Indonesia vanleng kiatna ah mi 54 si

Indonesia vanleng kiatna ah mi 54 si

Indonesia vanleng mangcip pen ki mukikta a, khuahun hoihlohna tawh atuahsia ahihi. Vanleng aki muhkik hangin atungah atuang khempeuh avek in mi 54 te asisa in na om uhhi ci’n Indonesia kumpi thuneite’n tangkokhia uhhi.

Zanni Tuesday ni in Rescue Team te’n amuhkhiat uh hi a, vanlengpen zancip cihi. Black Box zong mukik uh ahih manin athu ala tua Black Box tungtawn in kicianzawding hi.

Hih vanleng tungah US Dollar US$470,000 tawh akikim Indonesia Rupiah 6.5 Billion sumtang ngiat in akipua hi a, mizawng te huhnading in aki hawmkhiatsawm ahihi. Banghang in mizawngte huhnading sumtang apua vanleng pen tuahsiat citciat hiam cihpen ki lunghimawh mahmah hi. ZD Sawltak

Indonesia vanleng mi 54 apua khat mangcip

Indonesia te Airline khat mi 54 puasa in aleng hi a, Papua Province tungah alenlaitak Contact ki ngahnawnlo in mangcip cih AP News in tuni genkhia hi.

Transportation Ministry Spokesman Julius Barata in agenkhiatna ah hih vanleng pen Trigana Air Service te neihsa hi a, Sunday ni sunlam pawlin Papua’s Provincial Capital ahi Jayapura khua panin honglengkhia ahihi cihi. Papua ii khuakhat ahi Okisibil khualam zuanin alenlaitak vanlenghawl tetawh ki thuzakna omnawnlo cihi.

Vanleng pen ATR42-300 Twin Turboprop vanleng nam te hi a, atungah Passengers mi 49 leh vanleng nasem Crew Members mi 5 tuang uh cihi. Akhualzin nading pen Papua gamsung khua khatlehkhat akawmpakdingbek hi a, Minute 42 sungkhawngbek aziakaiding ahihi. Tua vanleng tungah naupang mi 5 leh naungeksen mi 3 zong kihel cih kiza hi.

Hih vanleng amancip hunpawl in Oksibil khuatung ah guah nakzuk mahmah a, mei kaigawp in huihzong hatmahmah hi. Vanleng atuk nading mun ah Minute 9 bek akisap akipan Contact ki ngahzo nawnlo hi ci’n Indonesia’s National Search and Rescue Agency pan Susanto in genkhia hi.

Hih vanleng amangcip pen azongding in vanleng khat kuankhiapah a, ahi zongin khuamialcip ahih manin kizongsuak theilo a, hongki lehkikphot uhhi. Zingciang Monday ni zingsanglam in vanlengzon kipankikding uhhi.

Papua gamsungteng taampilak singkung dimzihziah ahih manin abeisa hun a vanlengmang tezong aki mukik omngei mello cisawnsawn hi. ZD Sawltak