Ih hihna khempeuh ah a thumang hih sawmni

Ih hihna khempeuh ah a thumang hih sawmni

Innkuan sungah ziten pasalte thumang ding ahi hi. Tua mah bangin taten zong nulepa thumang hileng, u ih hih leh ihnauten zong ih thu hong mang pah uh a, nau zaw ih hih leh zong ih sanggam ten hong simmawh ngamlo uh hi. Ih nulepa vangin ih unau lak ah zong nulepa thumangte mahin nuamsa zaw hamtang hi. Nulepa dinmun dingin kingaih sun leng ih thu hong mang tapa,tanu pen it lo in ih om thei diam? Ih thu hong manglo tapa,tanu sangbel itzaw limlim dingin kei ngaih sutna hi. Nulepa thu manglo a nulepa khawng ih samsiat leh khuamial sunga meivak kisumit ih bat ding lam Paunak 20:20 na tungtawn in kimu thei hi.

Sang naupang khat in zong a siate zahtak keileh siate lungkimlo in hong sat thei hi. Sia dingin kituat leng hong zahtak lo khat ih it zo diam? Lai hong hilh siate a zahtak theilo sang naupang khat pen gual tungtuang cih om khawllo hi. Tukhawng a pilna sang ih cih atam zaw lai hong hilh siate a zahtak thei sang naupang mah na hiham tang hi. Siate tungah thupha bawlin a zahtak,thumangin a omte a siate uh lungkim sak ahihmanin thupha bawl ahih manin Pasian zong a thumangnate hangin pilna na pia a, pilna asin theihna dingin cidamna zong pia in khuak hoihta kei leh ama ngah khawp ding gualzawhna na pia veve hi. Siate a zahtaklo sang naupang khat a pil mahmah hangin, cidam lohna maw thunawng kai khat khawng hangin a tun ding zah tung zolo thei hi.

Na sem khat ih hih leh ih pu (boss) te thumang zolehang a zahtaklote sang hong it zaw veve uh hi. 1Peter 2:18 na-ah “nasemte aw, na tote uh thu na mang un. A thudik a migi na tote bek uh a zahtak hilo in a gilo na tote uh thu zong na mang un” cih ih sim ciangin kimu thei hi. Sente leh kawlte atam zaw in a pu (boss) te uh zahtak dan pen siammah2 deuh se hi. Ei mi pen a kei a kipan kiheh luplup pah2 in kilungtom thei mahmah hi. Khat pan ih zahtak siamloh hangbel cihtak lambel ih pu(boss) ten hong thei mahmah bilbel uh hi. Ih senpy theih taktakna ding pen thumang ding mah hizel hi.

Pawlpi sungah ih makai pawlpi siate/upate thumanglo khat pen pawlpi ading thu adong tang mahmah pawlpi mi hi’n, ih siate/upa ten hong it zahin hong it zolo thei hi. Pasian in makai ding a, a sehte ahihmanun amau tungah ih bawl bangbang Pasianin hong bawl ding hi cih phawk ding kisam hi. Pasian nasem siate’n/upate’n zong amau thu bek thusa, asawlpa thumangloin amawk om uh leh amau leh Pasian kikal hi lel ding a, zahtak bangta kei leh a thu-uh mang ngiat leng Pasian maipha ngah in ih cidam in nuntak nuam ih sa ding hi.

Tua mah bangin kipawlna,kimakaihna tuamtuamte ah zong hong makaite thumangleng kipawlna hong nuam mahmah ding a, ih lunggulh mahmah kipum khatna muham tang ding hihang cih ka lamen ngam hi. Makai ten zong ih nungzuite zahtak ding zong kisam veve hi. Nung zuite adingin bel zahtak huai-in, zahtak huaita keileh a thu-uh mang ding Lai Siangtho honggen ahih manin a thu-uh mang ding ahi hi. Thumangin ih omnak leh Pasian in thaman hong pia ding hi cih ka lamen hi. Ka kisin leh ka lunggulh mahmah thu kong gelh hi cih hong theih pih un maw Zomi ulenaute.

Zomi ka hihi.
Suano
Malay