Ih kaal ah guam thuukpi… (Part 2) ~ Zomi Quavadis

Ih kaal ah guam thuukpi… (Part 2) ~ Zomi Quavadis

Ka pumpi a dam khit hangin ka lungsim sunga ka vei leh ka thuak lungsim natna pen vangik bangin lel in ka tukpih dekdek a, bai a ka bah hun zong om thei zel hi. Ka lawmnu hong laikhak nutsiat in hizah takin ka nuntakna hong susia zo cih mawk pen lamdang ka sa mahmah a, ka ngaihsutsut ciangin naupang khat a naumilim laksak lehang sun thapai a kah zawh mawk pen ka mawhsak nawn kei hi.

Bang hang hiam cileh tua naupang aa dingin nuntakna nei lo naumilim pen na dang khempeuhte sangin thupi zaw a, England kumpinu lukhu zepna diamond suang manpha pente sangin zong tua naumilim pen ama aa dingin hoih in deihhuai zaw pekpek cihna himawk hi.

Himah hi, kei aa dingin zong tua ka lawmnu pen bangzah takin sia mah taleh, hong laikhak nutsiat sunga kammal zumlehiam ten kei hong sunlum dek tak phial mah taleh ka huatna sangin ka itna tungnung zaw lai veve a, ka sihna ding lampi a zui ka hiphial zongin lampi dang zuih ding ka khensat taktak zo tuan kei mawk hi. Nikhat bek, sun khat bek, naikhat sung bek, minit khat sung bek na lawmnu tawh nuam takin kikhawl unla tua khit ciangin si pah in hong kici in hileh “Ut keng” ka cingam mawk tam, ka nial zo mawk tam aw!!!

Hizah taka ka It leh ka ngaih, ka ngaihsutna khempeuh bek zong hi lo, ka nuntakna donga ka piak ngam numeikhat in kei tungah hehpihna leh itna gulhik-khekhap cia zong hong nei het lo cih mawk pen na ka sa mahmah hi. “Kamsia” cih kammal pen tua laitak a kei dinmun tawh ka ngaihsut khop ciangin “kamphatna “ hizaw a, “Kamsia” cih kammal lel tawh ka thuak lungsim natna hilhcian zo hileng athuak dan khat nopzaw deuh in ka um hi. Nuntakna in kei aa dingin sihna hi a, sihna pen kei aa dingin athak a nuntak kik theihna hun manpha himawk ahihman in sihna ngaiin ka kapkap hi.

Sihna ka zawltai pih nop hun hong om dekdek mawk hi. Ahizongin Sihna tawh na zawltai mawk in hileng hih ka tangthu kua in hong gelhsak ding hiam?!. Sihna sungah ka nungta phial zongin ka it ka ngaih ka lawmnu mu tuan kei leng a nopna bang himawk ding hiam! Tuazah ciang dongin mi khat tungah Itna na nei zo nai hiam? Ka khawnung ngaihsut kik ciangin khatvei nuntak hun sungah mihing khat tuazah tak a ka it theih pen hampha ka kisa hi. Ka thuak laitak in zawngkhal lawh liang himah taleng Itna ii manphatzia leh mihingte nuntakna in nuntakna mawkmawk ahih het loh lam ka tel tuam a, mihingte vaang aphat zia zong tel cihtak mah in ka tel hi.

Mihing khat hanga ka zawngkhal lawh lam ka pa in hong muh ciangin hehpihhuai hong sa mahmah hi. Hehnepna kamkhum awnemte lah ka bil sungah lut zo nawn lo a, nidang a hong maitaisak zo den ahi ka nau numeino inzong hong nuisak zo nawn lo hi. Pau lo phun lo, nui lo puam lo in ka omzawh ni sawm dektak khit ciangin ka pa vaihawm siamna tawh Europe gam sunga mun hoih khempeuh en dingin ka lawmpa tawh ka zin khia uh hi.

Ka lungsim sunga teeng ka lawmnu ka mangngilh theih tuam khak leh cih lametna leh deihsakna tawh hibanga sum tampi beiin ka pa in hong vaihawmsak ahihi. Ka pai kuan ding ciangin ka pa tawh khut ka kilen uh a, ka lutungah khutnga in thu hong ngetsak hi. Tualai takin ka tuanna ding Tembawpi pen a khawlna munah pai nuam lua kisa in na ki huang deudeu ta hi…. (Hun a om leh zom to lai ni) …Zomi Quavadis….