Indonesia Police HQ asim temtawi migilo 4 kikaplum, Officer khatzong si

Indonesia Police HQ asim temtawi migilo 4 kikaplum, Officer khatzong si

Indonesia gamsung aom palik te phualpi “Police Headquarters” khatah pasal 4 in Samurai temta namsau tawh sim uh cih AFP pan kiza hi. Tua namsau tawh Attack abawlsawm mi 5 tepen Police te’n thautawh kap uh a, mi 4 kaplum in, Police Officer khatinzong sihlawh hi ci’n kumpi thunei te’n genkhia uhhi.

Indonesia gamsung ah Suicide Bomb kitam in buaina tampi apiankhitdeuh, tu’n Police Headquarters ah migilo mi 5 te’n namsau tawh asim leuleu uh ahihi.

Hih buaina apianna munpen Sumatra Island aom Pekanbaru City sungah tuni Wednesday (May 16) ni in thupiang ahihi. Abeisa Suicide Bomb aki sukhamte mahbangin hih ngongtatna zong IS (Islamic State) te’n ko ii gamtatna hi ci’n mawhpuakna pulak, Responsibility la uhhi.

Tuni thupiang tawh kisai in Police te genkhiatna ah Minivan khattawh pasal honkhat Police Headquarters ii Gate maiah hong nawkphei uhhi. Tuakhit ciangin Police Officers te temta tawh hongsatphei uh a, Police Officer khat inzong sihlawh cihi. Tuaciangin Police te’nzong thautawh mi 4 kaplum pah uh ahihi. Khatpa pen taisuah uh a, ahi zongin akhuanung ah mankikthei veve uhhi.

Nung Sunday ni inzong Java Island tung aom Surabaya City sunga biakinn mun 3 ah innkuan khatin Suicide Bomb sukham in mitampi in sihlawh liamlawh uhhi.

Police Officer te lakah asipa pen mawtaw tawh ataihlup uh hi a, adangzong mi 2 liam cihi.

Indonesia gamsung ah Asian Games pen tuzawh khathum khitciangin akibawlding ahihi. Tua Asian Games pen August 18 ni akipan Jakarta leh Palembang City sungah kibawlding hi. Tuaban ah October khasung inzong Bali Island ah IMF-World Bank meeting kineiding hi. Tuabangin athupi mahmah pawilianpi 2 tak nei uh a, tuakawmkal ah IS migilo te ii ngongtatna pen kizomzom ahih main patauhhuai mahmah hi.

More: Indonesia ah tuahsiatna tamlua ahih manin Infrastructure Project honkhat kikhawlsak

Indonesia gamsung ah tuciangciang ahuaisia penpen in akiciamteh Bomb apuakkham pen 2002 kum a Bali Bomb puakkhammah huaisia penpen hi. Tua Bali Bomb hangin mi 200 val in sihlawh uh a, asi atamzaw pen gamdangmi vive ahihi. Zingciang Thursday ni akipan Muslim te ii antanhun Ramadan alutding hita hi. Tua Ramadan hunsung inzong amau biakna veve, adiakdiak in Sunni Muslim leh Shia Muslim te phadiak pawlkhat leh pawlkhat aki suamlum giapgiap te uh ahih manin, ki dopsiamding thupi khadinghi. Sawltak #zomidaily