Independent Newspapers te’n “Print Edition” khawltading

Independent Newspapers te’n “Print Edition” khawltading

UK gamsung thukizakna minthang mahmahkhat ahi Independent Newspapers te’n thuthang tuamtuam laidal tawh ahawmkhiat te uh “Print Edition” laidal tawh hawmkhia nawnloding uh ci’n aneipa in genkhia hi. Laidal tawh akibawl Print Edition akhawlna pen “Digital-only Future” ci’n Internet Online tungtawn bekin hawmkhia tading uh cihi.

Hihbang in Print bawlnawnlo ding cih akizak ciangin hih Company ah nasem Employee tampi nasep suplawhding uh ahih manin, pawlkhat patau mahmah uhhi.

Tuaban ah Independent Newspapers te in hih anasep uh Company pen Johnston Press kici Company te kiangah zuaksawm uh a, Johnston te ii Shareholders te phalna tungtawn in aki leidingvai kigelding cihzong BBC News pan kiza hi.

Independent Newspapers aneipa ahi Evgeny Lebedev in agenkhiatna ah hih khentatna hangin ka Independent Newspapers uh pen Quality neito tektek zawding a, leisim mi tampitak Online Platform tungtawn in aki behlapzawk nading in ki vaihawmding hi cihzong genkhia hi.

Tua hi a, hih Independent Newspapers te ii laidal tawh ahawmkhiat anunung pen 26 March 2016 ni hiding a, “Independent on Sunday” aki hawmkhiat nunung pen 20 March 2016 hiding cihi.

Independent Newspaper Company ah nasem honkhat zong Johnston Press ah kituahding uh cihi.

Hih Independent Newspaper pen 1986 kum pekpan in hongki pankhia hi a, kum 30 sung vilvel Newspaper laidal tawh ahawmkhia ngekngek uh ahihi. ZD Sawltak #zomidaily