Ih vawh Khaici banghiam?

Ih vawh Khaici banghiam?

Thubulphuh: Galati 6:7, Mikhat peuhin Khaici avawh bangin agah a atkik ding hi.

1. Gam le nam ading Khaici hoih ivawh hiam?
2. I nasepna ah bang khaici ivawh hiam?
3. Zi le Pasal kikal ah bang Khai ci hoih ivawh hiam
4. Tu le ta ading Khaici hoih ivawh hiam?

Hih thute pen Pasian i up imuan khit ciang, thupha ingah nading a izuih akul thute nahi gige hi.

1. Gam le Nam Ading Khaici Hoih Ivawh Hiam?

I minam i gam ading Khaici hoih ivawh kul hi…

Nepal tebang ganhing Bawng/Khui bia napi in a Pu a Pa te’n cihtakna khaici navawh uh ahih manin atu at ate khang ah Leitungbup ah micitak nam in kiciam teh hi. Gam hoih khempeuh ah nasepnuam Security ngah uh hi. England gam bangah mitampi mah Galkap ding in va om uh hi. US gam bangah tampi om uh a Mi gina hikei le uh hih USA gamah hizah in kila khollo ding hi… Christion lah hilo….

A pupa khangvuah a vawh uh khaici tu’n agah at-at ta uh hi. Nepal te cihtak dan pen Security sem te bangin ama Boss mihaupa kithah sawm leh amai ah amau singam kici zen hi. Tua zah dong a thuman citak uh hi.

Tualeh Nepal te micitak a kimu ahih leh ei Zomi te hong kikoici muh?…..

(a) Kawlgam thukan pawlkhat in :”Zomi te thu kankul lo hi, amau leh amau hong kikhia khia lel hi”… aci om hih tuak…. tua ahih leh tuni in Zomi te bangteng kipuah phat kul hiam? ngaihsut huai sa ing. Nidang i pu ipa te cihtakna teng ei khangthak ten mangsak ding maw, i pu ipa te lamsa innte zuakmang lel ding maw…..

Minam kiciaptehna Laibu kasim khat ah… Unknown- laigelhsiam khatin bangci hiam cihleh …” Russia te lawm naneih leh Suang tum khattawh kiging den in…” na ci hi.

Russia Paunak khat leuleu ah… “French Galhangte (Commando) Keel (Goat) nu in delh lehzong taikhia hi…” naci hi.

Atunga Russia te agen pen Piantit temah hikha inteh mate……

Minam dangte kihici muh cileng Zomite miten hong bangci muh a, en ahoih khaici bangteng vawhkhin, bangteng vawh sawm lai…. Ei Zomi te ahoih a hong kiciamteh ding utmaw, ut lo, ei Zomi te Pasian lam ah akhom khat ciang hita hang, ahi zongin minam vai ah Khaici tuh ding tampi kisam lai cih kei muhna hi. Cihtakna, Sumlepai, Ki-itna, Ki thutuahna, ki pumkhatna te vawh lai dihni. Gambeel pawlkhat omna gamkhat bangah Zomi kipawlna ading sum khiatding haksa kisa mahmah hi, biakinn a ding pen kipiapia lel hi. Zomi kipawlna a sumkhia den nuamlo khat pa mah asih teh Zomi kipawlna te mah buai hi, Pawlpi inlah Sivui zo nailo, Pasian lah Sivui dinga hong tuaksuk sam lo ahih manin ngaihsut huai hi. Mi namdang ten a minam uh ading Seh-sawmsuah-sehkhat piak in pia ta uh hi.

Tua banga i piak mateng i Zomi pen khangto ngeilo ding hi. Nang i kipawlna, Zomi kipawlna sum napiak loh pen na makaite a zo kisakha zenzen ken, nang mah leh nang mah akibawlsia na hih lam kiphawk zaw in.

2. I Nasepna Ah Bang Khaici Vawh

I nasepna peuhah tu ciangciang Zomi te pen acitak pawlleh a thuakzo pen pawlin kimu ing… Minam dangte bang Malaysia ann-sai khawngah nasem zolo napi ei Zomi ten kisem zo hi. Mailam ah icihtak lungduaina zomsuak ding hihang..

Ko nasepna bangah nasem ding Kawlmi te bek kideih a, Kawlgammi acih pen ei Zomi tengmah nahi pah lel hi.

I nasepna ah hun manna, siangthona, hanciamna cihte khahsuah ngeilo ding hihang…

Laigelhsiam Dr.P.Wood in bang naci hiam cihleh… “Nasepna peuh ah na lut hun dingleh na pusuah hun ding thei in…” na ci hi.

Hih bangte ah ahoih khaici avawhvawh hipah hanga, Pasian thu-um ihih lamzong a laklak ihi hi.

I nasepna, i omna, i zinna ah ei hoihna, hoihlohna te pen eimin bekinnapai lo a, i minam mintawh ana pai pahpah ahih lam i mangngilh loh ding kisam hi. Nang le nang naki khual zawh kei leh zong na Minam beek nakhual kul hi.

I nasepna peuhah, i omna peuhah zong kamkhum theithei kam hoih thei thei izat ding kisam hi.. Khatvei Malaysia ah ka naseppih eimi nupi khatin a pu ten bang acih zong hi lualo napi in, ahehna khat omleh a pute koko in Dawi Sikha peuh cici mawk hi, nikhat acih pen 2 vei bang pha ding hi… Dawi te ii Sikha hilai mawk leh keibang sunin mulengzong atai ding hing… hizah a kamkhum lo azatzat manin… amah Dawi Sikha suak masa zaw hi… nasep neilo, sumneilo lunggim… tuate tuak pah hi… Ken bangci kahiam cileh…” Nu Pau aw… i pu/boss te pen ikoko ding hilo hi, ei Christion hihang… i pute hoih isak keileh ei i ut hun a atawp thei hihang… koko kei lel in… ” kana ci hi.

US/Malaysia/India gam ah bel ipu te gei-ah en ei pautawh gensiasia, amau hong gensia theilo, en amau pau thei… ahi zongin I omna peuhah igamtat kampau athei gige I Pasian om ahih lam I mangngilh loh ding kisam hi.

I nasep neihloh ni inzong Topa’n kei ading ahoih zaw hong deihsak om ai ve maw ci kawmin thungen kawm a ilungkim lel ding leh, ihun awng sungah Topa mahtawh kizom a ihun imawk beisak loh ding kisam hi.

Pasian thugen siam Keneth E. Hagin in bang naci hiam cileh… ” Haksatna bek na opop leh lungkiatna hongkeuh ding hi..” naci hi.

Tua i lungkham mahmah hun sungpen pasian in hong Tem banga hong taat nuam, hong bawl phanuam nahi thei hi.

Laigelhsiam George Herbert in bangci hiam cihleh… “Huihpi in singzungte Lei sungah zung khasak a, abul kipsak hi..” na ci hi…

Apple Computer leh Animation Studio bawlpa Steve Jobs zong ama phuat Company pan kihawlkhia a tawm vei sung haksatna na thuak hi… Neektawm ding neilo in Coke bunghawm nakhawm ngei a, Nipi nisim ann mawkneek theih na ahi tai 7 gamlatna Hindu biakinn Hare Khrisna acihna mun ah khetawh ann ne ding kapai zel a lim mahmah hi… cilai hi.

Eipen ei Sai(Shop) zong ahilo, ibeh te sai zong ahilo pana hong kihawl khiat pen …”kakam sungah omle cin maw nang aw…..” cilai hive hang maw..

Tua Jobs akihawl khiat nasep neihloh sungin aman thu nakankan in khaici hoih tampi navawh khia hi. Asawtlo in Apple company mahtawh kizom kikin nasep neilo-a a omsung a akan thute Pixar te tun leitungah akizangpen hongsuak hi.

“Ka company pan hong kihawl khia kei leh hite kathei kei ding hi, hongki hawlkhiat pen kanuntak sungah thu hoih mahmah khat hi..”. naci kik hi. I nasepna peuh ah cihtakna khaici vawh leng ahun atun teh agah ki-at veve hi. Ei cihtakna hangin I nungah I mipih ten maipha nangah uh hi. Ei hangin I minam minamhoih in kiciamteh hi. Tua ahih manin ei minsiatna/ minphatna pen I minam adding ahih lam imangngilh loh ding kisam hi.

3. Zi le Pasal Kikal ah Khaici hoih ivawh hiam?

Nu-le-pa kaal ah bang khaici ivawh a leh, kimuanna (Trust) khaici ivawh hiam? zanlup teh kileh ngatna khaici maw, ki humsam nuai maw… bang i vawh a leh… Zi ihi a Pasal ihi zong kimuanna khaici iki vawh tek ding kisam hi.

Gentehna:… Khatvei Papi khat khuasung vak inn atun teh azi in a ip sung a apuak laidal sungah Mary min leh phone nambat mu hi… a Zi inzong… “e! lawm hih kuamin ahia …. ” a Pasal in…”E dena ka Sakol tai kidem a Sakol min hi e…”aw leh ciphot zawzen hi a Zi in, azing ciang a inn phone uh pai in a Zi in nalen masa hi, kua nahia acih leh Mary hing naci mawk ahih manin, a Zi in a Pasal hong bengvat in… “Na Sakol in phone hong set ei…” … ci in tua khit a kipan a Pasal muang thei nawnlo hi, tua danin innkuan kikal ah ki upmawhna om den in Khaici hoihlo kivawh thei hi.

Khatvei naseppih numei tetawh ann nekhawm in lawm numei te a Pasal ten tunghak leh tawng ding ahih cianga vaciah baih uh hi… keibel tu phiuphau lel in, lawmte khatin nang e leh na Zi lau lo maw hong ci a… ken … ” kei kazi in hongmuang mahmah lel veh e, ko kitawng ngeilo ” kana ci hi…

Innkuan Nupa sungah ahoih Khaici vawh photphot leng ki-upmawhna cihte om nawnlo a innkuan nuam kisuak thei pan hi.

4. Tu le tate ading Khaici hoih ivawh hiam…

LST sungah (piancil 26:5) Abiahang thumaanna, cihtakna hangin atapa Izet in thupha ngah hi.

Nepal gammi te bangin amau ii a Pu le Pate vawhsa ahi cihtakna, thumaanna khaici hangin tu’n atu ata ten agah at at uh hita mawk hi. Tualeh en itu ita te ading bang khaici vawh ding.

Pawlkhatin “USA gam pen naupang te khanna ding hoihnapi higam te hongbang a nulepa khawng hong et nawnloh ding lau ing, a ngeina uh ahoihlo pawlkhat om..” ci thei hi…

Kenbel… “Hoihlua ding USA te ii ngeina hoih tengleh Zo ngeina hoihteng tawh tate pattah leng nak hoih lua ding” kana ci hi…

Tate pen ei vawh bangbang a honggah khia ding uh hi. Ei siamding zong kisam hi. Sum deih kawmkal ah Tate hunpiak mahmah ding zong kisam hi. En sum zongzong dingin tate a lian teh ideih hongbang kei leh zong I sum zonzon tezong amawkna honghi zel thei hi.

Tate aneu lai a ki pan Pasian upna nading, cihtak nading, Nu le Pa thu man nading cihte vawh kholh gengen kholh kul hi. Sum ideih ta zong tate hun piak kul hi.

Seen te bang “ataten anu-apa te en kik khol lo, ataten zong en kik khollo,” tua bangdan a akhangkhang a paito ding hizen hi.

Mikang te zong “ataten pitek putek kepna ah puak, amau zong ataten puak…” tuateng tawh khang kizom to ding hi…..

Nang nateek dong natate kepna na tete itna sungah na om nuam hiam… nang bang khaici navawh hiam….

I minam ading bang khaici ivawh hiam, I nasepna ah bang khaici ivawh hiam?, Innkuan sung Zi le Pasal kikaal ah bang khaici ivawh hiam?, Tu le Tate ading bangci khaici nam ivawh hiam?, tuni kingaihsun pha kik dih ni lawm, I vawh bang tektek in a ki-at ding ahih lam mangngilh kha kei ni.

Lungdam
Daniel Mangpu
(Zogam Laaizom)