Indonesia gamsung aom ‘Myanmar Embassy’ sungah meikuang kilot

Indonesia gamsung aom ‘Myanmar Embassy’ sungah meikuang kilot

Indonesia gamsung aom “Myanmar Embassy” sungah meikuang kilotsuk ahih manin, Embassy sungah meikang pawlkhat om cih Reuters pan kiza hi. Zanni Sunday zingsanglam in Indonesia gam ii khuapi Capital ahi Jakarta City sungah thupiang ahihi.

Indonesia gampen leitung ah Muslim mimal ‘population” atampenpen gam ahihi. Myanmar, Rakhine State sungah abiakna kibatpih ahi Rohingya te kibawlsia ahih manin, pawlkhat lungkimlo uh a, amau gamsung aom Myanmar Embassy te tungah meikuang “Molotov Cocktail” alot uh ahihi.

Myanmar, Rakhine State sungteng buaina hangin Southeast Asia gamsung aom adiakdiak in abiakna kibatpih te uh lungkim hetlo uhhi.

Myanmar Embassy sungah meikuang “Molotov Cocktail” aki lotsuk vaitawh kisai in Jakarta Police te’n Sunday ni in Statement khahkhia uhhi. Tuasung ah agenna ah khuasung avil kawikawi Police Officer khatin Sunday zingsang 2:35am hunpawl in Myanmar Embassy ii inndawl 2 na sungah meikuang galmuh hi.

Tuaciang in Embassy Gate ngakin aom Police Officers te zasakpah hi. Meikuang aki phelhsiang khitciangin velcianna kinei a, Beer thawlsung ah datsi kikoih in, puansia tawh aki halkhit ciangin akilawn hiding in ki genkhia hi.

Jakarta Police te’n hihbang in agamta kuahiam cih akansan laitak uhhi ci’n Spokesman Argo Yuwono in genkhia hi.

Saturday ni inzong Jakarta khuasung aom Myanmar Embassy mai ah mi honkhat in lungphona nei uh a, Nobel Prize Committee te’n Aung San Suu Kyi apiaksa uh Nobel Prize pen laksakkik uhhen cimawk uhhi.

Tua lungphona pen Sunday ni inzong Jakarta’s City Central ah kizomsuak leuleu hi. Islamic Groups leh Activist Groups pawlkhat te’n akumpi tungah ngetna nei uh a, Kawlgam sungah Rohingya Community te kibawlsia mahmah ahih manin Human Rights Violation aomloh nadingin Indonesian Government in nasep kipanhen ci’n alunggulhna uh pulakkhia uhhi.

Related: Yangon ah Rohingya te hangin Buddhist leh Muslim kikal buaina piang

Myanmar, Rakhine State sungah abeisa nipikalsung buaina hangin Rohingya bekbek akigawm in mi 73,000 bang Bangladesh gamlam zuanin galtaikhin uhhi ci’n Aid Agencies te’n genkhia uhhi. Leitung Muslim gamtuamtuam te’n hih Rohingya te buaina vaipen lunghimawhpih mahmahtek uh a, tulaitak hihvai hangin Myanmar pen hongki muhdahbawl mahmahlaitak ahihi. Zomi te ih omna tekah pilvang tekni. Sawltak #zomidaily