Indonesia, Aceh ah numei kizuakvai tawh mipimai ah mi 8 kizeepgawp

Indonesia, Aceh ah numei kizuakvai tawh mipimai ah mi 8 kizeepgawp

Indonesia gamsung aom Aceh Province sungah zanni Friday ni in numei kizuak te mipimai ah ciangduai tawh zeepna kinei leuleu cih AFP pan kiza hi. Indonesia gampen Muslim gam ahih banah Aceh Province pen akhauh phadiak ahihi.

Numei kizuak, pasal leh pasal aomkhawm cihbang Sex Workers khatpeuh akimat ciangin mipi muhtangin ciangduai tawh zeepngekngek uhhi.

Tuabangin ciangduai tawh mipimai ah kizeep pen kimawhsak mahmah hitaleh Aceh Province in Islamic Law tawh kizui in athukhun uh laihsawmlo in, zatsuaksawm veve uhhi.

Zanni Friday ni in numei kizuak Sex Workers vaitawh akiman pasal 3 leh numei 5 te mipi maiah ciangduai tawh zeepna hunkhat nei uhhi.

Aceh Province ii khuapi ahi Banda Aceh City sung aom Mosque khat ii apualam ah akizeep hi a, mi tultampi takin enngeingai uhhi. Mipi a ente lakah gamdangmi Tourists honkhatzong kihel uhhi.

Mipimai ah mi 8 sat athuaksak uh hi a, ciangduai tawh sat 11 pan 22 kikal amawhna uhtawh kituak in zeepngekngek uhhi. Mipi te’n otsan ziahziah in, Photo leh Video azaih in abuai mahmah honkhatzong om uhhi.

Hihbangin Islamic Law tawh kizui in mipimai ah dann kipiakna “Flogging” pen Indonesia gambup ah Aceh Province bekin azanglai ahihi. Numei kizuak bekthamlo, pasal leh pasal aomkhawm “Gay Sex” cihte, sumtah kimawlna “Gambling” khatpeuh, zudawnna “Alcohol” cihte banah kiteenna omlopi in nupa bangin aomkhawm “relations outside of marriage” cihte akitheihleh kimanpah lianlian in, mipimai ah khauhtak in dann akipia ciatciat uh ahihi.

Leitungpen siatlam manawh semsem a, gamthupi leh makai muanhuai pipi inzong LGBT pen thapia in, panpih mahmah tamawk uhhi. LGBT cihpen asau in “lesbian, gay, bisexual, and transgender” cihna hi a, numei leh numei omkhawm, pasal leh pasal omkhawm, numei ahih keileh pasal tuahbangbang khatpeuhpeuh tawh omkhawmthei, pasalvan ahih keileh numeivan laihsak cihte gennopna ahihi.

Indonesia gamsung aom Aceh Province pen tuabang lamsang thukhun ah adangdang biakna te sangin khauhzawtham uhhi.

Rights Groups te’n mipimai ah cikziat huaitak in dann kipiak pen mawhsak mahmah uh a, nungkum inzong Indonesia’s President Joko Widodo in Aceh Province sungah mipimai kisat kizeepna “Public Whipping” pen khawlbawlding genkhia ngeihi.

More: Pasal leh pasal aomkhawm lawmta te mipi maiah tawsat ki thuaksakta

Aceh Province sungah mimal Population akigawm in 5 Million bang ateeng hi a, tualak ah 98% pen Muslim vive ahihi. Conservative Groups te’n mipimai ah kizeepna pen khawlsakding thukimlo uh a, hihbangin dann kipiakna hangin khuasung ah zahmawhvai leh gitloh gamtatna Crime tuamtuamte kiamtuam hi ci uhhi. Nang e, makai uliankhat hilecin bangci navaihawm sawm a? Sawltak #zomidaily