Ih kaal ah guam thuukpi… (Part 1) ~ Zomi Quavadis

Ih kaal ah guam thuukpi… (Part 1) ~ Zomi Quavadis

Inn ka tunkik ciangin thawm bangmah ka za kei a, kongkhak ka kiuh hangin kuamah in ong hon lo hi. Bang thu bang laa om peuh mah hiam aw ciin kongkhak maiah dingin ka ngaihsun niloh hi. Vengte inn zong mei na mit khin a, khuadak dak taleng meitaang muh ding om peuhmah lo mawk hi. Tualai takin zingsang nai khat sat khin ta hi. Asawt lo in ka inn pen asung pan a kikalh na hilo zaw a, a pualam pan akikalh ahihlam ka tel ciangin ka bombi ip sunga tawhtang ka puak tawh kongkhak hong in innsung ka lut leh ka upmawh bang lian in khua na zingcip hi.

Ka paina khempeuh ah ka puakden na nam thum om a, tuate pen meisah, ka inn tawhtang leh ka sumbawm ahihi. Ka meisah sai in kawmzol tunga khuaimei tumtawng khat ka vaak pah hi. Tua khuaimei tawh lupna lam ka zuan phei pah hi. Ka lupna pen bawlsa litlet in na om a, lupna geia sabuai tung ka et aleh laidal kikhep khat na kinusia hi. Tutpha tungah tusuk in khuaimei taang kiukiau nuaiah kitel lo melmualpi in ka sim pah hi.

Tua laikhak ka sim lai taka ka lungsim nat dan pen kam tawh gwn zawh ding hi lo hi. Hibang a lungsim natna ka thuak kik ding sangin abeisa hun a ka thuaksa simmawh bawlsiatna leh gilkial dangtaakna khempeuh thuakkik ding hong kici leh ka utzaw ding hi. Tuazah taka pasal takpi numeisia banga hong kap sak thei leh ka khitui hong luangsak zo laikhak pen ahibang lianin hong lak ning maw, na sim dih ve:

“U aw, hih laikhak na simsim laitak in kei pen ka innsapna sunga ka lupna tungah ka zawlluipa tawh nuam takin na om khawm ta ding hing cih thei inla,hih laikhak na sim gaih khit ciangin nang leh kei ih kizopna khempeuh zong khau bangin a kitat siang sitset hi ta hi cih zong na mangngilh ken maw. Hong lamen nawn kei in,lamet ding zong om nawn keng.

Ka tenna khuapi sungah nang tawh ih kitheihma pek a ka omdan ngeina bangin kei pen midang neihsa hikik ta ingh. “Mangpha maw” Cih thu pen tua lai kikhep sitset sungah ka lawmnu letzi ngiat tawh na kigelh hi. Ka sim khit ciangin tua laidal pen ka sim laitak a ka khitui luangin na kawtkimsak khin a, a kawtpipi mah in khepkik in ka ipsungah ka guang hi. “Mangpha” cih kammal pen letzi tuamdang in na gelh deuh se lai hi!

Numeite neih Itna icih patkhau banga to lo leh khuaimei banga tum ziau thei Itna na himawk aive maw ciin sual tungah khukdin in khitui naptui tawh aw ling deldel in ka awng khia a, tuni donga ka mangngilh theih loh ka lawmnu min ka lo hi. A den ciangin ka inn sung pan paikhia in ka lawmnu omna tenna khuapi lam zuan dingin ka kithawi hi. Innpua ka tun ciangin guah na phin phin hi. Khedap zong bulh lo in guahzu meikai nuaiah mihai bangin khuapi lam manawh in nawh takin ka pai hi.

Lamkaal a ka kituahpih khempeuh ka lawmnu a hitam ciin amel uh ka telsiang dongin ka en pahpah hi. Tua laitak mihai ka suak takpi hi! Khuapi sung ka lut laitak in zingsang nai sagih na sat khin ta hi. Ka zawlpa inn ka kidenna pah a, guah lim thuak lua ka hihman in ka cina cip suk pah hi. Lupna tungah nithum sung tawntung ka tho khia zo kei hi. Ka pa in ka cinat thu azaak ciangin sakolleng tawh ka khua vuah hong ciahpih hi. Kaalkhat khit ciangin ka pumpi hong dam a, ahizong in ka lungsim dam siang thei nai tuan lo hi.

“Tui bang gawm ding tong kiciamsa, lailung gel ciang maw na lua e. Sian gawm loh ciin hehnem mai ta’ng. na vang mubang kong ngaih hang maw, Ih kaal guam thuukpi’n hong hal ta. Vang ngaih laukha al bang dah nau bang kap kap e..” (Hun a om leh zom to lai ni) …Zomi Quavadis….