lungtang hizen hi. Mipawlkhat in, “Mikhempeuh a khangtokimthei hi veh”, cihbang lungsim piicing neikhalo mai uh hi. Innkuan sung nangawn ah, a kidem simsim unau, omthei mawk hi. Ih minam sung ah zong tuabang lungsimpua pawlkhat hang in, kitonkhawm theilo dinmun kitung theikha zeel aa, ih innkuan leh minambup in, a kithuaklawhna zong tampi omkhinzo hi.

Innkuan leh minam khantohna ding a deihsaktak pi khat-in, tua innsung ah lut in, thuneite tawh tutkhop , kikupkhop leh kiholimkhop ding a hihi. Inn pualam pan, a awngawngte bang kicih leh hoihding hiam? Laiguizom veve ngaihsutna kibang kimlo a hih man-in, kitelsiam theihna ding’ lam kilak leh kihanthot ding a hihi. U nau kilungsimneihna a omloh na ding in, a khangcing khat in, innkuan piazia-kilamzia leh minam lungtup a theih leh a telkim ding kisam hi.

Leitung ah nulepa, unau sanggam laizom a neilo te, mihampha kici theilo aa, neigige napi a neihlam a theilo te mihamsia a hihi. Neih lam thei gige a, a mukha lo te, milungleng a hi uh hi. Nei gige leh omkhawm napi-in, a kiho theilo leh a ki-it theilo te, minuamsa-mihampha kici theilo hi. Tua sang a niamzaw lai ah, ulenau te khual zolo bek thamlo in, a siatnang a bawl leh a pholaak te migina lo taktak innsung gal a hi uh hi.

Ih paunak in, “Deklam tuktum zong galsuak thei” naci aa, tuabang lungsim a suah theih nading in, khamtheih guihtheih zatna in, lung-amsak ci-in, ki ngawh theizeel hi. A hizong in, tua khamtheih ki helkha kilkello, angsung ngaihluatna in, lauhuaizaw kanlai hi. Mi-etpi hihding utluatna leh haunopluatna zong, a zungpi khat hi aa, khinkhai theihna leh pilna laitan tawh a kivaak te sang in, sumbawl/hauhdingbek thupi a sate’ tua guu-zung in, kaai-awk zaw thei hi.

Innsung innpua khenthei lo aa, innkuan sung thu genhuai/lo khenlo in, a taangkoko, a gengente pawl pen, innsung pan a hihleh zong, lungsim ngaihsutna kicinglo kici citciat hi. Tualo innsungthu a thei leh a genkhia thei ding pen, innsungthu a thei leh tualtel aa, tua innsung khantohding a deihsaklo lenglaa a hih keileh biikhalap pan, a ngaisim a vengpa zong hi thei hi. Tua bang mite-in, thudik lunggulhna sang-in, tua innkuante minsia-saknuam hizaw hamtang hi. Pawlkhat te leuleu, innteek taktak te bang in, kineihsiam uh aa, niinteen puansilh zong a gial kibang in silh laideep uh hi. A hizong, a lungtup pi bel, innteekte suksiat ding bek hi ngeu mawk hi. Sungthuthei innsung gaal pen a pualam gaal sang-in, lauhuaizaw thei kici hi.

Bangbang a hizong, innkuan ginatlohna ih zuakzuak leh, vantungmi bang-in mihoih mahmah pawlkhat lobuang in, etneuna leh simmawhna in, zangzaw uh hi. Hong ki-etneu na ding lel leh hong kisim mawhna ding lampi a sialsial lelpeuh ih hi kha hiam?

Minam vail eh Innkuan vai, ih innkuan sung ah kikup thumin masak ding hi aa, leptuah a kulleh zong khuanu khuapa, hausa zahtaakhuai te tawh kikup khop ding a hihi. Ih ngeina ah, huihdiik masa, khua musa te mah piicing ih ci uh hi. Itding zahtaakding bei bang in, phenglen ding ki hanthawthuai nawnlo hi. Hihmun ah, thutheihna, pilna leh ciimna cihbang khentel theih ding kisam mahmah hi. Meigong tagah, numei naupang, a thaneempen, a neu pen te khualna bulphuhding kisam hi.

A innkuanpih leh a minam a zuak a koko te, lambing thei kici hi. Na minam leh na innkuanpih te na ittakpi leh phattuamna nasem zo keizong in, siatna lam tunpihding kilawmlo ki-awihuai lo hi. A hih kei leh, sanggamte khuallo in, molhtum leh siiksan in ih zanglel hiam? Na innkuanpih, na mipih te midang namdang te tuatcilzeelding phamawhsalo liang lungsimsia neizen ding na hiam? A hih keihleh tuuvun silh ngia bang in, sangam innpih hi lo in, a kineihkhem lel na hiam?

Nagamtatna, nasepna leh hong susianuam midangte na panpihna hang in, na sanggam te’n sihlawh huai takpi mah maw? Dalan/Lehheek taktak kua, ki dong tel ciat dih ni. Nantalsuan (Kawlgam buaina hang in, sisan luang leh haksatna tuamtuam a tuak mimal khempeuh zahtaak piakna tawh)